బ్రెయిన్‌ డంపింగ్‌ చేస్తారా!

ఎంతో సాధన చేస్తే తప్ప ఎవరికైనా మనసు ప్రశాంతంగా ఉండదు. దానికి తోడు ఒత్తిళ్లు, దీర్ఘకాలిక చికాకులు ఉంటే మనసు ఎప్పుడూ వాటి చుట్టూనే ప్రదక్షిణ చేస్తూ ఉంటుంది. అలా పదే పదే వెంటాడే ఆలోచనల్ని కట్టడి చేయకపోతే శరీరానికీ ముప్పుగా పరిణమిల్లే ప్రమాదం ఉంది. దీనికి ‘బ్రెయిన్‌ డంపింగ్‌’ ఓ చక్కని పరిష్కారం. దీన్ని మంచి అలవాటుగా మార్చుకుంటే ఆనందాన్ని సొంతం చేసుకోవచ్చు.

• తరచూ ఆలోచించడం ద్వారా సమస్యకు పరిష్కారాన్ని వెతుకుతున్నట్టుగా మనసు అనుకుంటుంది. లేదా పెండింగ్‌లో ఉన్న ప్రధానమైన విషయాన్ని గుర్తు చేస్తున్నట్టుగా భావిస్తుంది. నిజానికి ఇవేమీ అంత నిజాలు కావు. కాబట్టి మనసులో ఉన్నవన్నీ ఒక కాగితం మీద నచ్చినట్టు రాసేస్తే ఆ విషయం భద్రంగా ఉంది, ఒక కొలిక్కి వస్తుంది అన్న భావన కలుగుతుంది. దీన్నే బ్రెయిన్‌ డంపింగ్‌ అంటాం.
• ఇందుకోసం రోజూ ఒక సమయం పెట్టుకోవాలి. పని అయిపోయాక, లేదా నిద్రకు అరగంట ముందు మనం ఆరోజు సమస్యగా అనిపించినవన్నీ రాయాలి.
• తప్పకుండా కాగితం, పెన్నూ తీసుకొని రాయాలి. ఫోన్లు, ట్యాబ్‌లు వద్దు. వాటితో మనసు వేరే వాటి మీదకి మళ్లి రాసేదాని మీద శ్రద్ధ తగ్గుతుంది.
• మనసులో ఉన్నవన్నీ ఏమాత్రం వడపోయకుండా 5 నుంచి 10 నిమిషాల పాటు రాసుకోవాలి. అందులో అక్షర దోషాలు, వ్యాకరణం గురించి ఏమాత్రం పట్టించుకోనక్కర్లేదు.
• ఇది ఇలా చేసి ఉండొచ్చు అని మనసు వాదించే విషయాలు కూడా రాయండి. వాటితో పాటు రేపు చేయాల్సిన చిన్న పనులు, ఇతర చిన్న చిన్న చికాకుల్ని కూడా ప్రస్తావించండి.
• ఏమైనా చేయగలిగిన ఆలోచన వస్తే… నేరుగా క్యాలెండర్‌ తెరిచి ఫలానా అప్పుడు ఇలా చేయాలి అని ఆ డేట్‌ దగ్గర రాసేయండి. లేదూ ఏమీ తట్టకపోతే, ‘నేను వచ్చే గురువారం ఉదయం ఈ విషయాన్ని ఆలోచిస్తాను’ అని రాసుకోండి. ఇలా అన్నీ రాస్తూ ఉండటం వల్ల వెంటాడే ఆలోచనల పట్ల ఒక స్పష్టత వస్తుంది. దిగులును అనుభవించడం నుంచి దాన్ని గమనించడం వైపునకు మనం మళ్లుతాం. అలా నెమ్మదిగా వాటి నుంచి ఉపశమనం పొందగలుగుతాం.