సునామీ కాదు.. సుపరిపాలన కావాలి

• మూడేండ్ల పాలనలో ప్రజలకు మిగిలింది నిరాశే
• జలాల వినియోగంపై శ్వేతపత్రం విడుదల చేయాలి
• శాసనమండలి ప్రతిపక్ష నేత మధుసూదనాచారి

హైదరాబాద్‌, నవంబర్‌ 10 (నమస్తే తెలంగాణ): ముఖ్యమంత్రి రేవంత్‌రెడ్డి సునామీ సృష్టిస్తామంటూ చేసిన వ్యాఖ్యలు గర్హనీయమని, ఆక్షేపణీయమని శాసనమండలిలో ప్రతిపక్ష నేత సిరికొండ మధుసూదనాచారి విమర్శించారు. ప్రజలు కాంగ్రెస్‌కు అధికారం ఇచ్చింది సునామీలు సృష్టించడానికి కాదని, సుపరిపాలన అందించేందుకని స్పష్టం చేశారు. సునామీ అంటే విధ్వంసం, వినాశనమని పేరొంటూ.. ఇప్పటికే మూడేండ్ల్ల పాలనలో ప్రజలకు ఎదురైంది విధ్వంసమేనని మంగళవారం ఒక ప్రకటనలో ఆరోపించారు.

కృష్ణా, గోదావరి జలాలను సద్వినియోగం చేసుకోవడంలో ప్రభుత్వం విఫలమైందని విమర్శించారు. ఆగస్టు నుంచి నవంబర్‌ వరకు వచ్చిన నీరు, దిగువకు వదిలిన నీరు, వినియోగించుకున్న జలాలు, ప్రాజెక్టులవారీగా అందించిన ఆయకట్టు వివరాలతో శ్వేతపత్రం విడుదల చేయాలని డిమాండ్‌ చేశారు. కాంగ్రెస్‌ పాలనలో మళ్లీ విద్యుత్తు కోతలు, పవర్‌ హాలిడేలు, ఇన్వర్టర్ల వినియోగం పెరుగుతున్నాయని విమర్శించారు.