‘చిరుధాన్యాల సాగుపై రైతులు దృష్టి సారించాలి’

రుద్రంపూర్, నవంబర్ 13 : వాతావరణ మార్పులను తట్టుకుంటూ తక్కువ నీటి లభ్యతతోనూ మెరుగైన దిగుబడులు సాధించే చిరు ధాన్యాల సాగుపై రైతులు దృష్టి సారించాలని వ్య‌వ‌సాయ‌ శాస్త్రవేత్తలు సూచించారు. తక్కువ పెట్టుబడితో అధిక ఆదాయం పొందడంతో పాటు ప్రజలకు పోషకాహార భద్రత కల్పించడంలో చిరు ధాన్యాలు కీలక పాత్ర పోషిస్తాయని తెలిపారు. ఐసీఏఆర్–ఇండియన్ ఇనిస్టిట్యూట్ ఆఫ్ మిల్లెట్స్ రీసెర్చ్ (ఐఐఎంఆర్), హైదరాబాద్ సహకారంతో భద్రాద్రి కొత్తగూడెం కృషి విజ్ఞాన కేంద్రం (కేవీకే) ఆధ్వర్యంలో శుక్రవారం కేవీకే ప్రాంగణంలో కిసాన్ మేళా, జొన్న విత్తనాల పంపిణీ కార్యక్రమాన్ని నిర్వహించారు. ఈ కార్యక్రమానికి ముఖ్య అతిథిగా హాజరైన ఐసీఏఆర్–ఐఐఎంఆర్ సీనియర్ సైంటిస్ట్, హెడ్ డాక్టర్ ఎ.శ్రీనివాస్ మాట్లాడుతూ.. చిరుధాన్యాల్లో సమృద్ధిగా పోషక విలువలు ఉన్నాయని, వాటి వినియోగం మానవ ఆరోగ్యానికి ఎంతో మేలు చేస్తుందని వివరించారు. చిరుధాన్యాలతో విలువ ఆధారిత ఉత్పత్తులను తయారు చేసి విక్రయించడం ద్వారా రైతులు అదనపు ఆదాయం పొందవచ్చని సూచించారు.

డాక్టర్ డి. శ్రావంతి, వ్యవసాయ శాస్త్ర అసిస్టెంట్ ప్రొఫెసర్ మాట్లాడుతూ.. జొన్న, సజ్జ, రాగి పంటల్లో అనుసరించాల్సిన సాగు యాజమాన్య పద్ధతులను వివరించారు. సమతుల్య ఎరువుల వినియోగం, నీటి యాజమాన్యం, కలుపు నివారణపై రైతులకు అవగాహన కల్పించారు. కేవీకే సీనియర్ సైంటిస్ట్, హెడ్ డాక్టర్ టి. భరత్ మాట్లాడుతూ.. ఎల్‌నినో ప్రభావంతో వాతావరణ పరిస్థితుల్లో మార్పులు చోటుచేసుకునే అవకాశం ఉన్న నేపథ్యంలో తక్కువ నీటితో సాగు చేయగల చిరు ధాన్యాల పంటలకు ప్రాధాన్యత ఇవ్వాలని సూచించారు. రైతులకు కేవీకే ద్వారా అందిస్తున్న సాంకేతిక సేవలు, శిక్షణ, వ్యవసాయ విస్తరణ కార్యక్రమాలను వివరించారు. ఈ సందర్భంగా REAC సభ్యులు ఎం. యాదగిరి వ్యవసాయ రంగంలో చేపడుతున్న కార్యక్రమాలతోపాటు తన సాగు అనుభవాలను రైతులతో పంచుకున్నారు.

‘చిరుధాన్యాల సాగుపై రైతులు దృష్టి సారించాలి’

ఈ కార్యక్రమంలో వ్యవసాయ సహాయ సంచాలకులు శోభన్‌బాబు, ఉద్యానవన అధికారి పాపారావు, ఎఫ్‌పీఓ డైరెక్టర్ అమృ, వ్యవసాయ మార్కెట్ కమిటీ డైరెక్టర్ శేఖర్, CHESAD స్వచ్ఛంద సంస్థ ప్రతినిధులు తదితరులు పాల్గొన్నారు. జిల్లాలోని సుమారు 250 మంది రైతులు ఈ కార్యక్రమానికి హాజరయ్యారు. చిరుధాన్యాల సాగును ప్రోత్సహించే లక్ష్యంతో కార్యక్రమంలో భాగంగా 250 మంది రైతులకు జొన్న విత్తనాలను పంపిణీ చేశారు. తక్కువ పెట్టుబడితో మెరుగైన ఆదాయం పొందేందుకు చిరుధాన్యాల సాగును విస్తరించాలని ఈ సందర్భంగా శాస్త్రవేత్తలు రైతులకు సూచించారు.