Militants Open Fire On Vehicles | మణిపూర్‌లో రహదారిపై వెళ్తున్న వాహనాలపై మిలిటెంట్లు కాల్పులు.. నలుగురు మృతి

ఇంఫాల్‌: మణిపూర్‌లో జాతి హింస కొనసాగుతున్నది. ఇంఫాల్-ఉఖ్రుల్ రహదారిపై వెళ్తున్న రెండు వాహనాలపై మిలిటెంట్లు కాల్పులు జరిపారు. ఒక వాహనంలో ఉన్న తల్లీకుమారుడు, మరో వాహనంలో ప్రయాణించిన ఇద్దరు సోదరులు మరణించారు. (Militants Open Fire On Vehicles) శుక్రవారం ఇంఫాల్ వైపు ప్రయాణిస్తున్న రెండు వాహనాలను మిలిటెంట్లు లక్ష్యంగా చేసుకున్నారు. ‘న్యూ హేవన్’ వద్ద మెరుపుదాడికి పాల్పడి కాల్పులు జరిపారు. ఒక వాహనంలో ప్రయాణించిన తషార్ గ్రామానికి చెందిన తల్లి, కుమారుడైన ఆగస్ట్ నగాలుంగ్, ఖాన్మిలా ఈ కాల్పుల్లో మరణించారు. అలాగే మరో వాహనంలో వెళ్తున్న షాంగ్‌షాక్ గ్రామానికి చెందిన సోదరులైన కపాంగ్‌ఖుయ్ ఆర్‌ఎస్, హౌలీలా ఆర్‌ఎస్ కూడా కాల్పుల్లో చనిపోయారు.

కాగా, మణిపూర్‌ కాంగ్రెస్ లెజిస్లేచర్ పార్టీ (సీఎల్పీ) నేత కె. మేఘచంద్ర ఈ కాల్పుల సంఘటనను ఖండించారు. జాతి హింసను అరికట్టడంలో కేంద్ర, రాష్ట్ర ప్రభుత్వాలు విఫలమయ్యాయని విమర్శించారు. నాగా ప్రజలతో సహా వివిధ వర్గాల భద్రతపై ఆందోళన వ్యక్తం చేశారు. మణిపూర్‌లో మూడున్నరేళ్లకు పైగా హింస కొనసాగుతున్నప్పటికీ, కేంద్ర ప్రభుత్వం మౌనం వహించడాన్ని ఆయన ప్రశ్నించారు. ప్రజలకు భద్రత కల్పించడంలో, సాధారణ పరిస్థితులను పునరుద్ధరించడంలో విఫలమైన సీఎం ఖేమ్‌చంద్ నేతృత్వంలోని ప్రభుత్వం రాజీనామా చేయాలని డిమాండ్ చేశారు.