Man Kills Wife | భార్యను చంపిన వ్యక్తి.. ‘కొత్త అమ్మ’ను తెస్తానని కూతురికి నచ్చజెప్పే యత్నం

పాట్నా: ఒక వ్యక్తి నిద్రిస్తున్న భార్యను కత్తితో పొడిచి హత్య చేశాడు. ఇది చూసి అరవబోయిన కుమార్తెను అతడు వారించాడు. కొత్త అమ్మను తెస్తానని కూతురికి నచ్చజెప్పేందుకు ప్రయత్నించాడు. చివరకు ఇద్దరు కుమార్తెలతో కలిసి పోలీస్‌ స్టేషన్‌కు వెళ్లి లొంగిపోయాడు. (Man Kills Wife) బీహార్‌లోని ముంగేర్ జిల్లాలో ఈ సంఘటన జరిగింది. జమాలపూర్‌లో నివసిస్తున్న దశరథ్ మండల్, రైల్వేలో పని చేసి రిటైర్డ్‌ అయ్యాడు. రాత్రి వేళ ఇంట్లో నిద్రిస్తున్న ఇద్దరు కుమార్తెలను బెడ్‌ నుంచి కిందకు లాగి ఒక వస్త్రంతో వారిని కట్టేశాడు. ఆ తర్వాత నిద్రిస్తున్న భార్య పూజా దేవిని కత్తితో పొడిచి హత్య చేశాడు.

కాగా, పదేళ్ల పెద్ద కుమార్తె శ్రీనిక ఇది చూసి తీవ్ర భయాందోళన చెందింది. పొరుగువారిని అలెర్ట్‌ చేసేందుకు ఆమె గట్టిగా అరిచింది. అయితే కుమార్తె ప్రయత్నాన్ని తండ్రి దశరథ్‌ అడ్డుకున్నాడు. ‘నీ తల్లి చనిపోయింది. నేను మరో కొత్త తల్లిని తీసుకువస్తా’ అని ఆమెతో అన్నాడు. కూతురికి నచ్చజెప్పేందుకు ప్రయత్నించాడు. అయితే తన తల్లి స్థానాన్ని మరొకరు భర్తీ చేయలేరని ఆ బాలిక తన తండ్రితో వాదించింది.

మరోవైపు కొంత సమయం తర్వాత దశరథ్‌ తన భార్య మృతదేహంపై దుప్పటి కప్పాడు. ఆ తర్వాత ఇద్దరు కుమార్తెలతో కలిసి స్థానిక పోలీస్ స్టేషన్‌కు చేరుకున్నాడు. పోలీసులకు అతడు లొంగిపోయాడు. అయితే తల్లిని హత్య చేసిన తండ్రికి కఠిన శిక్ష పడాలని అతడి కూతురు డిమాండ్‌ చేసింది. ఈ సంఘటనకు ముందు రాత్రి తన తల్లిదండ్రుల మధ్య గొడవ జరిగినట్లు పోలీసులకు చెప్పింది. ఆ బాలిక ఫిర్యాదుపై కేసు నమోదు చేసి దర్యాప్తు చేస్తున్నట్లు పోలీస్‌ అధికారి తెలిపారు.