ఏడాది గరిష్ఠానికి వాణిజ్య లోటు

• అక్టోబర్‌లో భారీగా పెరిగిన దిగుమతులు

న్యూఢిల్లీ, నవంబర్‌ 13: గత నెల అక్టోబర్‌లో దేశ వాణిజ్య లోటు ఏడాది గరిష్ఠాన్ని తాకుతూ 39.88 బిలియన్‌ డాలర్లుగా నమోదైంది. సరుకుల దిగుమతులు రికార్డు స్థాయిలో 89.35 బిలియన్‌ డాలర్లకు చేరగా, ఎగుమతులు 49.47 బిలియన్‌ డాలర్లకే పరిమితమయ్యాయి మరి. నిరుడు అక్టోబర్‌లో వాణిజ్య లోటు 42.58 బిలియన్‌ డాలర్లుగా ఉన్నది. మళ్లీ ఆ తర్వాత ఇప్పుడే ఆ దరిదాపుల్లోకి వాణిజ్య లోటు వెళ్లింది. కాగా, నాడు దిగుమతులు 76.69 బిలియన్‌ డాలర్లుగా ఉంటే, ఈసారి అంతకుమించే జరుగడం గమనార్హం. పండుగ సీజన్‌ దృష్ట్యానే దిగుమతులు పెద్ద ఎత్తున జరిగాయన్న అంచనాలున్నాయి. దేశం నుంచి విదేశాలకు వెళ్లే వస్తూత్పత్తుల ఎగుమతుల కంటే.. విదేశాల నుంచి దేశంలోకి వచ్చే వస్తూత్పత్తుల దిగుమతులు ఎక్కువగా ఉంటే వాణిజ్య లోటుగా పిలుస్తారన్న సంగతి విదితమే.

బంగారం దిగుమతుల సెగ

గత నెల దేశంలోకి పసిడి దిగుమతులు భారీగా పెరిగాయి. మునుపటితో పోల్చితే మూడింతలయ్యాయి. సెప్టెంబర్‌లో 1.8 బిలియన్‌ డాలర్లుగానే ఉండగా, అక్టోబర్‌లో ఏకంగా 5.51 బిలియన్‌ డాలర్లను తాకాయి. పెండ్లిళ్ల సీజన్‌తోపాటు ధన త్రయోదశి, దీపావళి తదితర పండుగల నేపథ్యంలో అటు వ్యాపారులు, ఇటు కొనుగోలుదారులు పుత్తడి కొనుగోళ్లను పెంచారని మార్కెట్‌ విశ్లేషకులు చెప్తున్నారు. మరోవైపు దేశీయ ఇంధన అవసరాలు దాదాపు 90 శాతం.. ముడి చమురు దిగుమతుల ద్వారానే తీరుతుండటం కూడా వాణిజ్య లోటుకు దారితీస్తున్నది. ఈ అక్టోబర్‌లో పెట్రోలియం ఉత్పత్తుల దిగుమతులు నిరుటితో పోల్చితే 54.31 శాతం ఎగబాకి 22.82 బిలియన్‌ డాలర్లకు చేరాయి. అమెరికా, ఇజ్రాయెల్‌-ఇరాన్‌ యుద్ధంతో మిడిల్‌ ఈస్ట్‌లో నెలకొన్న ఉద్రిక్తతలు.. అంతర్జాతీయ మార్కెట్‌లో క్రూడాయిల్‌ రేట్లను పరుగులు పెట్టిస్తున్నాయి. ఇది సహజంగానే భారత్‌ వంటి దేశాల దిగుమతులను భారం చేస్తున్నది. ఒకానొక దశలో బ్యారెల్‌ ముడి చమురు ధర 120 డాలర్లను దాటినది తెలిసిందే.

ఏప్రిల్‌-అక్టోబర్‌లో

ఈ ఏడాది ఏప్రిల్‌-అక్టోబర్‌లో వస్తు ఎగుమతులు 309.06 బిలియన్‌ డాలర్లుగా నమోదయ్యాయి. క్రితం ఏడాది ఇదే కాలంతో పోల్చితే ఇవి దాదాపు 22 శాతం పెరిగాయి. దిగుమతులు కూడా 16 శాతం పెరిగి 527.21 బిలియన్‌ డాలర్లకు చేరాయి. దీంతో ఈ ఏడు నెలల వాణిజ్య లోటు 218.15 బిలియన్‌ డాలర్లుగా నిలిచింది. అయితే అక్టోబర్‌లో సేవల ఎగుమతులు 15 శాతం పెరిగి 40.51 బిలియన్‌ డాలర్లుగా ఉన్నాయని శుక్రవారం వాణిజ్య శాఖ అంచనా వేసింది. దిగుమతులు దాదాపు 17 శాతం పెరిగి 20.72 బిలియన్‌ డాలర్లకు చేరాయని తెలిపింది. ఫలితంగా 19.79 బిలియన్‌ డాలర్ల మిగులు వాణిజ్యం నమోదైనట్టు తేలింది. దీంతో వస్తు, సేవల ఎగుమతులు కలిపి ప్రస్తుత ఆర్థిక సంవత్సరం (2026-27)లో 1 ట్రిలియన్‌ (1,000 బిలియన్లు) డాలర్లకు చేర్చాలన్న ప్రభుత్వ లక్ష్యం సాధనకు ఎగుమతుల బలమైన వృద్ధి దోహదం చేయగలదని ఆర్థిక నిపుణులు చెప్తున్నారు. కాగా, వస్తు ఎగుమతుల వృద్ధితో స్థూల దేశీయోత్పత్తి (జీడీపీ)లో వాటి వాటా కూడా పెరిగింది. గత మూడు ఆర్థిక సంవత్సరాల్లో ఎగుమతుల వాటా వరుసగా తగ్గిన విషయం తెలిసిందే. 2023-24, 2024-25 ఆర్థిక సంవత్సరాల్లో ప్రపంచ డిమాండ్‌ మందగించడం, 2025-26 ఆర్థిక సంవత్సరంలో భారతీయ వస్తువులపై అమెరికా భారీ సుంకాలు విధించడమే కారణం. ఇక ఈ ఆర్థిక సంవత్సరం తొలి త్రైమాసికం (ఏప్రిల్‌-జూన్‌)లో ఎగుమతులు దేశ జీడీపీలో 14 శాతంగా ఉన్నాయి. అంతకుముందు మూడేండ్లు వరుసగా 12.5 శాతం, 11.7 శాతం, 11.3 శాతంగానే ఉన్నాయి.