తాగునీటి కొరత నివారణకు చర్యలేవి?

• ఎల్‌ నినోను ఎదుర్కొనేందుకు ఏం చర్యలు తీసుకున్నరో చెప్పండి
• రాష్ట్రానికి హైకోర్టు ఆదేశం

హైదరాబాద్‌, నవంబర్‌ 12 (నమస్తే తెలంగాణ): ఎల్‌ నినో నేపథ్యంలో రాష్ట్రవ్యాప్తంగా తాగునీటి కొరత రాకుండా ఏం చర్యలు తీసుకుంటున్నరో వివరాలతో అఫిడవిట్‌ దాఖలు చేయాలని రాష్ట్ర ప్రభుత్వానికి హైకోర్టు గురువారం ఆదేశాలు జారీ చేసింది. ఎల్‌ నినో మానవ నిర్మిత సంక్షోభం కాదని, దీనిపై ప్రభుత్వాన్ని నిందించలేమని పేర్కొన్నది. అయితే, ప్రజలకు నీటి కొరత తలెత్తకుండా అనుసరిస్తున్న ప్రణాళికపై అఫిడవిట్‌ దాఖలు చేయాలని ఆదేశిస్తూ విచారణను డిసెంబర్‌ 9కి వాయిదా వేసింది.

ఎల్‌ నినో సందర్భంగా ఏర్పడే కరవు నివారణకు ప్రణాళిక ప్రకారం చర్యలు తీసుకునేలా ఆదేశాలు జారీ చేయాలంటూ డాక్టర్‌ చెరుకు సుధాకర్‌, కే శ్రవణ్‌కుమార్‌ ప్రజాహిత వ్యాజ్యం దాఖలు చేశారు. దీనిపై తాతాలిక ప్రధాన న్యాయమూర్తి జస్టిస్‌ పీ శ్యాంకోశీ, జస్టిస్‌ సుద్దాల చలపతిరావుతో కూడిన ధర్మాసనం గురువారం విచారణ చేపట్టింది. పిటిషనర్‌ తరఫు సీనియర్‌ న్యాయవాది చికుడు ప్రభాకర్‌ వాదనలు వినిపిస్తూ .. రాష్ట్రంలో తాగునీటి అవసరాలకు సుమారు 409 టీఎంసీల నీళ్లు అవసరం ఉండగా ప్రస్తుతం 209 టీఎంసీలు మాత్రమే అందుబాటులో ఉన్నాయని చెప్పారు.

కాళేశ్వరంలో భాగమైన మేడిగడ్డ, సుందిళ్ల, అన్నారం బరాజ్‌లకు మరమ్మతులు చేయకపోవడంతో నీటి సంక్షోభం మరింత ఎకువైందని వివరించారు. కరవు పరిస్థితులపై నిర్దిష్ట గడువులోగా శాస్త్రీయ పద్ధతుల్లో అంచనా వేసి, విపత్తు నిర్వహణ చట్టం కింద ప్రణాళికను రూపొందించాల్సిన అవసరం ఉన్నదని, దీనికి అనుగుణంగా ప్రత్యేక అధికారులను నియమించేలా ఆదేశాలివ్వాలని కోరారు. వాదనలను విన్న ధర్మాసనం తాగునీటి కొరత రాకుండా తీసుకుంటున్న చర్యలపై అఫిడవిట్‌ దాఖలు చేయాలని ప్రభుత్వాన్ని ఆదేశించింది.