కేంద్రం చెప్పిందే వేదం.. ఇంటర్‌కు చరమగీతం

• మోదీ సర్కార్‌ ఒత్తిడికి తలొగ్గిన రేవంత్‌ ప్రభుత్వం

• గతంలో వ్యతిరేకించిన బీఆర్‌ఎస్‌

• జాతీయ స్థాయిలో ఎన్‌ఈపీకి కాంగ్రెస్‌ నో.. తెలంగాణలో సై

• ఆంధ్రప్రదేశ్‌లో అట్టర్‌ ఫ్లాప్‌

• తెలంగాణ మాత్రం అదే ప్రయోగం

హైదరాబాద్‌, నవంబర్‌ 12 (నమస్తే తెలంగాణ): కేంద్రంలోని బడే భాయ్‌ ఆర్డర్‌ వేయడం.. తెలంగాణలో చోటే భాయ్‌ అనుసరించడం.. ఇదీ గత కొంతకాలంగా జరుగుతున్న తంతు. రాష్ట్రంలోని చోటే భాయ్‌ ఇంటర్‌బోర్డు రద్దు విషయంలోనూ దీన్నే కొనసాగించారు. ప్రధాని మోదీ ఆర్డర్‌ వేయడమే తరువాయి.. సీఎం రేవంత్‌ సరెండర్‌ అయిపోయారు. ఇంటర్‌ విద్యను కాలగర్భంలో కలిపేందుకు సిద్ధమయ్యారు. ఇంటర్‌ బోర్డును పాఠశాల విద్యలో విలీనం చేయాలని ముఖ్యమంత్రి రేవంత్‌రెడ్డి అధికారులను ఆదేశించిన విషయం తెలిసిందే. కేంద్ర ప్రభుత్వ ఒత్తిడి మేరకే ఈ విషయంలో రాష్ట్ర ప్రభుత్వం తలొగ్గింది. ఎన్‌ఈపీ అమలుకు రెడ్‌కార్పెట్‌ పరిచింది. రాష్ట్రంలో రెండు బోర్డులు ఉండటం పట్ల కేంద్రం చాలాకాలంగా అభ్యంతరం, అసంతృప్తి వ్యక్తంచేస్తున్నది. రెండు బోర్డులను విలీనం చేయాలని ఆదేశాలిస్తున్నది. గత బీఆర్‌ఎస్‌ సర్కార్‌ ఈ ప్రతిపాదనలను తీవ్రంగా వ్యతిరేకించింది. మాజీ ప్రధాని పీవీ నర్సింహారావు అమల్లోకి తెచ్చిన ఇంటర్‌ విద్యను ముట్టుకోలేదు. ఈ విద్యకున్న ప్రత్యేకతలు, గొప్పతనాన్ని గుర్తించి కొనసాగించింది.

ఎన్‌ఈపీకి వ్యతిరేకం.. ఇక్కడ మాత్రం

జాతీయ స్థాయిలో కాంగ్రెస్‌ పార్టీ బీజేపీ విధానాలను తీవ్రంగా వ్యతిరేకిస్తున్నది. ‘సర్‌’ ప్రక్రియ మొదలుకొని నియోజకవర్గాల పునర్విభజన, జమిలీ ఎన్నికలను తప్పుబడుతున్నది. కానీ, తెలంగాణలో మాత్రం జాతీయ విద్యావిధానం (ఎన్‌ఈపీ) అమలుకు ఉత్సాహం చూపుతున్నది. మోదీ ప్రభుత్వం 2016లో సుబ్రహ్మణ్యం కమిటీని, దానికి కొనసాగింపుగా కస్తూరి రంగన్‌ కమిటీని ఏర్పాటుచేసింది. ఈ కమిటీ నూతన జాతీయ విద్యావిధానాన్ని ప్రతిపాదించింది. ఎన్‌ఈపీ 5+3+3+4 విద్యావిధానాన్ని ప్రకటించింది. ఎన్‌ఈపీ-2020కు అనుగుణంగానే రాష్ట్ర ప్రభుత్వం ఇంటర్‌బోర్డు విలీనానికి సిద్ధమైంది. కానీ, జాతీయస్థాయిలో ఎన్‌ఈపీని కాంగ్రెస్‌ పార్టీ తీవ్రంగా వ్యతిరేకిస్తున్నది. తాము అధికారంలోకి వస్తే ఎన్‌ఈపీని రద్దుచేస్తామని కూ డా చెప్తున్నది. రాష్ట్రం లో ఎన్‌ఈపీకి రాష్ట్రం తలూపడం అంటే ద్వంద్వ విధానమే అవుతుందని విద్యారంగ నిపుణులంటున్నారు.

