రూ.2,200 తగ్గిన పుత్తడి

న్యూఢిల్లీ, నవంబర్‌ 12: బంగారం ధరలు శాంతించాయి. దేశీయంగా, అంతర్జాతీయ మార్కెట్లో అతి విలువైన లోహాలకు డిమాండ్‌ పడిపోవడంతో ధరలు దిగొస్తున్నాయి. దీపావళి నుంచి తగ్గుతూ వచ్చిన పుత్తడి గురువారం ఏకంగా రూ.2 వేలకు పైగా తగ్గింది. న్యూఢిల్లీ బులియన్‌ మార్కెట్లో 99.9 శాతం స్వచ్ఛత కలిగిన పదిగ్రాముల గోల్డ్‌ ధర ఏకంగా రూ.2,200 తగ్గి రూ.1,43,400కి దిగొచ్చింది. అంతకుముందు ఇది రూ.1,45,600గా ఉన్నది.

కొనుగోళ్లపై ఆసక్తి తగ్గడం, అంతర్జాతీయంగా ధరలు తగ్గడం బంగారంపై ఒత్తిడిని మరింత పెంచిందని హెచ్‌డీఎఫ్‌సీ సెక్యూరిటీస్‌ సీనియర్‌ అనలిస్ట్‌ సౌమిల్‌ గాంధీ తెలిపారు. పసిడి ధరలు భారీగా పడిపోయినప్పటికి వెండి మాత్రం యథాతథంగా కొనసాగుతున్నది. కిలో వెండి ధర రూ.1,87,500 వద్ద ఉన్నది. అనూహ్యంగా డాలర్‌కు డిమాండ్‌ నెలకొనడంతో గ్లోబల్‌ మార్కెట్లో ఔన్స్‌ గోల్డ్‌ ధర 39.93 డాలర్లు లేదా ఒక్క శాతం తగ్గి 3,950 డాలర్లకు పడిపోయిందని, అలాగే వెండి 1.17 శాతం తగ్గి 51 డాలర్ల వద్ద ఉన్నది.