వీసీని తొలగించి విచారణ జరుపాలి
- మహిళల ఆత్మగౌరవాన్ని కాపాడండి
- పార్టీలు, సంఘాల నేతల డిమాండ్‌
- వ్యవసాయ వర్సిటీ వద్ద ధర్నాచౌక్‌లో బాధితురాలికి పలువురి సంఘీభావం
- న్యాయం జరిగేవరకు అండగా ఉంటాం : బీఆర్‌ఎస్‌ నేత కార్తీక్‌రెడ్డి
వ్యవసాయ యూనివర్సిటీ, నవంబర్‌ 12 : రాజేంద్రనగర్‌లోని ప్రొఫెసర్‌ జయశంకర్‌ తెలంగాణ వ్యవసాయ విశ్వవిద్యాలయం వీసీ అల్దాస్‌ జానయ్యను పదవి నుంచి తొలగించి, విచారణ జరుపాలని వివిధ పార్టీలు, పలు సంఘాల నేతలు రాష్ట్ర ప్రభుత్వాన్ని డిమాండ్‌ చేశారు. మహిళల ఆత్మగౌరవాన్ని కాపాడాలని, లేదంటే అధికార పక్షం కాలగర్భంలో కలిసిపోతుందని హెచ్చరించారు. గురువారం వ్యవసాయ విశ్వవిద్యాలయం కళాశాల ఎదుట ధర్నాచౌక్‌ వద్ద వీసీ జానయ్య లైంగిక వేధింపులకు గురైన మహిళా అసిస్టెంట్‌ ప్రొఫెసర్‌కు పెద్ద ఎత్తున పలువురు సంఘీభావం తెలుపుతూ మద్దతుగా నిరసనల్లో పాల్గొన్నారు. ఈ సందర్భంగా ఎమ్మెల్సీలు వీఎస్‌ఎన్‌ ఆర్ రెడ్డి, అంజిరెడ్డి మాట్లాడారు. వీసీ వేధింపుల వ్యవహారాన్ని అవసరమైతే జాతీయ స్థాయి కమిటీలతో విచారణ జరిపిస్తామని వారు చెప్పారు. వర్సిటీ మహిళా ప్రొఫెసర్లు ఆత్మ గౌరవం కోసం రోడ్డెక్కితే వారం రోజులైనా ఇప్పటికీ పట్టించుకోకపోవడం సీఎం రేవంత్‌రెడ్డి అసమర్థతకు నిదర్శనమని విమర్శించారు. వీసీ తన విధులకు ఎగనామం పెట్టి మహిళలపై లైంగిక వేధింపులపై ఎలాంటి ఆధారాలు అవసరం లేదని, బాధితురాలు తన మనసు చంపుకొని రోడ్డున పడ్డప్పుడే పోలీసులు ఎఫ్‌ఐఆర్‌ నమోదు చేసి విచారణ జరిపించాల్సి ఉన్నదని గుర్తుచేశారు.
ఉన్నత పదవికే అనర్హుడు : కార్తీక్‌రెడ్డి
వీసీ అల్దాస్‌ జానయ్య ఉన్నతస్థాయి పదవికే అనర్హుడని బీఆర్‌ఎస్‌ రాజేంద్రనగర్‌ నియోజకవర్గ ఇన్‌చార్జి కార్తీక్‌రెడ్డి స్పష్టంచేశారు. వీసీ చాంబర్‌లో ఎందుకు సీసీ పుటేజీ తప్పించారని మండిపడ్డారు. వీసీ జానయ్య వ్యవహరించిన తీరుపై సీఎం వెంటనే స్పందించి, చర్యలు చేపట్టకపోవడం విడ్డూరమని పేర్కొన్నారు. రాష్ట్రంలో మహిళలకు రక్షణ కరువైందని ఈ ఘటనే నిదర్శనమని పేర్కొన్నారు. యూనివర్సిటీని ఒక రహస్య స్థావరంగా మార్చారని మండిపడ్డారు. వీసీకి వత్తాసు పలికే బ్యాచ్‌.. వారి సొంత సోదరి ఇలాగే ఇన్నాళ్లు రోడ్డెక్కితే ఇలానే వ్యవహరిస్తా? అని ప్రశ్నించారు.
తమకు న్యాయం కావాలని శాంతియుతంగా పోరాడుతున్న మహిళలను వేధించడం, విద్యార్థులను బంధించడం, గేటు వద్ద రోజుకొకరు కాపలా కాయడం ఏ చట్టంలో ఉన్నదో తెలుపాలని మండిపడ్డారు. బాధితురాలి నిరసనకు బీఆర్‌ఎస్‌, ఏబీవీపీ, వర్సిటీ విద్యార్థులు, ప్రజాంఘాలు, అధ్యాపకులు, విద్యార్థిసంఘాల నాయకులు మద్దతు తెలిపారు. అరాచక వీసీని విధుల నుంచి తొలగించాలని విద్యార్థి సంఘాల నాయకులు రాజ్‌కుమార్‌, కృష్ణమూర్తి డిమాండ్‌ చేశారు. వంటావార్పు ఏర్పాటు చేసి రోజంతా అక్కడే బైటాయించారు. వీసీని వెంటనే బర్తరఫ్‌ చేసి బాధితురాలకి న్యాయం చేయాలని తెలంగాణ సైంటిస్ట్‌ అసోసియేషన్‌ (టాసా), విశ్వవిద్యాలయ టీచింగ్‌, నాన్‌ టీచింగ్‌, విద్యార్థి సంఘాల ఆధ్వర్యంలో ఆందోళన కొనసాగింది. కొందరు ఉన్నతాదికారులు గేటువద్ద ఉన్నా లెక్క చేయకుండా విద్యార్థులు పెద్ద ఎత్తున వచ్చి సంఘీభావం తెలిపారు.
Comments (0)