Javed Akhtar: ప్ర‌తి భార‌తీయుడి ర‌క్తంలో రాముడున్నాడు.. జావెద్ అక్త‌ర్ వ్యాఖ్య‌ల‌ను ఖండించిన ముస్లిం నేత‌

18 November 2026 - 12:00
0 0
Javed Akhtar: ప్ర‌తి భార‌తీయుడి ర‌క్తంలో రాముడున్నాడు..  జావెద్ అక్త‌ర్ వ్యాఖ్య‌ల‌ను ఖండించిన ముస్లిం నేత‌
Javedakhtar

ముంబై: మ‌తంతో సంబంధం లేకుండా ప్ర‌తి భార‌తీయుడి ర‌క్తంలో రాముడు ఉన్నాడ‌ని బాలీవుడ్ ర‌చ‌యిత జావెద్ అక్త‌ర్(Javed Akhtar) అన్నారు. రామాయ‌ణ్ చిత్రం గురించి ఆయ‌న మాట్లాడుతూ ఈ వ్యాఖ్య‌లు చేశారు. అయితే ఆల్ ఇండియా ఇమామ్ అసోసియేష‌న్ ప్రెసిడెంట్ మౌలానా సాజిద్ ర‌షీద్ ఆ వ్యాఖ్య‌ల‌ను ఖండించారు. జావెద్ అక్త‌ర్ ఉద్దేశాన్ని ఆయ‌న వ్య‌తిరేకించారు. అక్త‌ర్ త‌న పేరును రామ్ పాల్‌గా మార్చుకోవాల‌ని సూచించారు. గ‌తంలో షారూక్ ఖాన్ న‌టించిన స్వ‌దేశీ చిత్రంలో రాముడిపై జావెద్ అక్త‌ర్ ప‌ల్ ప‌ల్ హై బారీ అనే ఓ సాంగ్ రాశాడు. మ‌న‌సులో నుంచి రావ‌ణుడిని తీసివేస్తే , ఆ వ్య‌క్తి మ‌న‌సులో రాముడు ఉంటాడ‌ని ఆ పాటలో ఓ చ‌ర‌ణం ఉంటుంది. ఆ సాంగ్ గురించి వివ‌రిస్తూ రాముడి గుర్తింపు అనేది మ‌తాల‌కు సంబంధం లేనిద‌న్నారు. రాముడు ఓ వ్య‌క్తి మాత్ర‌మే కాదు అని, రాముడు అమ‌రుడ‌ని, రాముడు ఓ జీవ‌న‌శైలి అని, రాముడి ఆలోచ‌న‌లో, ఆయ‌న‌లో నైతికత‌ ఉంద‌న్నారు. రాముడి వైభ‌వాన్ని కీర్తిస్తూ.. ప్ర‌తి భార‌తీయుడి ర‌క్తంలో రాముడు ఉన్నాడ‌ని, వాళ్లు ఏ మ‌తం వారైనా, ఆయ‌నో జీవ‌న‌శైలి అన్నారు.

అక్త‌ర్ చేసిన వ్యాఖ్య‌ల‌ను ముస్లిం నేత ర‌షీద్ ఖండించారు. వాణిజ్య లాభాల కోసం బాలీవుడ్ ర‌చ‌యిత ఆ వ్యాఖ్య‌లు చేసిన‌ట్లు ఆరోపించారు. జావెద్ అక్త‌ర్ ఓ వ్యాపార‌వేత్త అని, బాలీవుడ్‌లో పాట‌ల్ని అమ్ముకుంటార‌ని, ఆయ‌న అలాంటి వ్యాఖ్య‌లు చేయ‌కుంటే, ఆయ‌న పాట‌ల్ని ఎవ‌ర్ని కొంటార‌ని ముస్లిం నేత ర‌షీద్ అన్నారు. అనేక సంద‌ర్భాల్లో నాస్తికుడిని అని జావెద్ అక్త‌ర్ చెప్పుకున్నార‌ని, ఆయ‌న మ‌తాన్ని న‌మ్మ‌ర‌ని ర‌షీద్ అన్నారు. నాస్తికుడైన అక్త‌ర్ ఇప్పుడు రాముడిపై విశ్వాసాన్ని చూపుడుతున్నాడ‌ని, అందుకే ఆయ‌న త‌న పేరును రామ్ పాల్‌గా మార్చుకోవాల‌ని సూచిస్తున్న‌ట్లు చెప్పాడు. మీరు పేరు మార్చుకుంటే 80 శాతం మంది హిందువులు మీకు పూర్తి గౌర‌వం, మ‌ర్యాద ఇస్తార‌ని ర‌షీద్ కామెంట్ చేశారు.

Comments (0)

User