ఉక్రెయిన్పై విరుచుకుపడ్డ రష్యా

- 400కుపైగా డ్రోన్లు, వందకు పైగా క్షిపణులతో దాడి
కీవ్: ఉక్రెయిన్పై రష్యా విరుచుకుపడింది. 400కుపైగా డ్రోన్లు, 110కుపైగా క్షిపణులను ప్రయోగించిందని, వీటిలో 27 బాలిస్టిక్ క్షిపణులని ఉక్రెయిన్ అధ్యక్షుడు జెలెన్స్కీ తెలిపారు. దాడుల్లో కనీసం ఎనిమిది మంది పౌరులు మరణించగా, రెండు డజన్లకుపైగా గాయపడ్డారని కొన్ని క్షిపణుల్లో విశాల ప్రాంతంలో డజన్ల కొద్దీ చిన్న బాంబులను వెదజల్లే క్లస్టర్ వార్హెడ్లు ఉన్నాయని తెలిపారు. ఉక్రెయిన్పై దాడుల క్రమంలో రష్యాకు చెందిన ఖెచ్-101 క్షిపణి శుక్రవారం పోలండ్లో పడింది.
ఉక్రెయిన్లో యుద్ధానంతర సైనిక మిషన్కు సిద్ధమవుతున్న యూరోపియన్ దళాల కసరత్తుల సమయానికే ఈ ఘటన జరగడం ఉద్దేశపూర్వక రెచ్చగొట్టుడు చర్య అయి ఉండవచ్చని పోలండ్ ప్రధాని డొనాల్డ్ టస్క్ అన్నారు. రష్యా ఉక్రెయిన్పై దాదాపు ఐదేండ్లుగా పూర్తి స్థాయి దండయాత్రతో ప్రారంభించిన యుద్ధాన్ని ముగించేందుకు అమెరికా మధ్యవర్తిత్వంలో చర్చలకు వేగం పెంచే ప్రయత్నాలు చేస్తున్న సమయంలో ఈ ఘటన యూరప్, రష్యా మధ్య ఉద్రిక్తతలను మరింత పెంచింది. ‘ఇది రష్యా ఉద్దేశపూర్వకంగా చేసిన రెచ్చగొట్టుడు చర్యగా కనిపిస్తున్నది’ అని టస్క్ చెప్పారు. ఉక్రెయిన్ సరిహద్దుకు సుమారు 60 కిలోమీటర్ల దూరంలో ఖెచ్-101 క్షిపణి పడిందని పోలండ్ రక్షణ శాఖ తెలిపింది.
ఉక్రెయిన్కు నిధులివ్వొద్దు.. యూరప్ దేశాలకు ట్రంప్ సూచన
ఉక్రెయిన్కు యుద్ధం కోసం నిధుల సాయం నిలిపివేయాలని అమెరికా అధ్యక్షుడు డొనాల్డ్ ట్రంప్ యూరప్ దేశాలను కోరినట్టు ది ఇండిపెండెంట్ కథనం వెల్లడించింది. రష్యా అధ్యక్షుడు పుతిన్తో మాట్లాడిన కొన్ని గంటలకే ట్రంప్ యూరప్ నేతలతో ఫోన్లో మాట్లాడినట్టు ఇండిపెండెంట్ కథనం తెలిపింది. రష్యా శాంతి ఒప్పందానికి సిద్ధంగా ఉందని, సాయం ఆపేస్తే బిలియన్ డాలర్ల ఖర్చు ఆదా అవడంతో పాటు వేలాదిమంది ప్రాణాలను కాపాడొచ్చని ట్రంప్ చెప్పినట్టు కథనం పేర్కొన్నది. అయితే ఉక్రెయిన్కు సాయం నిలిపివేయాలని ట్రంప్ నేరుగా ఆదేశించలేదని అమెరికా అధికారులు చెప్పారు. యుద్ధాన్ని ముగించాలన్న తన ఆకాంక్షనే ట్రంప్ వ్యక్తం చేశారని వారు వివరించారు. చైనాలో పుతిన్, జిన్పింగ్తో సమావేశం తర్వాత ట్రంప్ యూరప్ నేతలకు ఫోన్ చేయడం చర్చనీయాంశంగా మారింది.
Comments (0)