నాగుల చవితి వేడుకల్లో ముస్లిం మహిళల పూజ‌లు

రుద్రంపూర్, నవంబర్ 13 : మతాలు వేరైనా మనుషుల మధ్య ఉండాల్సింది మానవత్వం. పరస్పర గౌరవం. సోదరభావమేనని చాటిచెప్పే అంద‌మైన దృశ్యం కొత్తగూడెంలో ఆవిష్కృతమైంది. నాగుల చవితి పర్వదినాన్ని పురస్కరించుకుని ముస్లిం మహిళలు నాగుపుట్టలో పాలు పోసి తమ భక్తిభావాన్ని చాటుకున్నారు. హిందూ సంప్రదాయంలో విశిష్టమైన స్థానమున్న నాగుల చవితి వేడుకల్లో ముస్లిం మహిళలు సైతం పాల్గొని పుట్ట వద్ద పూజా కార్యక్రమాలు నిర్వహించడం స్థానికుల దృష్టిని ఆకర్షించింది. కులమతాలకు అతీతంగా ఇతరుల ఆచారాలు, సంప్రదాయాలను గౌరవిస్తూ పండుగల్లో భాగస్వాములు కావడం భారతీయ సంస్కృతిలోని గొప్పతనానికి నిదర్శనంగా నిలిచింది. మత సామరస్యం, సోదరభావం, పరస్పర గౌరవం వెల్లివిరిసిన ఈ దృశ్యం పలువురిని ఆకట్టుకుంది. భిన్నత్వంలో ఏకత్వమే భారతదేశ ప్రత్యేకత అని చాటిచెప్పేలా ముస్లిం మహిళల భాగస్వామ్యం నిలిచింది.