రేవంత్‌ అవినీతిపై విచారణ జరుపాలి

21 November 2026 - 03:00
0 0
రేవంత్‌ అవినీతిపై విచారణ జరుపాలి
Vemula Prashanth Reddy
  • సొంత పార్టీ నేతలూ  సీఎం అవినీతిపై ప్రశ్నిస్తున్నరు
  • కేసీఆర్‌, కేటీఆర్‌, హరీశ్‌రావును తిట్టడం కోసమే  సీఎం సభలు 
  • కేసీఆర్‌పై విమర్శలంటే ఆకాశం వైపు ఉమ్మివేయడమే
  • అమరుల కుటుంబాలను ఆదుకొన్న ఘనత కేసీఆర్‌దే
  • మాజీ మంత్రి, ఎమ్మెల్యే ప్రశాంత్‌రెడ్డి

హైదరాబాద్‌, నవంబర్‌ 20 (నమస్తే తెలంగాణ) : సీఎం రేవంత్‌రెడ్డితోపాటు ఆయన కుటుంబ సభ్యులపై, ప్రభుత్వంపై వచ్చిన అవినీతి ఆరోపణలపై హైకోర్టు సిట్టింగ్‌ జడ్జితో విచారణ జరిపించాలని మాజీ మంత్రి, బాల్కొండ ఎమ్మెల్యే వేముల ప్రశాంత్‌రెడ్డి డిమాండ్‌ చేశారు. ఇవే అవినీతి ఆరోపణలపై ఆయన సొంత పార్టీ నేతలే ప్రశ్నిస్తున్నారని గుర్తుచేశారు. హైదరాబాద్‌ తెలంగాణ భవన్‌లో శుక్రవారం ఆయన మీడియాతో మాట్లాడారు. ఎమ్మెల్యే రాజగోపాల్‌రెడ్డి సీఎం రూ.5 లక్షల కోట్ల భూకుంభకోణానికి పాల్పడ్డారని ఆరోపించిన విషయాన్ని ప్రస్తావించారు. సిమెంట్‌ రోడ్ల నిర్మాణంలో 20 శాతం కమీషన్లు వసూలు చేస్తున్నారని అదే పార్టీకి చెందిన మరో ఎమ్మెల్యే అనిరుధ్‌రెడ్డి ఆరోపించారని చెప్పారు.

రేవంత్‌రెడ్డి రూ.50 కోట్లిచ్చి పీసీసీ అధ్యక్ష పదవిని కొనుగోలు చేశారని మంత్రి వెంకట్‌రెడ్డి సైతం గతంలో వ్యాఖ్యానించిన విషయాన్ని గుర్తుచేశారు. ప్రతిపక్షంతోపాటు సొంత పార్టీ నాయకులూ ఇన్ని ఆరోపణలు చేస్తున్నప్పుడు వాటిపై విచారణ జరిపించాల్సిన బాధ్యత ముఖ్యమంత్రిపై ఉన్నదని పేర్కొన్నారు. విచారణకు సిద్ధపడినప్పుడే అవినీతి గురించి మాట్లాడే నైతిక అర్హత ఉంటుందని స్పష్టంచేశారు. కేసీఆర్‌ రాజకీయ ప్రస్థానాన్ని రేవంత్‌ వెన్నుపోటుగా చిత్రీకరించడాన్ని తీవ్రంగా ఖండించారు. నాడు చంద్రబాబు పాలనలో తెలంగాణ రైతులపై విద్యుత్‌ చార్జీల భారం మోపిన సందర్భంలో ప్రత్యేక రాష్ట్రం అవసరమని గట్టిగా నినదించిన నాయకుడు కేసీఆర్‌ అని, అది వెన్నుపోటు కాదని, తెలంగాణ ప్రజల ఆకాంక్షల కోసం చేసిన తిరుగుబాటు అని స్పష్టం చేశారు.

ప్రజాధనంతో సభలు.. ప్రతిపక్షంపై తిట్ల దండకం?

ప్రజాధనంతో సభలు నిర్వహిస్తూ ప్రతిపక్ష నేతలను తిట్టడం మినహా ఈ మూడేండ్లలో రేవంత్‌ ప్రభుత్వం సాధించిందేందనిని వేముల ప్రశాంత్‌రెడ్డి ప్రశ్నించారు. కేసీఆర్‌, కేటీఆర్‌, హరీశ్‌రావుపై వ్యక్తిగత విమర్శలు చేయడమే లక్ష్యంగా సభలు నిర్వహిస్తున్నారని విమర్శించారు. కేసీఆర్‌, హరీశ్‌రావు కృషితో సిద్దిపేట అభివృద్ధిలో ప్రత్యేక గుర్తింపు పొందిందని తెలిపారు. సిద్దిపేట ప్రజల గుండెల్లో కేసీఆర్‌, హరీశ్‌రావుకు శాశ్వత స్థానం ఉన్నదని, వారి సేవలను ప్రజలు మరిచిపోరని తెలిపారు. మాజీ మంత్రి హరీశ్‌రావు రాజకీయ ప్రస్థానం ఒకే పార్టీతో కొనసాగిందని, పదవుల కోసం పార్టీలు మారిన చరిత్ర ఆయనకు లేదని ప్రశాంత్‌రెడ్డి స్పష్టంచేశారు.

