మూసీ ప్రాజెక్టుపై ప్రభుత్వానికి నోటీసులు

19 November 2026 - 01:30
0 0
మూసీ ప్రాజెక్టుపై ప్రభుత్వానికి నోటీసులు
Musi
  • ఎన్‌జీటీలో విచారణ.. డిసెంబర్‌ 3కు వాయిదా

సిటీబ్యూరో, నవంబర్‌ 18 (నమస్తే తెలంగాణ) : మూసీ రివర్‌ ఫ్రంట్‌ ప్రాజెక్టు పర్యావరణ అనుమతులపై పలు అనుమానాలు వ్యక్తం అవుతున్నాయి. సర్కార్‌ మాత్రం మూసీ ప్రాజెక్టుకు అనుమతులు వచ్చాయంటూ బుకాయిస్తుండటంపై సామాజిక కార్యకర్తలు ఆందోళన వ్యక్తం చేస్తున్నారు. పిటిషనర్‌ బాబురావు దాఖలు చేసిన అప్పీల్‌ నం. 50/2026 ఈ నెల 3న విచారణ జరగగా, ప్రభుత్వానికి నోటీసులు జారీచేసి, కేసును డిసెంబర్‌ 3కు వాయిదా వేసింది. మూసీ నది పునరుజ్జీవం, సుందరీకరణ లక్ష్యంగా రాష్ట్ర ప్రభుత్వం ఈ రివర్‌ ఫ్రంట్‌ ప్రాజెక్టును చేపట్టింది. దీనికి ఇచ్చిన పర్యావరణ అనుమతులతో జీవావరణాన్ని దెబ్బతీసే ఈ ప్రాజెక్టుపై పర్యావరణవేత్తలు ఆందోళన వ్యక్తం చేస్తున్నారు.

ఈ క్రమంలో పర్యావరణవేత్త బాబురావు పిటిషన్‌ దాఖలు చేయగా, ప్రతివాదిగా ఉన్న ప్రభుత్వానికి నోటీసులు జారీ చేయాలని ట్రిబ్యునల్‌ ఆదేశించింది. ప్రాజెక్టుకు ఇచ్చిన పర్యావరణ అనుమతిని సవాలు చేస్తూ అనుమతి మంజూరు ప్రక్రియను ట్రిబ్యునల్‌ ముందు ప్రశ్నిస్తున్నారు. ఈ ఉత్తర్వు వెలువడి రెండు వారాలకుపైగా అయిన నేపథ్యంలో, కొన్ని మీడియా సంస్థలు స్టే ఇవ్వడానికి ట్రిబ్యునల్‌ నిరాకరించిందంటూ కథనాలు ప్రచురించాయి. అయితే అధికారిక ఉత్తర్వులో స్టే అంశం ప్రస్తావనే లేదని బాబురావు స్పష్టం చేశారు. ఆ ఉత్తర్వులో కేవలం నోటీసులు, కౌంటర్ల దాఖలు, వాయిదాకు సంబంధించిన ప్రక్రియపై ఉత్తర్వులు మాత్రమేనని, ప్రాజెక్టుకు అనుకూలంగా గాని, వ్యతిరేకంగా గాని ఎలాంటి వ్యాఖ్యలు లేవన్నారు. ఉత్తర్వు ఎన్‌జీటీ వెబ్‌సైట్‌లో అందుబాటులో ఉందన్నారు. కేసు తదుపరి విచారణ డిసెంబర్‌ 3న జరగనున్నది. ఆ రోజు ప్రతివాదుల జవాబులను పరిశీలించిన అనంతరం ట్రిబ్యునల్‌ తదుపరి చర్యలు చేపట్టే అవకాశం ఉందని స్పష్టం చేశారు.

Comments (0)

User