Zakir Naik: జ‌కీర్ నాయ‌క్‌పై నిషేధం మ‌రో అయిదేళ్లు పొడిగింపు

న్యూఢిల్లీ: వివాదాస్ప‌ద ఇస్లామిక్ మ‌త ప్ర‌బోధ‌కుడు జ‌కీర్ నాయ‌క్‌(Zakir Naik)కు చెందిన ఇస్లామిక్ రీస‌ర్చ్ ఫౌండేష‌న్ సంస్థ‌పై నిషేధాన్ని కేంద్ర హోంశాఖ మ‌రో అయిదేళ్ల పాటు పొడిగించింది. దేశ భ‌ద్ర‌త‌కు భంగం క‌లిగించే అంశాల్లో ఆ సంస్థ కార్య‌క‌లాపాలు ఉన్న‌ట్లు కేంద్రం పేర్కొన్న‌ది. శాంతి, మ‌త సామ‌ర్యానికి ఆ సంస్థ వల్ల విఘాతం ఏర్ప‌డే అవ‌కాశాలు ఉన్న‌ట్లు కేంద్ర హోంశాఖ చెప్పింది. యూఏపీఏ చ‌ట్టంలోని సెక్ష‌న్ 3లోని సబ్‌సెక్ష‌న్ 1 కింద ఐఆర్ఎఫ్‌ను చ‌ట్ట‌వ్య‌తిరేక సంస్థ‌గా హోంశాఖ ప్ర‌క‌టించింది. యూఏపీఏ ట్రిబ్యున‌ల్ దీనికి ఆమోదం తెలిపింది. గ‌తంలో విధించిన బ్యాన్ న‌వంబ‌ర్ 14వ తేదీన ముగియ‌నున్న‌ది. ఐఆర్ఎఫ్‌, దాని స‌భ్యులు, ముఖ్య‌మంగా ఆ సంస్థ వ్య‌వ‌స్థాప‌కుడు జ‌కీర్ నాయ‌క్‌.. త‌న మ‌ద్ద‌తుదారుల‌ను రెచ్చ‌గొడుతున్నార‌ని, స‌మాజంలో మ‌తోన్మాదాన్ని సృష్టించే రీతిలో జ‌కీర్ చ‌ర్య‌లు ఉన్నాయ‌ని కేంద్ర ప్ర‌భుత్వం తెలిపింది.

జ‌కీర్ చేసిన వ్యాఖ్య‌లు, ప్ర‌సంగాలు అభ్యంత‌ర‌క‌రంగా ఉన్న‌ట్లు కేంద్రం భావిస్తోంది. విభిన్న మ‌త వ‌ర్గీయుల మ‌ధ్య త‌న ప్ర‌సంగాల‌తో విద్వేషాన్ని సృష్టిస్తున్న‌ట్లు జ‌కీర్ ఆరోపించారు. ప్ర‌పంచ‌వ్యాప్తంగా ల‌క్ష‌ల సంఖ్య‌లో ఉన్న అభిమానుల‌ను టీవీ నెట్వ‌ర్క్‌, ఇంట‌ర్నెట్‌, ప్రింట్‌, సోష‌ల్ మీడియా ద్వారా త‌న ప్ర‌సంగాల‌తో రాడిక‌లైజ్ చేస్తున్న‌ట్లు కేంద్రం త‌న గెజిట్‌లో పేర్కొన్న‌ది.