అమరుల కుటుంబాలను ఆదుకొన్నదే కేసీఆర్‌

తెలంగాణ రాష్ట్రం ఏర్పడిన తర్వాత కేసీఆర్‌ ప్రభుత్వం అమరవీరుల కుటుంబాలకు అండగా నిలిచిందని ప్రశాంత్‌రెడ్డి గుర్తుచేశారు. గుర్తించిన అమరవీరుల కుటుంబాలకు రూ.10 లక్షల ఆర్థికసాయం అందించడంతోపాటు, కుటుంబంలో ఒకరికి ప్రభుత్వ ఉద్యోగం కల్పించామని వివరించారు.అమరవీరుల కుటుంబాలకు చేసిన సహాయాన్ని రాజకీయ ప్రచారం కోసం ఉపయోగించుకోవద్దని కేసీఆర్‌ సూచించేవారని, అందుకే తాము చేసిన సేవలను బహిరంగంగా ప్రచారం చేసుకోలేదని స్పష్టంచేశారు.

సీఎం మానసిక స్థితి సరిగా లేనట్టుంది

సీఎం రేవంత్‌రెడ్డి మానసిక స్థితి సరిగా లేనట్టుగా ఉన్నదని వేముల ప్రశాంత్‌రెడ్డి పేర్కొన్నారు. సిరిసిల్లకు వెళ్లినప్పుడు అక్కడ కాంగ్రెస్‌ ఎమ్మెల్యేను గెలిపిస్తే మంత్రి పదవి ఇస్తానని చెప్పాడని, నిన్న సిద్దిపేటలో కాంగ్రెస్‌ అభ్యర్థిని గెలిపిస్తే మంత్రి పదవి ఇస్తానని హామీలు ఇచ్చారని గుర్తుచేశారు. ఇప్పుడున్న క్యాబినెట్‌లో ఖాళీగా ఉన్న మంత్రి పదవులను నింపాలంటేనే రేవంత్‌ జంకుతున్నారని తెలిపారు. మూడేండ్లయినా ఇంకా మూడు మంత్రి పదవులు నింపడానికి చేతకాని సీఎం.. రెండేండ్ల తర్వాత జరిగే ఎన్నికల్లో సిరిసిల్ల, సిద్దిపేటలో గెలిస్తే మంత్రి పదవులు ఇస్తానని తుపాకి రాముడి మాటలు చెప్తున్నారని ఎద్దేవా చేశారు.

శంకరమ్మ విషయంలో ద్వంద్వవైఖరి

అమరవీరుడు శ్రీకాంతాచారి తల్లి శంకరమ్మను పకన పెట్టుకొని రేవంత్‌రెడ్డి రాజకీయాలు చేయడంపై ప్రశాంత్‌రెడ్డి అభ్యంతరం వ్యక్తం చేశారు. శంకరమ్మకు 2014 శాసనసభ ఎన్నికల్లో బీఆర్‌ఎస్‌ పార్టీ ఆమెకు టికెట్‌ ఇచ్చి బరిలో నిలిపిందని గుర్తుచేశారు. అదే ఎన్నికల్లో కాంగ్రెస్‌ పార్టీ ఉత్తమ్‌కుమార్‌రెడ్డిని అభ్యర్థిగా నిలబెట్టిందని పేరొన్నారు. అమరవీరుల కుటుంబాలపై నిజమైన ప్రేమ ఉంటే శంకరమ్మకు ఆనాడు కాంగ్రెస్‌ ఎందుకు అవకాశం ఇవ్వలేదని ప్రశ్నించారు. సమావేశంలో మాజీ ఎమ్మెల్యే పద్మా దేవేందర్‌రెడ్డి, పార్టీ నాయకుడు బొమ్మెర రామ్మూర్తి పాల్గొన్నారు.

సీఎం రేవంత్‌వి మళ్లీ డైవర్షన్‌ పాలిటిక్స్‌!

