Bigg Boss 10 | బిగ్ బాస్ హౌస్‌లో ఫ్యామిలీ వీక్ ఎమోషన్స్.. కొడుకు కోసం రాంప్రసాద్ తల్లి స్పెషల్ టీ, సుధీర్ తల్లి కన్నీళ్లు!

Bigg Boss 10 | బిగ్ బాస్ తెలుగు సీజన్ 10లో ఫ్యామిలీ వీక్ కొనసాగుతోంది. ఇన్ని రోజులు ఇంటి సభ్యులకు దూరంగా ఉంటూ గేమ్ ఆడుతున్న కంటెస్టెంట్లను కలిసేందుకు వారి కుటుంబ సభ్యులు ఒక్కొక్కరుగా హౌస్‌లోకి అడుగుపెడుతున్నారు. దీంతో బిగ్ బాస్ హౌస్‌లో భావోద్వేగాలు, ఆనందాలు, సరదా సంభాషణలు కనిపిస్తున్నాయి. తాజాగా 67వ రోజు ఎపిసోడ్‌లో రాంప్రసాద్, దేబ్జానీ, సుధీర్ కుటుంబ సభ్యులు హౌస్‌లో సందడి చేశారు. ముఖ్యంగా రాంప్రసాద్ తల్లి, కుమార్తె ఉజ్వల రాకతో ఇంట్లో ఆహ్లాదకరమైన వాతావరణం నెలకొనగా.. సుధీర్ తల్లి భావోద్వేగానికి గురికావడం అందరినీ కదిలించింది. ముందుగా రాంప్రసాద్ తల్లి, ఆయన కుమార్తె ఉజ్వల బిగ్ బాస్ హౌస్‌లోకి ఎంట్రీ ఇచ్చారు. తల్లిని చూడగానే రాంప్రసాద్ ఎంతో సంతోషించారు. అయితే ఆమె మాత్రం కొడుకుతో మాట్లాడే ముందు నేరుగా కిచెన్‌లోకి వెళ్లారు. రాంప్రసాద్‌కు ఇష్టమైన విధంగా టీ తయారు చేసి తీసుకొచ్చి ఇచ్చారు. ఇన్ని రోజుల తర్వాత తల్లి చేతితో చేసిన టీ తాగడంతో రాంప్రసాద్ ఆనందానికి అవధులు లేకుండా పోయాయి.

అంతలోనే ఆయన కుమార్తె ఉజ్వల కూడా ‘నాన్న’ అంటూ పలకరిస్తూ దగ్గరకు వచ్చింది. దీంతో రాంప్రసాద్ మరింత సంతోషించారు. తల్లితో, కుమార్తెతో కలిసి కొంతసేపు ముచ్చటించారు. ఇంటి బయట తనకు ఎలాంటి మద్దతు లభిస్తోందో తల్లి ద్వారా తెలుసుకున్నారు. చుట్టుపక్కల ఫ్లాట్లలో ఉండేవారు కూడా రాంప్రసాద్‌ను బాగా ఆడాలని ప్రోత్సహిస్తున్నారని ఆమె చెప్పారు. దీంతో హౌస్‌లో తనకు బయట మంచి సపోర్ట్ ఉందని తెలుసుకుని రాంప్రసాద్ సంతోషించారు.తల్లి వచ్చిన సందర్భంగా రాంప్రసాద్ తన వ్యక్తిత్వం గురించి కూడా మాట్లాడారు. తనలో ఏమైనా లోపాలు కనిపిస్తున్నాయా అని తల్లిని అడిగారు. దీనికి ఆమె స్పందిస్తూ.. ఇతరుల తప్పులను ఎత్తి చూపించలేకపోవడం నీలో ఉన్న ఒక మైనస్ అని చెప్పారు.

అందుకు రాంప్రసాద్ స్పందిస్తూ.. ఇతరుల తప్పులను ఎత్తి చూపించడం తనకు చేతకాదని, ఒక్కోసారి ఎదుటివారి తప్పులను కూడా తనపై వేసుకుంటానని చెప్పారు. దీనికి ఆయన తల్లి కూడా అవును, అది మనకు చేతకాదులే అంటూ సమాధానమిచ్చారు. తల్లీకొడుకుల మధ్య జరిగిన ఈ సంభాషణ వారి మధ్య ఉన్న అనుబంధాన్ని మరోసారి చాటిచెప్పింది.రాంప్రసాద్ కుటుంబ సభ్యుల తర్వాత దేబ్జానీ తల్లిదండ్రులు హౌస్‌లోకి అడుగుపెట్టారు. తమ కుమార్తెను చూసి వారు ఎంతో సంతోషించారు. అనంతరం ఇంట్లోని మిగతా కంటెస్టెంట్లతోనూ ఆప్యాయంగా మాట్లాడారు. ఈ క్రమంలో నరేష్‌తో దేబ్జానీ తండ్రి చేసిన సరదా సంభాషణ ప్రత్యేక ఆకర్షణగా నిలిచింది.

నరేష్‌ను ఆయన ‘అల్లుడు గారు’ అంటూ సరదాగా పిలవడంతో హౌస్‌లో నవ్వులు విరిశాయి. దేబ్జానీ తల్లిదండ్రులు ఇంటి సభ్యులతో కలిసిపోయి కాసేపు సందడి చేశారు. ఫ్యామిలీ వీక్‌లో భాగంగా వచ్చిన కుటుంబ సభ్యుల మధ్య ఇలాంటి సరదా క్షణాలు ఎపిసోడ్‌కు మరింత ప్రత్యేకతను తీసుకొచ్చాయి. ఇక సుధీర్ తల్లి హౌస్‌లోకి వచ్చినప్పుడు మాత్రం వాతావరణం ఒక్కసారిగా భావోద్వేగంగా మారింది. తన కుమారుడిని చూసిన ఆమె ఎంతో ఆనందించినప్పటికీ, అతడి కాలికి గాయం కావడంతో బాధపడిపోయారు. కొడుకు నొప్పితో ఉండటం చూసి కన్నీళ్లు పెట్టుకున్నారు. ఆమెను చూసిన ఇంటి సభ్యులు ఆందోళన చెందవద్దని, గాయం తగ్గిపోతుందని ఓదార్చారు.

ఈ సందర్భంగా సుధీర్ తల్లి తన మనసులోని మాటలను పంచుకున్నారు. తన కుమారుడు ఇంత దూరం రావడం ఎంతో గర్వంగా ఉందని చెప్పారు. ఎక్కడికి వెళ్లినా సుధీర్ గురించి ఇతరులు మాట్లాడుతుంటే తనకు చాలా సంతోషంగా ఉంటుందని భావోద్వేగానికి గురయ్యారు. కొడుకు సాధించిన గుర్తింపు తనకు ఎంతో ఆనందాన్ని ఇస్తోందని తెలిపారు.