కాలేజీలు పెడుతామన్నారు.. బోర్డునే ఎత్తేస్తున్నారు

ఇంటర్‌ విద్య బలోపేతానికి ప్రతి మండల కేంద్రంలో జూనియర్‌ కాలేజీని ఏర్పాటుచేస్తామని కాంగ్రెస్‌ పార్టీ ఎన్నికల మ్యానిఫెస్టోలో ప్రకటించింది. ఇంటర్‌ విద్యను విస్తరిస్తామని పేర్కొన్నది. ఇప్పుడు అదే మ్యానిఫెస్టోకు విరుద్ధంగా ఇంటర్‌బోర్డునే రద్దు చేసేందుకు సిద్ధమైంది. మ్యానిఫెస్టోలో జూనియర్‌ కాలేజీలు పెడుతామని చెప్పి, ఇప్పుడు ఏకంగా బోర్డుకు చరమగీతం పాడటం, బోర్డు ఉనికికే ముప్పు తీసుకొనిరావడంపై విద్యార్థి సంఘాలు మండిపడుతున్నాయి.

ఏపీలో అట్టర్‌ఫ్లాప్‌

ఆంధ్రప్రదేశ్‌లో ప్రయోగాత్మకంగా ప్రారంభించిన 10+2 విద్యావిధానం విఫలమైంది. రెండు దఫాల్లో 502 ఉన్నత పాఠశాలల్లో ప్లస్‌ టూను (ఇంటర్‌) ప్రారంభించారు. ఉన్న స్కూళ్లనే ఇంటర్‌ వరకూ అప్‌గ్రేడ్‌ చేశారు. 1,752 మంది స్కూల్‌ అసిస్టెంట్‌ టీచర్ల ద్వారా ఇంటర్‌ విద్యాబోధన చేస్తామని పేర్కొన్నారు. కాగా, 130 స్కూళ్లల్లోని ఇంటర్‌లో జీరో అడ్మిషన్లు నమోదయ్యాయి. 2022లో రెండువేల మంది, 2026లో ఆరు వేల మంది మాత్రమే ఇంటర్‌లో చేరారు. అప్‌గ్రేడ్‌ చేసిన స్కూళ్లల్లో 17.7% మంది మాత్రమే ఇంటర్‌ పాసయ్యారు. అంటే 83% ఫెయిలయ్యారు. అన్ని యాజమాన్యాల పరిధిలోని కాలేజీలతో పోల్చితే ఇదే అతి తక్కువ ఉత్తీర్ణతా శాతం కావడం గమనార్హం. 2024లో టీడీపీ నేతృత్వంలోని ఎన్డీఏ ప్రభుత్వం వచ్చాక.. వీటిని రద్దుచేసింది. జూనియర్‌ కాలేజీలు లేని చోట్ల 192 కొత్త జూనియర్‌ కాలేజీలను మంజూరుచేసింది. ఈ అనుభవం నుంచి పాఠాలు నేర్చుకోవాల్సింది పో యి.. తెలంగాణలోనూ విఫల ప్రయోగాన్ని అమలుచేసేందుకు సిద్ధపడుతుండటం పట్ల తీవ్ర అభ్యంతరాలు వ్యక్తమవుతున్నాయి.

బీజేపీ రాష్ర్టాల్లోనూ రెండు బోర్డులు

పదో తరగతికి, ఇంటర్‌కు వేర్వేరు బోర్డులు ఒక్క తెలంగాణలోనే లేవు. అనేక రాష్ర్టాల్లో రెండు బోర్డులున్నారు. 18 రాష్ర్టాల్లో మాత్రమే సింగిల్‌ బోర్డులు ఉండగా, మిగితా రాష్ర్టాల్లో ఇంటర్‌కూ, ఎస్సెస్సీకీ ప్రత్యేక బోర్డులున్నాయి. బీజేపీ పాలిత రాష్ర్టాలైన ఒడిశా, పశ్చిమబెంగాల్‌, అసోం, ఉత్తరాఖండ్‌, మహారాష్ట్ర, ఉత్తరప్రదేశ్‌లోనూ రెండు బోర్డులు కొనసాగుతున్నాయి. పొరుగు రాష్ట్రం ఆంధ్రప్రదేశ్‌లో ఎన్టీఏ ప్రభుత్వమే ఉన్నది. కానీ, ఏపీలో ఇంటర్‌కు, ఎస్సెస్సీకి ప్రత్యేక బోర్డులున్నాయి. ఈ బోర్డులను వీలైనంత త్వరగా పాఠశాల విద్యలో విలీనం చేయాలని కేంద్రం తరుచూ ఆదేశిస్తున్నది.