NTR | ఎన్టీఆర్ ‘గాడ్ ఆఫ్ వార్’పై క్లారిటీ.. నిర్మాత‌ల‌తో త్రివిక్ర‌మ్ క్రేజీ పిక్, రూమర్స్‌కు చెక్ ప‌డ్టట్లే..!

NTR | టాలీవుడ్‌లో ప్రస్తుతం భారీ అంచనాలు నెలకొల్పిన ప్రాజెక్టుల్లో మ్యాన్ ఆఫ్ మాసెస్ ఎన్టీఆర్ హీరోగా తెరకెక్కనున్న ‘గాడ్ ఆఫ్ వార్’ ఒకటి. మాటల మాంత్రికుడు త్రివిక్రమ్ శ్రీనివాస్ దర్శకత్వంలో రూపొందనున్న ఈ సినిమా ప్రకటన వచ్చినప్పటి నుంచే అభిమానుల్లో ఆసక్తి పెరిగింది. భారీ బడ్జెట్‌తో, విభిన్నమైన కథాంశంతో ఈ చిత్రాన్ని తెరకెక్కించేందుకు సన్నాహాలు జరుగుతున్నాయి. అయితే గత కొంతకాలంగా ఈ ప్రాజెక్ట్ విషయంలో పలు రకాల వార్తలు సోషల్ మీడియాలో చక్కర్లు కొడుతున్నాయి. ముఖ్యంగా దర్శకుడు త్రివిక్రమ్, నిర్మాణ సంస్థ హారికా హాసిని క్రియేషన్స్ మధ్య విభేదాలు వచ్చాయని, ఆయన ఈ సినిమా నుంచి తప్పుకున్నారనే ప్రచారం అభిమానులను కలవరపెట్టింది. తాజాగా మేకర్స్ విడుదల చేసిన ఓ ఫొటోతో ఈ వార్తలకు చెక్ పడినట్లయింది.

ఎన్టీఆర్, త్రివిక్రమ్ శ్రీనివాస్ కాంబినేషన్‌లో సినిమా వస్తుందంటే సహజంగానే అంచనాలు భారీగా ఉంటాయి. గతంలో వీరిద్దరి కలయికలో వచ్చిన ‘అరవింద సమేత వీర రాఘవ’ ప్రేక్షకులను ఆకట్టుకుంది. ఇప్పుడు మరోసారి ఈ క్రేజీ కాంబినేషన్‌లో సినిమా రూపొందనుండటంతో నందమూరి అభిమానులు ఎంతో ఆసక్తిగా ఎదురుచూస్తున్నారు. ‘గాడ్ ఆఫ్ వార్’ పేరుతో ప్రచారంలో ఉన్న ఈ ప్రాజెక్ట్‌ను భారీ స్థాయిలో తెరకెక్కించేందుకు ప్రణాళికలు సిద్ధమవుతున్నాయి. హారికా హాసిని క్రియేషన్స్, ఎన్టీఆర్ ఆర్ట్స్ సంస్థల సంయుక్త నిర్మాణంలో చినబాబు, నందమూరి కల్యాణ్ రామ్ ఈ చిత్రాన్ని నిర్మించనున్నారు.

అయితే ఈ సినిమా విషయంలో ఇటీవల కొన్ని ఊహించని ప్రచారాలు తెరపైకి వచ్చాయి. త్రివిక్రమ్ శ్రీనివాస్, హారికా హాసిని క్రియేషన్స్ మధ్య ఏవో విభేదాలు తలెత్తాయని, దీంతో ఆయన ఈ ప్రాజెక్ట్ నుంచి తప్పుకున్నారనే వార్తలు వినిపించాయి. అంతేకాకుండా సినిమా నిర్మాణంలో కూడా కొన్ని మార్పులు చోటుచేసుకోబోతున్నాయనే ప్రచారం జరిగింది.ఈ వార్తలతో ఎన్టీఆర్ అభిమానుల్లో కొంత ఆందోళన నెలకొంది. ఇంతటి క్రేజీ ప్రాజెక్ట్ ప్రారంభానికి ముందే ఇలాంటి సమస్యలు ఎందుకు వస్తున్నాయంటూ సోషల్ మీడియాలో చర్చలు జరిగాయి. తాజాగా చిత్ర బృందం విడుదల చేసిన ఓ ఫొటో ఈ ప్రచారాలకు సమాధానంగా నిలిచింది. ఎన్టీఆర్, త్రివిక్రమ్ శ్రీనివాస్‌తో పాటు నిర్మాతలు చినబాబు, కల్యాణ్ రామ్ కలిసి దిగిన ఫొటోను మేకర్స్ పంచుకున్నారు. ఈ ఫొటోలో నలుగురూ ఎంతో సంతోషంగా కనిపించడం విశేషం. దీంతో త్రివిక్రమ్ ఈ ప్రాజెక్ట్ నుంచి తప్పుకున్నారనే ప్రచారానికి బలం లేదని అభిమానులు భావిస్తున్నారు. అలాగే హారికా హాసిని, ఎన్టీఆర్ ఆర్ట్స్ కలయికలోనే సినిమా కొనసాగనుందని స్పష్టమవుతోంది. ఇక ఈ భారీ చిత్రానికి కోలీవుడ్ సెన్సేషన్ అనిరుధ్ రవిచందర్ సంగీతం అందించనున్నట్లు సమాచారం. ఇప్పటికే ఎన్టీఆర్ సినిమాలకు అనిరుధ్ అందించిన సంగీతంపై అభిమానుల్లో మంచి అంచనాలు ఉన్నాయి. ఈ నేపథ్యంలో త్రివిక్రమ్ టేకింగ్, ఎన్టీఆర్ మాస్ ఇమేజ్‌కు అనిరుధ్ సంగీతం తోడైతే సినిమా మరో స్థాయిలో ఉండబోతుందని ఫ్యాన్స్ భావిస్తున్నారు.