Anganwadi Teacher | ఒక్కో అంగన్ వాడీ టీచర్ పోస్టుకు రూ.50 వేల నుంచి రూ.2 లక్షలు..!

Anganwadi Teacher | తొర్రూరు, నవంబర్ 21 : అంగన్వాడీ టీచర్ పోస్టుల భర్తీ ప్రక్రియలో అక్రమాలు చోటుచేసుకుంటున్నాయనే ఆరోపణలు మహబూబాబాద్ జిల్లా తొర్రూరు మండలంలో చర్చనీయాంశంగా మారాయి. నిరుద్యోగ మహిళలకు ఉపాధి కల్పించాల్సిన నియామక ప్రక్రియలో కొందరు అక్రమ వసూళ్లకు పాల్పడుతున్నారనే ఆరోపణలు కలకలం రేపుతున్నాయి. ఒక్కో అంగన్వాడీ టీచర్ పోస్టుకు రూ.50 వేల నుంచి రూ.2 లక్షల వరకు డబ్బులు వసూలు చేస్తున్నారనే ప్రచారం స్థానికంగా వినిపిస్తోంది.
తొర్రూరు మండల పరిధిలో మొత్తం 29 అంగన్వాడీ టీచర్ పోస్టులు భర్తీకి రాగా.. వీటి కోసం ఏకంగా 462 మంది అభ్యర్థులు దరఖాస్తు చేసుకున్నట్లు సమాచారం. అంటే ఒక్కో పోస్టుకు సుమారు 16 మంది పోటీ పడుతున్నారు. ఉద్యోగం వస్తుందనే ఆశతో ఎంతోమంది నిరుద్యోగ మహిళలు దరఖాస్తు చేసుకుని ఎదురుచూస్తున్నారు. అయితే ఇదే అవకాశాన్ని ఆసరాగా చేసుకుని కొందరు వ్యక్తులు అభ్యర్థుల నుంచి ముందస్తుగానే డబ్బులు వసూలు చేస్తున్నారనే ఆరోపణలు ఆందోళన కలిగిస్తున్నాయి.
ముందుగానే డబ్బులు.. ఉద్యోగం ఇప్పిస్తామంటూ హామీలు?
అంగన్వాడీ టీచర్ పోస్టు ఇప్పిస్తామంటూ కొందరు అభ్యర్థులను సంప్రదించి రూ.50 వేల నుంచి రూ.2 లక్షల వరకు డిమాండ్ చేస్తున్నారనే ఆరోపణలు వినిపిస్తున్నాయి. ఎంపిక ప్రక్రియలో తమకు అనుకూలంగా వ్యవహరించేలా క్లస్టర్ ఇన్చార్జిల నుంచి సీడీపీవో స్థాయి వరకు, అక్కడి నుంచి పైస్థాయి అధికారుల వరకు మేనేజ్ చేస్తున్నామంటూ కొందరు నమ్మబలుకుతున్నట్లు స్థానికులు ఆరోపిస్తున్నారు. అయితే ఈ ఆరోపణలకు సంబంధించి అధికారికంగా ఎలాంటి నిర్ధారణ వెలువడలేదు.
మెరిట్ ఆధారంగానే ఎంపిక చేయాలి..
ప్రభుత్వ ఉద్యోగాల భర్తీలో పారదర్శకత, నిబంధనలు, అర్హతలే ప్రామాణికంగా ఉండాలి. కానీ అంగన్వాడీ టీచర్ పోస్టుల ఎంపికలో డబ్బుల ప్రస్తావన రావడం నిరుద్యోగ మహిళల్లో ఆందోళనకు కారణమవుతోంది. అర్హత ఉన్నప్పటికీ డబ్బులు ఇవ్వలేని పేద కుటుంబాల మహిళలకు అన్యాయం జరిగే ప్రమాదం ఉందని స్థానికులు అభిప్రాయపడుతున్నారు. ఈ నేపథ్యంలో జిల్లా ఉన్నతాధికారులు వెంటనే స్పందించి తొర్రూరు మండలంలో అంగన్వాడీ టీచర్ పోస్టుల భర్తీ ప్రక్రియపై సమగ్ర విచారణ చేపట్టాలని స్థానికులు కోరుతున్నారు.
అభ్యర్థుల నుంచి ఎవరైనా డబ్బులు డిమాండ్ చేశారా..? వసూళ్లకు పాల్పడిన వ్యక్తులు ఎవరు..? అధికారుల పేర్లు చెప్పి ఎవరైనా మోసాలకు పాల్పడుతున్నారా..? అనే అంశాలపై నిష్పక్షపాతంగా విచారణ జరపాలని డిమాండ్ చేస్తున్నారు. 29 పోస్టుల భర్తీ ప్రక్రియలో ఎలాంటి రాజకీయ, ఆర్థిక ఒత్తిళ్లకు తావులేకుండా అర్హతలు, ప్రభుత్వ నిబంధనల ప్రకారం పారదర్శకంగా ఎంపికలు చేపట్టాలని కోరుతున్నారు. ఆరోపణలు నిజమని తేలితే బాధ్యులపై కఠిన చర్యలు తీసుకోవడంతోపాటు, బాధిత అభ్యర్థులకు న్యాయం చేయాలని స్థానికులు డిమాండ్ చేస్తున్నారు. నిరుద్యోగ మహిళల ఆశలను అక్రమ వసూళ్లకు వేదికగా మార్చకుండా అధికారులు ఇప్పటికైనా స్పందిస్తారా? లేక ఆరోపణల నడుమే ఎంపిక ప్రక్రియ ముగుస్తుందా..? అనేది వేచి చూడాల్సిందే..!
Read Also :
KTR | కేటీఆర్ చేతుల మీదుగా ‘ఏఐ కెన్ రైట్ ద కోడ్’ పుస్తకావిష్కరణ.. యువ ఇంజినీర్లకు నూతన దిశానిర్దేశం!
Comments (0)