Amitabh Bachchan | అమితాబ్ బచ్చన్ ఇంటికి బాంబు బెదిరింపు.. రంగంలోకి పోలీసు బృందాలు!

Amitabh Bachchan | మహారాష్ట్రలోని ముంబై, పుణె నగరాల్లో వరుస బాంబు బెదిరింపులు తీవ్ర కలకలం రేపాయి. బాలీవుడ్ సూపర్‌స్టార్ అమితాబ్ బచ్చన్ నివాసం ‘జల్సా’తో పాటు ముంబై విమానాశ్రయం, మేయర్ కార్యాలయం, బ్యాంకులు, న్యాయస్థానాలను పేల్చివేస్తామంటూ గుర్తుతెలియని వ్యక్తుల నుంచి ఈ-మెయిళ్లు రావడంతో భద్రతా యంత్రాంగం అప్రమత్తమైంది. పుణె మున్సిపల్ కార్పొరేషన్ (పీఎంసీ) ప్రధాన కార్యాలయానికీ ఇదే తరహా బెదిరింపు రావడంతో పోలీసులు, బాంబు నిర్వీర్య బృందాలు రంగంలోకి దిగాయి. అయితే బాలీవుడ్ దిగ్గజ నటుడు అమితాబ్ బచ్చన్ ముంబైలోని నివాసం ‘జల్సా’కు బాంబు బెదిరింపు రావడం ఈ ఘటనలో ప్రధానంగా చర్చనీయాంశమైంది. అంతేకాకుండా ముంబై విమానాశ్రయం, మేయర్ కార్యాలయం, పలు బ్యాంకులు, న్యాయస్థానాలను లక్ష్యంగా చేసుకుని పేలుళ్లు జరుపుతామంటూ ఈ-మెయిల్ సందేశాలు పంపినట్లు సమాచారం.

ఈ బెదిరింపుల నేపథ్యంలో ఆయా ప్రాంతాల్లో పోలీసులు భద్రతను కట్టుదిట్టం చేశారు. బాంబు నిర్వీర్య బృందాలు, డాగ్ స్క్వాడ్‌లతో విస్తృతంగా తనిఖీలు నిర్వహించారు. ముఖ్యమైన ప్రాంతాల్లో ఎలాంటి అవాంఛనీయ ఘటనలు చోటుచేసుకోకుండా ముందస్తు జాగ్రత్తలు తీసుకున్నారు. ముంబైలోని పంజాబ్ నేషనల్ బ్యాంక్ (పీఎన్‌బీ) జోనల్ కార్యాలయం, దక్షిణ ముంబైలోని జవేరీ బజార్ శాఖ, కొలాబాలోని లోకల్ క్రైమ్ బ్రాంచ్‌కు గురువారం ఉదయం 10.52 గంటలకు బెదిరింపు ఈ-మెయిల్ అందినట్లు తెలుస్తోంది. ఆ సందేశంలో మధ్యాహ్నం 1.11 గంటలకు పీఎన్‌బీ శాఖలో బాంబు పేలుడు సంభవిస్తుందని హెచ్చరించినట్లు సమాచారం. దీంతో బ్యాంకు పరిసరాల్లో భద్రతా చర్యలు చేపట్టిన అధికారులు, అనుమానాస్పద వస్తువుల కోసం తనిఖీలు నిర్వహించారు. ఖాతాదారులు, సిబ్బంది భద్రతకు అవసరమైన చర్యలు తీసుకున్నారు.

ఈ బెదిరింపు ఈ-మెయిళ్లలో ఖలిస్థాన్ ఉద్యమానికి సంబంధించిన ప్రస్తావనలు ఉన్నట్లు సమాచారం. దీంతో భద్రతా సంస్థలు ఈ అంశాన్ని కూడా తీవ్రంగా పరిగణిస్తున్నాయి. బెదిరింపుల వెనుక ఎవరు ఉన్నారు? ఎక్కడి నుంచి ఈ-మెయిళ్లు పంపించారు? వాటి ఉద్దేశం ఏమిటి? అనే కోణాల్లో దర్యాప్తు చేపట్టే అవకాశం ఉంది. ముంబైతో పాటు పుణె నగరంలోని మున్సిపల్ కార్పొరేషన్ ప్రధాన కార్యాలయాన్ని కూడా పేల్చివేస్తామంటూ బెదిరింపు రావడంతో అక్కడి అధికారులు అప్రమత్తమయ్యారు. పోలీసు బృందాలు కార్యాలయానికి చేరుకుని తనిఖీలు చేపట్టాయి. ఉద్యోగులు, సందర్శకుల భద్రతను దృష్టిలో ఉంచుకుని జాగ్రత్తలు తీసుకున్నారు. అయితే ముంబై, పుణెలోని ఆయా ప్రాంతాల్లో తనిఖీలు నిర్వహించినప్పటికీ ఎక్కడా అనుమానాస్పద వస్తువులు లభించలేదు. దీంతో ప్రాథమికంగా ఈ బెదిరింపులు మాములువేనని అధికారులు భావిస్తున్నారు. అయినప్పటికీ వాటిని తేలికగా తీసుకోకుండా ఈ-మెయిళ్ల మూలాలను గుర్తించేందుకు దర్యాప్తు కొనసాగిస్తున్నారు.