త్రివిక్రమ్‌ దర్శకత్వంలో సినిమా?

మెగాస్టార్‌ చిరంజీవి, మాటల మాంత్రికుడు త్రివిక్రమ్‌ కాంబినేషన్‌లో సినిమా వస్తే చూడాలన్నది మెగాభిమానుల చిరకాల కోరిక. ఈ అరుదైన కలయిక కార్యరూపం దాల్చే అవకాశాలున్నాయని ఫిల్మ్‌నగర్‌లో వార్తలు వినిపిస్తున్నాయి. ఆ దిశగా ఇప్పటికే ప్రయత్నాలు మొదలయ్యాయని సమాచారం. ప్రముఖ నిర్మాణ సంస్థ డీవీవీ ఎంటర్‌టైన్‌మెంట్స్‌ త్రివిక్రమ్‌తో సినిమా కోసం చాన్నాళ్ల క్రితమే ఒప్పందం చేసుకుందని, ఇప్పుడా కమిట్‌మెంట్‌ను ఉపయోగించి చిరు-త్రివిక్రమ్‌ కాంబినేషన్‌లో సినిమా తెరకెక్కించేందుకు ప్రయత్నాలు జరుగుతున్నాయని ఫిల్మ్‌నగర్‌ టాక్‌.

అయితే ఈ సినిమా పట్టాలెక్కడం అంత సులభం కాదని, అందుకు చాలా అంశాలు అనుకూలించాలనే అభిప్రాయాలు కూడా వ్యక్తమవుతున్నాయి. ప్రస్తుతం త్రివిక్రమ్‌ ‘గాడ్‌ ఆఫ్‌ వార్‌’ సినిమా సన్నాహాల్లో ఉన్నారు. ఎన్టీఆర్‌ కథానాయకుడిగా నటించనున్న ఈ సినిమా స్క్రిప్ట్‌ వర్క్‌ కూడా పూర్తయింది. ఒకవేళ చిరంజీవితో సినిమా చర్చలు ముందుకుసాగితే ఎన్టీఆర్‌ ప్రాజెక్ట్‌ షెడ్యూల్‌లో మార్పులు జరిగే అవకాశం ఉందని అంటున్నారు. అయితే చిరు-త్రివిక్రమ్‌ కాంబో తాలూకు వార్తలన్నీ కేవలం ఊహాగానాలేనా? ఇందులో ఏమైనా వాస్తవం ఉందా అనే విషయాల్లో స్పష్టత రావాలంటే చిత్రబృందం నుంచి అధికారిక ప్రకటన రావాల్సిందే.