20న టై హైదరాబాద్‌ సదస్సు

హైదరాబాద్‌, నవంబర్‌ 10 : రాష్ట్ర రాజధాని హైదరాబాద్‌ వేదికగా మరో అంతర్జాతీయ సదస్సు జరుగబోతున్నది. ఈ నెల 20న హైదరాబాద్‌ ఎంటర్‌ప్రెన్యూర్‌షిప్‌ సమ్మిట్‌ను రాష్ట్ర ఐటీ, పరిశ్రమల శాఖల మంత్రి దుద్దిళ్ల శ్రీధర్‌బాబు ప్రారంభించనున్నారు. టై హైదరాబాద్‌ ఆధ్వర్యంలో జరుగనున్న ఈ సదస్సుకు 2 వేల మందికి పైగా పారిశ్రామికవేత్తలు, 120 మందికి పైగా పెట్టుబడిదారులు, 80 మందికి పైగా వక్తలు హాజరుకానున్నట్టు టై హైదరాబాద్‌ అధ్యక్షుడు మురళీ కాకర్ల తెలిపారు..

ఏఐ, రక్షణ రంగం, అంతరిక్ష మౌలిక సదుపాయాలు, క్విక్‌ కామర్స్‌, ఎస్‌ఎంఈ ఐపీవోలు తదితర అభివృద్ధి చెందుతున్న రంగాల గురించి ప్రధానంగా చర్చించనున్నట్టు చెప్పారు. పారిశ్రామికవేత్తలు, పెట్టుబడిదారులు, పరిశ్రమల ప్రముఖులను ఒకే వేదికపైకి తీసుకురావడంతో రాష్ట్రంలో వ్యాపార అవకాశాలపై అవగాహన పెంపొందించడంతోపాటు ఆవిష్కరణలు, ప్రపంచస్థాయి పెట్టుబడులను ఆకర్శించడానికి ఈ సదస్సు దోహదం చేయనున్నదన్నారు.