  • మాజీ కార్పొరేషన్‌ చైర్మన్‌ కేతిరెడ్డి

హైదరాబాద్‌, నవంబర్‌ 20 (నమస్తే తెలంగాణ) : రాష్ట్రంలో ఓవైపు పాలన పడకేయగా, మరోవైపు కరువు తాండవిస్తున్న సమయలో సీఎం రేవంత్‌రెడ్డి డైవర్షన్‌ పాలిటిక్స్‌కు తెర లేపారని కార్పొరేషన్‌ మాజీ చైర్మన్‌ కేతిరెడ్డి వాసుదేవరెడ్డి మండిపడ్డారు.

01

సిద్దిపేట సభలో సీఎం ఏం మాట్లాడుతారోనని ప్రజలు ఎదురుచూస్తుంటే.. ఆయ న మాత్రం కేసీఆర్‌ కుటుంబాన్ని లక్ష్యం గా చేసుకున్నారని ఆగ్రహం వ్యక్తంచేశారు. తెలంగాణభవన్‌లో శుక్రవారం ఆయన మీడియాతో మాట్లాడారు. శంకరమ్మకు 2014లో కేసీఆర్‌ బీఆర్‌ఎస్‌ టికెట్‌ ఇస్తే.. ఆమెపై ఉత్తమ్‌కుమార్‌రెడ్డి పోటీ చేసిన విషయాన్ని గుర్తుచేశారు.

ఉద్యమంపై మాట్లాడే అర్హతే లేదు

  • బీఆర్‌ఎస్‌ నేత మన్నె గోవర్ధన్‌రెడ్డి

హైదరాబాద్‌, నవంబర్‌ 20(నమస్తే తెలంగాణ): ఉద్యమ సమయం లో తుపాకీ పట్టుకుని తిరిగిన రేవంత్‌రెడ్డికి ఆ ఉద్యమం గురించి మాట్లాడే అర్హత ఎక్కడిది? అని బీఆర్‌ఎస్‌ సీనియర్‌ నాయకుడు మన్నె గోవర్ధన్‌రెడ్డి ప్రశ్నించారు.

02

అమరవీరుడి తల్లిని రాజకీయాలకు వాడుకుంటున్న నీచమైన చరిత్ర రేవంత్‌రెడ్డిది అని పేర్కొన్నారు. శ్రీకాంతాచారి తల్లి శంకరమ్మ కుటుంబానికి కేసీఆర్‌ అన్ని విధాలా అండగా నిలిచినట్టు తెలిపారు.

రేవంత్‌రెడ్డిది కపటప్రేమ

  • నాయకుడు రాజారామ్‌యాదవ్‌

హైదరాబాద్‌, నవంబర్‌ 20(నమ స్తే తెలంగాణ): అమరవీరుల కు టుంబాలపై సీఎం రేవంత్‌రెడ్డిది కపట ప్రేమ అని బీఆర్‌ఎస్‌ నాయుడు రాజారామ్‌ యాదవ్‌ విమర్శించారు.

02

నాడు తెలంగాణ ఉద్యమకారులపై తుపాకీ ఎక్కుపెట్టిన చరిత్ర రేవంత్‌రెడ్డిదేనని గుర్తుచేశారు. ఉద్యమంలో అమరవీరుల చావులకు కారణం కాంగ్రెస్‌ కాదా? అని ప్రశ్నించారు.

హరీశ్‌రావుపై పోటీ చేసే దమ్ముందా?

  • బీఆర్‌ఎస్‌ నేత గట్టు సవాల్‌

హైదరాబాద్‌, నవంబర్‌ 20 (నమస్తే తెలంగాణ): సీఎం రేవంత్‌రెడ్డి సిద్దిపేటలో నిర్వహించిన సభ అట్టర్‌ఫ్లాప్‌ అయిందని బీఆర్‌ఎస్‌ నేత గట్టు రాంచందర్‌రావు విమర్శించారు. తెలంగాణభవన్‌లో శుక్రవారం బీఆర్‌ఎస్‌ నా యకులు బొమ్మెర రామ్మూర్తి, వీ మాధవ్‌తో కలిసి మీడియాతో మాట్లాడారు. సిద్దిపేట సభలో శంకరమ్మను పక్కన నిలబెట్టి రేవంత్‌ అబద్ధాలు చెప్పారని మండిపడ్డారు. శంకరమ్మను అన్ని విధాలా కేసీఆర్‌ గౌరవించారని, ఆమెకు టికెట్‌ ఇస్తే ఓడించింది కాంగ్రెస్‌ కాదా? అని ప్రశ్నించారు. అమరవీరులకు నివాళులు అర్పించని రేవంత్‌ వారి గురించి మాట్లాడటం విడ్డూరంగా ఉన్నదని అన్నారు.

Comments (0)

User