Watch: అసదుద్దీన్ ఒవైసీని సుప్రీంకోర్టు జడ్జిగా పొరబడిన పోలీసులు.. గౌరవ వందనం సమర్పణ

లక్నో: ఏఐఎంఐఎం అధినేత, హైదరాబాద్ ఎంపీ అసదుద్దీన్ ఒవైసీని సుప్రీంకోర్టు న్యాయమూర్తిగా ఉత్తరప్రదేశ్ పోలీసులు పొరబడ్డారు. దీంతో ఆయనకు గౌరవ వందనం సమర్పించారు. (Asaduddin Owaisi) ఈ సంఘటనపై పోలీస్ ఉన్నతాధికారులు విచారణకు ఆదేశించారు. త్వరలో జరుగనున్న ఉత్తరప్రదేశ్ అసెంబ్లీ ఎన్నికల్లో కలిసి పోటీ చేయాలని ఆజాద్ సమాజ్ పార్టీ (కాన్షీరామ్), ఏఐఎంఐఎం నిర్ణయించాయి.
కాగా, శనివారం సంయుక్త మీడియా సమావేశం కోసం ఆజాద్ సమాజ్ పార్టీ (కాన్షీరామ్) అధినేత చంద్రశేఖర్ ఆజాద్, ఏఐఎంఐఎం అధినేత అసదుద్దీన్ ఒవైసీ కలిసి సహారన్పూర్ చేరుకున్నారు. అయితే అక్కడి సర్క్యూట్ హౌస్ను సుప్రీంకోర్టు న్యాయమూర్తి సందర్శించనుండటంతో పోలీసులు ‘గార్డ్ ఆఫ్ హానర్’ కోసం సిద్ధంగా ఉన్నారు. అదే సమయంలో అసదుద్దీన్ ఒవైసీ అనుకోకుండా అక్కడకు చేరుకోవడంతో ఆయనను సుప్రీంకోర్టు జడ్జిగా పోలీసులు పొరబడ్డారు. ఆయనకు గౌరవ వందనం సమర్పించారు. అసదుద్దీన్ ఒవైసీ కూడా లేచి నిల్చొని పోలీసుల గౌరవ వందనాన్ని స్వీకరించారు. ఈ వీడియో క్లిప్ సోషల్ మీడియాలో వైరల్ అయ్యింది.
మరోవైపు ఈ సంఘటనపై పోలీస్ ఉన్నతాధికారులు స్పందించారు. అధికారిక గౌరవ వందనం ఎవరి కోసం ఏర్పాటు చేశారో అన్నది గుర్తించడంలో జరిగిన లోపంపై విచారణకు ఆదేశించారు. ‘విచారణలో సేకరించిన వాస్తవాలు, సాక్ష్యాధారాల ఆధారంగా, నిబంధనల ప్రకారం చర్యలు తీసుకుంటాం’ అని సహారన్పూర్ ఎస్ఎస్పీ తెలిపారు.
Saharanpur, Uttar Pradesh: AIMIM chief Asaduddin Owaisi was given a Guard of Honour at the Circuit House instead of a Supreme Court judge, who was supposed to receive it https://t.co/osoxpkB8Gn
— IANS (@ians_india) November 21, 2026
Comments (0)