డీలర్‌ షాపు కేటాయింపులో డబ్బుల వసూళ్లు.. అలంపూర్‌ మార్కెట్‌ యార్డ్‌ వైస్‌ చైర్మన్‌ అక్రమాలపై చర్చ!

జోగులాంబ గద్వాల జిల్లా అలంపూర్ నియోజకవర్గ పరిధిలో రేషన్ డీలర్ షాపు కేటాయింపు వ్యవహారం వివాదాస్పదంగా మారింది. మనోపాడు మండలంలోని డీలర్ షాప్ కేటాయింపులో డబ్బుల వసూళ్లకు పాల్పడ్డారంటూ అలంపూర్ మార్కెట్ యార్డ్ వైస్ చైర్మన్ పచ్చర్లకుమార్‌పై ఆరోపణలు వెల్లువెత్తుతున్నాయి. అధికార పార్టీ అండదండలు, అలంపూర్‌ మాజీ ఎమ్మెల్యే సంపత్‌ కుమార్‌ మద్దతు తనకు ఉందనే ధీమాతోనే ఆయన ఈ వ్యవహారంలో జోక్యం చేసుకున్నారనే ప్రచారం స్థానికంగా చర్చనీయాంశమైంది.

డీలర్‌ షాపు కేటాయింపునకు సంబంధించి ఆర్డర్‌ కాపీ వచ్చిన తర్వాత కూడా సదరు కేటాయింపును రద్దు చేసినట్లు సమాచారం. అనంతరం మనోపాడు మండల అధ్యక్షుడి ఆధ్వర్యంలో మరొకరికి షాపును కేటాయించినట్లు ఆరోపణలు వినిపిస్తున్నాయి. ఈ పరిణామాల వెనుక పచ్చర్ల కుమార్‌ పాత్ర ఉందనే విమర్శలు వ్యక్తమవుతున్నాయి.

ఈ వ్యవహారంపై పచ్చర్ల కుమార్‌ మాట్లాడినట్లు ప్రచారంలో ఉన్న మాటలు మరింత చర్చకు దారితీశాయి. “నేను ఉన్నాను కదా! నీకేం భయం లేదు. మాజీ ఎమ్మెల్యే సంపత్‌ కుమార్‌ కూడా ఉన్నారు” అంటూ పచ్చర్లకుమార్ భరోసా ఇచ్చినట్లు సమాచారం. అయితే డబ్బుల వసూళ్ల ఆరోపణలకు సంబంధించి పూర్తి వివరాలు, ఆధారాలు ఇంకా వెలుగులోకి రావాల్సి ఉంది.