ఖవాజా చెప్పేదంతా నాన్‌ సెన్స్‌

• శాండ్‌ పేపర్‌ కుట్ర జట్టు మొత్తానికి తెలుసన్న వ్యాఖ్యలపై కమిన్స్‌ ఆగ్రహం

సిడ్నీ: ఎనిమిదేండ్ల కిందట ప్రపంచ క్రికెట్‌ను కుదిపేసిన శాండ్‌పేపర్‌ గేట్‌ (బాల్‌ ట్యాంపరింగ్‌) వివాదం ఆస్టేల్రియా క్రికెట్‌లో మరోసారి ప్రకంపనలు రేపుతోంది. 2018లో దక్షిణాఫ్రికాతో జరిగిన కేప్‌టౌన్‌ టెస్టులో బంతి స్వరూపాన్ని మార్చే కుట్ర జట్టులోని అందరికీ తెలుసని సీనియర్‌ బ్యాటర్‌ ఉస్మాన్‌ ఖవాజా తన ఆత్మకథలో చేసిన ఆరోపణలను ఆస్టేల్రియా కెప్టెన్‌ పాట్‌ కమిన్స్‌ ఖండించాడు. ఖవాజా చెప్పేదంతా నాన్‌సెన్స్‌ అంటూ కొట్టిపారేశాడు. శుక్రవారం ఇంగ్లండ్‌తో తొలి వన్డేకు కొన్ని గంటల ముందు సిడ్నీ క్రికెట్‌ గ్రౌండ్‌లో కమిన్స్‌ అనూహ్యంగా మీడియా సమావేశం ఏర్పాటు చేశాడు. ఖవాజా ఆరోపణలను తోసిపుచ్చుతూ..

ఈ వివాదానికి ఇక్కడితో ముగింపు పలకాలనుకుంటున్నానని స్పష్టం చేశాడు. కేప్‌టౌన్‌ టెస్టులో డ్రెస్సింగ్‌రూమ్‌లో ఉన్న ప్రతి ఒక్కరికీ శాండ్‌పేపర్‌ పథకం తెలుసని ఖవాజా పేర్కొనడం అత్యంత బాధ్యతారహితమని కమిన్స్‌ ఆగ్రహం వ్యక్తం చేశాడు. ‘శాండ్‌పేపర్‌ వాడేటప్పుడు జాగ్రత్తగా ఉండాలని బ్యాన్‌క్రాఫ్ట్‌కు చెప్పానని ఉస్మాన్‌ ఒప్పుకున్నట్టు తెలియగానే నేను నిజంగానే దిగ్భా్రంతికి గురయ్యా. కొన్నిసార్లు ఎలాగైనా గెలవాలనే ధోరణిలో ఉన్న జట్టు సంస్కృతిని మార్చడంలో ఖవాజా కీలక పాత్ర పోషించాడు. కానీ ఇప్పుడు మాట్లాడుతున్నది నాకు తెలిసిన ఉస్మాన్‌ కాదు’ అని కమిన్స్‌ వ్యాఖ్యానించాడు. మరోవైపు ఖవాజా వ్యాఖ్యలకు మాజీ ఓపెనర్‌ డేవిడ్‌ వార్నర్‌ సోషల్‌ మీడియా వేదికగా బహిరంగ మద్దతు ప్రకటించాడు.