భవన నిర్మాణ కార్మికుల సంక్షేమ ఫలాలు పక్కదారి!

– కోదాడ ఏఎల్ఓ కార్యాలయంలో అవినీతిపై సమగ్ర విచారణ జరపాలి
– ఏఐటీయూసీ రాష్ట్ర కార్యదర్శి మేకల శ్రీనివాసరావు డిమాండ్‌

కోదాడ‌, న‌వంబ‌ర్ 13 : భవన నిర్మాణ కార్మికుల సంక్షేమం కోసం ప్రభుత్వం అమలు చేస్తున్న పథకాల ఫలాలు అర్హులైన కార్మికులకు అందడం లేదని ఏఐటీయూసీ రాష్ట్ర కార్యదర్శి మేకల శ్రీనివాసరావు ఆవేదన వ్యక్తం చేశారు. కోదాడ అసిస్టెంట్ లేబర్ ఆఫీసర్ (ఏఎల్ఓ) కార్యాలయంలో జరుగుతున్న అవినీతి ఆరోపణలపై సమగ్ర విచారణ జరిపించాలని ఆయన డిమాండ్ చేశారు. ఈ మేరకు ఏఐటీయూసీ ఆధ్వర్యంలో శుక్రవారం కోదాడ ఏఎల్ఓ కార్యాలయం ఎదుట ధర్నా నిర్వహించారు. ఈ సందర్భంగా మేకల శ్రీనివాసరావు మాట్లాడుతూ.. భవన నిర్మాణ కార్మికుల సంక్షేమ బోర్డులో అవినీతి పెరిగిపోయిందని ఆరోపించారు. కోదాడ ఏఎల్ఓ కార్యాలయంలో పని చేస్తున్న సీనియర్ అసిస్టెంట్ వ్యవహార శైలిపై అనేక ఆరోపణలు వస్తున్నాయన్నారు. కార్మికులు సంక్షేమ బోర్డులో సభ్యత్వం పొందాలన్నా, కార్డులు పొందాలన్నా మధ్యవర్తులు, ఏజెంట్లను ఆశ్రయించాల్సిన పరిస్థితి ఏర్పడిందని విమర్శించారు.

గ్రామాల వారీగా ఏజెంట్లను ఏర్పాటు చేసి వారి ద్వారా మాత్రమే సభ్యత్వాలు కల్పిస్తున్నారనే ఆరోపణలపై అధికారులు విచారణ జరపాలని కోరారు. కార్మికులకు నేరుగా అందాల్సిన సేవల్లో దళారీ వ్యవస్థకు తావివ్వకుండా చర్యలు తీసుకోవాలని, ఆరోపణలు ఎదుర్కొంటున్న సీనియర్ అసిస్టెంట్ తక్షణమే సస్పెండ్ చేయాలని డిమాండ్ చేశారు. అలాగే ఏఎల్ఓ కార్యాలయానికి వారానికి ఒక్కసారి మాత్రమే వస్తున్నారని, దీంతో కార్మికుల సమస్యలు పరిష్కారం కాక కార్యాలయానికి వచ్చిన వారు ఇబ్బందులు పడుతున్నారని శ్రీనివాసరావు ఆరోపించారు. ఈ ధర్నాలో ఏఐటీయూసీ నాయకులు జడ శ్రీనివాస్, శ్రీనివాసరెడ్డి, ప్రసాద్, జానీ, పాషా, లతీఫ్, అర్జున్, నాగరాజు, కొండలు, మోసిన్, గౌరీ నాయుడు పాల్గొన్నారు.