Pakistan: పాకిస్థాన్ ఆక్ర‌మిత క‌శ్మీర్‌లో లోయ‌లో ప‌డిన వాహ‌నం.. 11 మంది మృతి

న్యూఢిల్లీ: పాకిస్థాన్ ఆక్ర‌మిత క‌శ్మీర్‌లోని గిల్‌గిత్-బాల్టిస్తాన్ ప్రాంతంలో ఓ వాహ‌నం లోయ‌లో ప‌డింది. ప‌ర్వ‌త ప్రాంతాల్లోని రోడ్డు మీద నుంచి ఆ వాహ‌నం జారి లోయ‌లో ప‌డ‌డంతో సుమారు 11 మంది మృతిచెందారు. మ‌రో ముగ్గురు గాయ‌ప‌డ్డారు. గురువారం రాత్రి ఈ ఘ‌ట‌న జ‌రిగిన‌ట్లు అధికారులు చెప్పారు. డ్రైవ‌ర్ అదుపు త‌ప్ప‌డంతో ప్ర‌మాదం జ‌రిగిన‌ట్లు అంచ‌నా వేస్తున్నారు. శుక్ర‌వారం ఉద‌యం కూడా రెస్క్యూ ఆప‌రేష‌న్ కొన‌సాగుతోంది. 11 మృత‌దేహాల‌తో పాటు గాయ‌ప‌డ్డ ప్ర‌యాణికుల‌ను స‌మీప ఆస్ప‌త్రికి త‌ర‌లించారు. ఈ ఘ‌ట‌న ప‌ట్ల స్థానిక మంత్రి అంజ‌ద్ హుస్సేన్ సంతాపం తెలిపారు. గాయ‌ప‌డ్డ‌వారికి ఉత్త‌మ వైద్యం అందించాల‌ని ఆదేశించారు. ఆక్ర‌మిత్ క‌శ్మీర్ రోడ్డు ర‌వాణా వ్య‌వ‌స్థ మ‌రీ దుర్భ‌రంగా ఉంది. చ‌ట్టాల అమ‌లు స‌రిగా ఉండ‌దు, డ్రైవింగ్ ప‌ద్ధ‌తులు కూడా అదుపులో ఉండ‌వు. గ‌త వారం తూర్పు పాకిస్థాన్‌లో బ‌స్సు, ట్ర‌క్కు ఢీకొన్న ఘ‌ట‌న‌లో 11 మంది మృతిచెంద‌గా, 33 మంది గాయ‌ప‌డ్డారు.