పేదలకు పెన్షన్లే ఆర్థిక భరోసా : ఎమ్మెల్యే కూనంనేని సాంబశివరావు

– కొత్త‌గూడెం నియోజకవర్గంలో 3,928 మందికి కొత్తగా పెన్షన్లు మంజూరు

చుంచుపల్లి, నవంబర్ 13 : అర్హులైన నిరుపేదలకు చేయూత పెన్షన్లు ఆర్థిక భరోసానిస్తాయని కొత్తగూడెం ఎమ్మెల్యే కూనంనేని సాంబశివరావు అన్నారు. శుక్ర‌వారం కొత్తగూడెం క్లబ్‌లో నిర్వహించిన కార్యక్రమంలో చుంచుపల్లి, లక్ష్మీదేవిపల్లి మండలాల లబ్ధిదారులకు పెన్షన్ మంజూరు పత్రాలను పంపిణీ చేశారు. ఈ సందర్భంగా ఆయన మాట్లాడుతూ.. నియోజకవర్గంలో మొత్తం 3,928 మందికి కొత్తగా పెన్షన్లు మంజూరయ్యాయని తెలిపారు. చుంచుపల్లి మండలానికి 562, లక్ష్మీదేవిపల్లికి 566 పెన్షన్లు కేటాయించినట్లు వెల్లడించారు. దివ్యాంగులు, వితంతువులు, ఒంటరి మహిళలకు పెన్షన్లు ఎంతో తోడ్పాటునిస్తాయని పేర్కొన్నారు. సాంకేతిక కారణాలతో నిలిచిపోయిన అర్హుల పెన్షన్లను సైతం త్వరలో మంజూరు చేయిస్తామని హామీ ఇచ్చారు. ఈ కార్యక్రమంలో డీఆర్డీవో పీడీ విద్యాచందన, ఆర్డీవో మధు, ఎంపీడీవోలు సుభాషిణి, సుస్మిత, మేయర్ మూడ్ గణేష్, సిపిఐ జిల్లా కార్యదర్శి షాబీర్ పాషా పాల్గొన్నారు.