త్రోబాల్‌ చాంపియన్‌ అక్షిత తెలంగాణకే గర్వకారణం

• మున్ముందు మరిన్ని విజయాలు సాధించాలి
• బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ఆకాంక్ష

చందంపేట (దేవరకొండ), నవంబర్‌ 10: జాతీయ స్థాయి త్రోబాల్‌ పోటీల్లో స్వర్ణ పతకం సాధించిన నల్లగొండ జిల్లా చింతపల్లి మండలం చాకలిశేరిపల్లికి చెందిన అక్షిత తెలంగాణ రాష్ర్టానికే గర్వకారణమని బీఆర్‌ఎస్‌ పార్టీ వర్కింగ్‌ ప్రెసిడెంట్‌ కేటీఆర్‌ కొనియాడారు. తమిళనాడులోని కోయంబత్తూర్‌లో ఈ నెల 7న నిర్వహించిన జాతీయ స్థాయి త్రోబాల్‌ ఫైనల్‌ పోటీల్లో తెలంగాణ జట్టు తరఫున పాల్గొన్న అక్షిత అద్భుత ప్రతిభ కనబర్చి స్వర్ణ పతకాన్ని సాధించింది.

హైదరాబాద్‌కు చేరుకున్న ఆమె మంగళవారం దేవరకొండ మాజీ ఎమ్మెల్యే రమావత్‌ రవీంద్రకుమార్‌తో కలిసి కేటీఆర్‌ను మర్యాదపూర్వకంగా కలిశారు. ఈ సందర్భంగా కేటీఆర్‌ మాట్లాడుతూ.. జాతీయ స్థాయిలో సత్తాచాటిన అక్షిత మున్ముందు మరిన్ని విజయాలు సాధించాలని ఆకాంక్షించారు. ఈ నెల 19 నుంచి 23వరకు శ్రీలంకలో జరుగనున్న ఏషియన్‌ త్రోబాల్‌ చాంపియన్‌షిప్‌లో అక్షిత భారత్‌ తరఫున ప్రాతినిధ్యం వహించనున్నారు. కేటీఆర్‌ను కలిసిన వారిలో బీఆర్‌ఎస్‌ నాయకులు కంకణాల వెంకట్‌రెడ్డి, పీఏసీఎస్‌ చైర్మన్‌ పల్లా ప్రవీణ్‌రెడ్డి, దొంతం చంద్రశేఖర్‌రెడ్డి, సర్పంచ్‌ మాచర్ల శ్రీశైలం తదితరులు ఉన్నారు.