HIV | హెచ్‌ఐవీ వ్యాధిగ్ర‌స్తుల‌కు కొత్త ఔష‌ధం.. ఏడాదికి రెండుసార్లు ఇంజెక్ష‌న్ చాలు..

HIV | ఉగాండాలోని పశ్చిమ ప్రాంతంలో ఉన్న బ‌రారా నగరంలో హెచ్‌ఐవీ వ్యాప్తి ఆందోళన కలిగిస్తోంది. అక్కడి రెడ్‌లైట్ ప్రాంతంలో పనిచేసే ఓ మహిళ లైంగిక సంబంధాల సమయంలో కండోమ్‌లను తప్పనిసరిగా ఉపయోగించాలని కోరుతున్నప్పటికీ, కొంతమంది పురుషులు వాటిని తొలగించడానికి లేదా చింపేయడానికి ప్రయత్నిస్తున్నారు. హెచ్‌ఐవీ నివారణ కోసం ఆమె ప్రీఈపీ మందులు తీసుకుంటోంది. అయితే ఇప్పుడు లెనకాపావిర్ అనే కొత్త ఔషధంపై ఆశలు పెరుగుతున్నాయి. ఏడాదికి రెండుసార్లు మాత్రమే ఇంజెక్షన్ తీసుకోవడం ద్వారా హెచ్‌ఐవీ నుంచి దాదాపు సంపూర్ణ రక్షణ పొందవచ్చని అధ్యయనాలు వెల్లడించాయి. ఆరు నెలల పాటు రక్షణ కల్పించే ఈ ఇంజెక్షన్ వల్ల రోజూ ట్యాబ్లెట్ల‌ను వేసుకోవాల్సిన అవసరం ఉండదని, ముఖ్యంగా తరచూ ఇతర ప్రాంతాలకు వెళ్లే లైంగిక కార్మికులకు ఇది ఎంతో ఉపయోగకరమని ఆమె అభిప్రాయపడుతోంది.

స‌మ‌ర్థ‌వంతంగా ప‌నిచేస్తున్న ఇంజెక్ష‌న్‌..

ప్రస్తుతం ప్రీఈపీ ట్యాబ్లెట్లు, ప్రతి రెండు నెలలకు ఒకసారి ఇచ్చే క్యాబోటెగ్రావిర్ ఇంజెక్షన్ కూడా హెచ్‌ఐవీ నివారణలో సమర్థవంతంగా పనిచేస్తున్నాయి. అయినప్పటికీ, దీర్ఘకాలం ప్రభావం చూపే లెనకాపావిర్ ప్రపంచవ్యాప్తంగా హెచ్‌ఐవీ వ్యాప్తిని తగ్గిస్తుందని ఆరోగ్య నిపుణులు భావిస్తున్నారు. అయితే ఈ ఔషధానికి డిమాండ్ ఎక్కువగా ఉన్నప్పటికీ సరిపడా నిల్వలు అందుబాటులో లేవు. హెచ్‌ఐవీ నివారణ నిపుణుల అభిప్రాయం ప్రకారం.. త్వరలోనే లక్షలాది మందికి ఈ ఔషధాన్ని అందించాల్సిన అవసరం ఉంది.

ఆమోదం తెలిపిన అమెరికా సంస్థ‌..

లెనకాపావిర్ జనరిక్ రూపానికి అమెరికా ఆహార, ఔషధ నియంత్రణ సంస్థ తాత్కాలిక ఆమోదం తెలిపింది. దీంతో తక్కువ ఆదాయం కలిగిన 120 దేశాలకు ఈ ఔషధాన్ని సరఫరా చేసే అవకాశం ఏర్పడింది. ఏడాదికి సుమారు 40 డాలర్లకే జనరిక్ ఔషధాన్ని అందించవచ్చని అంచనా. అమెరికాలో మాత్రం దీని జాబితా ధర 28,218 డాలర్లుగా ఉంది. 2028 చివరి నాటికి 30 లక్షల మందికి ఈ ఔషధాన్ని అందించాలని గ్లోబల్ ఫండ్ లక్ష్యంగా పెట్టుకుంది. అయితే మరింతమందికి తక్కువ ధరకు ఔషధం అందుబాటులోకి రావాలని డాక్టర్స్ వితౌట్ బోర్డర్స్ వంటి సంస్థలు కోరుతున్నాయి.

డోసుల‌కు కొర‌త‌..

బ‌రారా నగరంలో పెద్దల‌లో సుమారు 10 శాతం మందికి హెచ్‌ఐవీ ఉన్నట్లు అంచనా. ఇది ఉగాండా సగటు కంటే రెండింతలు. ఒక వ్యక్తి భార్యకు హెచ్‌ఐవీ సోకినట్లు నిర్ధారణ కావడంతో, తనకు రక్షణ కోసం లెనకాపావిర్ ఇంజెక్షన్ పొందాలని ప్రయత్నించాడు. కానీ ఆరోగ్య కేంద్రంలో తగినన్ని డోసులు లేవని తెలిసింది. ఏప్రిల్‌లో వచ్చిన 40 డోసులు త్వరగా పూర్తికాగా, జూన్‌లో వచ్చిన మరో 70 డోసులు కేవలం పది రోజుల్లోనే అయిపోయాయి. గత మూడు దశాబ్దాల్లో ఉగాండా హెచ్‌ఐవీ వ్యాప్తిని తగ్గించినప్పటికీ, లైంగిక సంబంధాల ద్వారా వైరస్ వ్యాప్తి ఇంకా ప్రధాన సమస్యగా ఉంది. ఔషధానికి డిమాండ్ అధికంగా ఉండగా, సరఫరా తక్కువగా ఉండడం వల్ల అవసరమైన వారందరికీ రక్షణ అందడం లేదని నిపుణులు అభిప్రాయ‌ప‌డుతున్నారు.