అగ్రి వీసీపై ఆగ్రహం

• నిష్పక్షపాతంగా విచారణ జరపాలి: విశారదన్‌ మహారాజ్‌ డిమాండ్‌

వ్యవసాయ యూనివర్సిటీ , నవంబర్‌ 13 : సీఎం ప్రత్యేక చొరవ తీసుకుని వ్యవసాయ విశ్వవిద్యాలయం వీసీపై విచారణ జరిపించాలని ఎస్సీ, ఎస్టీ , బీసీ రాష్ట్ర నేత విశారదన్‌ మహారాజ్‌ డిమాండ్‌ చేశారు. వ్యవసాయ విశ్వవిద్యాలయం కళాశాల ముందు ధర్నాచౌక్‌ చేరుకొని బాధిత ప్రొఫెసర్‌కు మద్దతు తెలిపారు. ఈ సందర్భంగా ఆయన మాట్లాడుతూ బాధితురాలు ఫిర్యాదు చేసిన వెంటనే పోలీసులు ఎఫ్‌ఐఆర్‌ చేసి విచారణ జరపాల్సి ఉండేదన్నారు. ప్రభుత్వం నిష్పక్ష పాతంగా విచారణ జరిపించి.. వీసీ జానయ్యను అరెస్టు చేయాలన్నారు.

రాష్ట్రంలో రెండేండ్ల కాలంలో క్రైం, పోక్సో, మహిళలపై దాడులు పెరిగిపోయాయని రాజేంద్రనగర్‌ బీఆర్‌ఎస్‌ నియోజకవర్గ ఇన్‌చార్జీ కార్తిక్‌రెడ్డి ఆందోళన వ్యక్తం చేశారు. యూనివర్సిటీలో ఉద్రిక్తత పరిస్థితులు నెలకొంటున్నా ఎవరూ పట్టించుకోవడం లేదన్నారు. వీసీ తన ఇష్టానుసారంగా వ్యవహరిస్తున్నారని కార్తిక్‌రెడ్డి అన్నారు. కాగా, పలు సంఘాల నేతలు, విద్యార్థి నాయకులను పోలీసులు అరెస్టు చేసి వివిధ స్టేషన్‌కు తరలించారు. అనంతరం సొంత పూచీకత్తుపై విడుదల చేశారు.