రేవంత్‌కు ప్రజల చేతిలో బెల్ట్‌ ట్రీట్‌మెంట్‌

• సీఎం ధ్యాసంతా భూముల అమ్మకంపైనే
• కేసీఆర్‌పై కక్షతోనే కాళేశ్వరంపై పనిగట్టుకొని నిర్లక్ష్యం
• బరాజ్‌లు లేకుంటే నీళ్లెత్తరాదంటున్న అజ్ఞానపు సీఎం
• బర్రెలు కాసేవాడినంటూ అవమానించడం ఆక్షేపణీయం
• ఎల్బీనగర్‌ ఎమ్మెల్యే దేవిరెడ్డి సుధీర్‌రెడ్డి ఆగ్రహం

హైదరాబాద్‌, నవంబర్‌ 9 (నమస్తే తెలంగాణ) : రానున్న రోజుల్లో హైదరాబాద్‌లో తాగునీటి సమస్య వస్తే కాంగ్రెస్‌ సర్కార్‌కు ప్రజలే బెల్ట్‌ ట్రీట్‌మెంట్‌ ఇస్తారని ఎల్బీనగర్‌ ఎమ్మెల్యే దేవిరెడ్డి సుధీర్‌రెడ్డి హెచ్చరించారు. వాస్తవాలు చెప్పిన రిటైర్డ్‌ ఇంజినీర్లకు బెల్ట్‌ ట్రీట్‌మెంట్‌ ఇస్తానని ముఖ్యమంత్రి రేవంత్‌రెడ్డి బెదిరించడం దుర్మార్గమని మండిపడ్డారు. సీఎం రేవంత్‌రెడ్డికి ముందస్తు ప్రణాళికలేక రాష్ట్రానికి తీరని అన్యాయం జరుగుతున్నదని, కరెంటు, సాగు, తాగునీరు అందించడంలో ఘోరంగా విఫలమయ్యారని విమర్శించారు.

సోమవారం ఆయన తెలంగాణ భవన్‌లో మీడియాతో మాట్లాడుతూ.. కన్నెపల్లి, మేడిగడ్డ బరాజ్‌ వద్దకు పోయిన తనతోపాటు బీఆర్‌ఎ నేతలపై సీఎం నోటికొచ్చినట్టు మాట్లాడుతున్నారని ఆగ్రహం వ్యక్తంచేశారు. ముఖ్యమంత్రి రేవంత్‌రెడ్డి పాలన గాలికొదిలి భూముల అమ్మకాలు, ఆస్తులు కూడబెట్టుకోవడంపైనే శ్రద్ధచూపుతున్నారని విమర్శించారు. నీళ్లను దిగువకు వదులుతూ, నిధులను ఢిల్లీకి పంపుతూ.. కేసీఆర్‌, కేటీఆర్‌, హరీశ్‌రావుపై వ్యక్తిగత విమర్శలకు దిగుతూ పబ్బం గడుపుకొంటున్నారని దుయ్యబట్టారు. బర్రెలు కాసేవాడంటూ తనను అవమానించడం ఆక్షేపణీయమని పేర్కొన్నారు. సీఎం చేసిన వ్యాఖ్యలపై తనకు ఎలాంటి బాధా లేదని, ఇప్పటినుంచి తన ఫోన్‌లో అదే ఫొటో పెట్టుకుంటానని స్పష్టంచేశారు.

తెలంగాణకు తీరని అన్యాయం

రేవంత్‌రెడ్డి అవగాహనారాహిత్యం, మి డిమిడి జ్ఞానంతో తెలంగాణకు తీరని అన్యా యం జరుగుతున్నదని దేవిరెడ్డి సుధీర్‌రెడ్డి పేర్కొన్నారు. బరాజ్‌లు లేకుండా నీళ్లు ఎలా ఎత్తుతారని ప్రశ్నించడం శోచనీయమని అన్నారు. దేవాదుల, సమ్మక్కసాగర్‌, సీతారామసాగర్‌, పట్టిసీమ వద్ద బరాజ్‌లను ఉపయోగించకుండా నీళ్లెత్తడంలేదా? అని ప్రశ్నించారు. కన్నెపల్లి వద్ద 93.5 మీటర్ల ప్రవాహం ఉన్నప్పుడు నీళ్లు ఎత్తిపోసే అవకాశం ఉన్నా దిగువకు వదిలిపెట్టారని ఆరోపించారు. ఎన్డీఎస్‌ఏ సైతం నీళ్లను ఎత్తుకోవచ్చని చెప్పిందని, కానీ, రేవంత్‌రెడ్డి ప్రజలను తప్పుదోవపట్టిస్తున్నారని దుయ్యబట్టారు. నీళ్లను దిగువకు వదిలి కరువు తెచ్చారని విమర్శించారు. కన్నెపల్లి పంప్‌హౌస్‌ వద్దకు వెళ్లకుండా బీఆర్‌ఎస్‌ ఎమ్మెల్యేలను అడ్డుకున్నారని ఆరోపించారు. మేడిగడ్డ వద్ద శబ్దం వచ్చిందని రైతులు చెప్పారని, దీని వెనుక కుట్ర ఉన్నదేమోనని అనుమానం వ్యక్తంచేశారు. సీఎం హోదాలో రేవంత్‌రెడ్డి స్థాయి మరచి మాట్లాడటం సిగ్గుచేటని విమర్శించారు. ప్రజా సమస్యలపై నిలదీస్తే సమాధానం చెప్పడం చేతగాక కేటీఆర్‌ గడ్డాన్ని అడ్డంపెట్టుకొని చిల్లర రాజకీయాలు చేస్తున్నారని దుయ్యబట్టారు.