అండాల అక్రమ దందా

• సద్గురు హెల్త్‌కేర్‌ సెంటర్‌ నిర్వాహకుల అరెస్టు
• రిమాండ్‌ రిపోర్టులో కీలక విషయాలు వెల్లడి

నాంపల్లి క్రిమినల్‌ కోర్టులు, నవంబర్‌ 13 (నమస్తే తెలంగాణ) /బంజారాహిల్స్‌: నగరంలో సంచలనం సృష్టించిన అక్రమ అండాల సేకరణ కేసులో జిల్లా వైద్య ఆరోగ్య శాఖాధికారి డాక్టర్‌ పుట్ల శ్రీనివాస్‌ ఫిర్యాదు మేరకు మలక్‌పేటలోని ‘ సద్గురు హెల్త్‌కేర్‌ సర్వీసెస్‌ ప్రై.లి. నిర్వాహకులు డాక్టర్‌ దుర్గారావుతో పాటు అమిత్‌శర్మ, నిఖత్‌ పర్వీన్‌, దీపిక, డైరెక్టర్లను అరెస్టు చేశారు. నిబంధనలకు విరుద్ధంగా అక్రమంగా అండాల సేకరణకు ఆరు సెంటర్లను ఏర్పాటు చేసినట్టు పేర్కొన్నారు.

కాగా, రిమాండ్‌ రిపోర్టులో కీలక విషయాలు వెల్లడయ్యాయి. ఆర్థిక ఇబ్బందుల్లో ఉన్న నిరుపేద యువతులను, మహిళలను పశ్చిమ బెంగాల్‌, ఉత్తరప్రదేష్‌, బీహార్‌, మహారాష్ట్ర వంటి ఇతర రాష్ర్టాల నుంచి హైదరాబాద్‌కు తరలించి మలక్‌పేటలోని సదరు కేంద్రం ద్వారా అండాలను సేకరించినట్టు వాంగ్మూలం నమోదు చేశారు. అక్రమంగా అండాలను సేకరించేందుకు ప్రవీణ్‌ అనే నిందితుడు వందకు పైగా నకిలీ ఆధార్‌ కార్డులను, పుట్టినతేదీ పత్రాలను సృష్టించినట్టు పేర్కొన్నారు. పరిమితికి మించి ఎక్కువ అండాలు రావడం కోసం మహిళలకు సరైన వైద్య పర్యవేక్షణ లేకుండానే ప్రమాదకరమైన హర్మోన్‌ ఇంజెక్షన్లు, మందులు వాడినట్టు ఆధారాలు కోర్టుకు సమర్పించారు.

ఇండోర్‌కు చెందిన అమిత్‌శర్మ ప్రధాన సూత్రధారిగా ఈ దందాను నడిపించి కోట్ల రూపాయలు దండుకుని అక్రమ వ్యాపారం చేసినట్టు తేలింది. ఈ దందా నడుపుతున్న అమిత్‌శర్మ, నిఖత్‌ పర్వీన్‌, ఏజెంట్లు రేష్మాఖాతూన్‌, పంకజ్‌సోనీ, మేఘవత్‌ శ్రీనివాస్‌ అలియాస్‌ సోను, జెప్రే ప్రదీప్‌, ఎమిరిశెట్టి దుర్గాప్రసాద్‌, ప్రవీణ్‌, విజయ్‌ భగవాన్‌రావు సాలుంకే, దీపికలను అరెస్టు చేశారు. సెక్షన్లు 125, 143(2),(3), 271, 272, 318(4), 61(2), 111 ఆఫ్‌ బీఎన్‌ఎస్‌, 33(2), 34 ఏఆర్‌టీ యాక్టు 2021కింద మలక్‌పేట పోలీసు అధికారులు కేసు నమోదు చేశారు. దుర్గాప్రసాద్‌, ప్రవీణ్‌, మహ్మద్‌ షేక్‌, క్రాంతికుమార్‌, నవ్యశ్రీలను విచారించాల్సి ఉన్నదని రిమాండ్‌ రిపోర్టులో వివరించారు.

ఇప్పటివరకు 66 మంది మహిళలు అండాలను దానం చేసినట్టు అధికారులు గుర్తించారు. హుమొగ్‌ హెచ్‌.పి 150 (మొనోట్రోఫిన్‌) హర్మోన్‌ ఇంజక్షన్లను జప్తు చేశారు. 5రోజుల పోలీసు కస్టడీలో మరింత లోతైన సమాచారం సేకరించేందుకు అధికారులు చర్యలు చేపడుతున్నారు. కాగా, జూబ్లీహిల్స్‌ పీఎస్‌ పరిధిలోని ఒయాసిస్‌ ఫెర్టిలిటీ సెంటర్‌తో పాటు ఫిలింనగర్‌ పీఎస్‌ పరిధిలోని సినార్‌ కాలనీలోని ఒయాసిస్‌ ఫెర్టిలీ సెంటర్స్‌లో అక్రమ దందా నడుస్తోందంటూ జిల్లా వైద్యాధికారి ఇచ్చిన ఫిర్యాదులతో రెండు కేసులు నమోదయ్యాయి.