Microsoft: మైక్రోసాఫ్ట్ 365 సేవ‌ల్లో అంత‌రాయం.. 5 గంట‌లు స్తంభించిన వివిధ అప్లికేష‌న్లు

న్యూయార్క్‌: మైక్రోసాఫ్ట్(Microsoft) సేవ‌ల్లో అంత‌రాయం ఏర్ప‌డింది. మైక్రోసాఫ్ట్ 365 కింద ప‌నిచేసే వివిధ అప్లికేష‌న్లు మొరాయించాయి. గురువారం సుమారు 5 గంట‌ల పాటు ఔట్‌లుక్, టీమ్స్‌తో పాటు ఇత‌ర కొన్ని అప్లికేష‌న్లు స్తంభించిపోయాయి. దీంతో వేలాది మంది మైక్రోసాఫ్ట్ 365 అప్లికేష‌న్ యూజ‌ర్లు ఇబ్బందులు ఎదుర్కొన్నారు. ఓపెన్ఏఐతో పాటు ఆంథ్రోపిక్ సేవ‌ల‌కు కూడా మైక్రోసాఫ్ట్ వ‌ల్ల అవ‌రోధాలు క‌లిగాయి. అయితే సేవ‌లు నిలిచిపోయిన స‌ర్వ‌ర్ల‌ను రిస్టోర్ చేసేందుకు మైక్రోసాఫ్ట్ వ‌ర్క్ చేస్తున్న‌ట్లు తెలిసింది. యూజ‌ర్లు మెల్ల‌మెల్ల‌గా త‌మ స‌ర్వీసుల‌కు క‌నెక్ట్ అవుతున్నార‌ని కంపెనీ తాజాగా త‌న రిపోర్టులో చెప్పింది. డౌన్‌డిటెక్ట‌ర్ ప్ర‌కారం .. ఔట్‌లుక్ సేవ‌ల్లో గురువారం మ‌ధ్యాహ్నం తీవ్ర స్థాయిలో అంత‌రాయం ఏర్ప‌డిన‌ట్లు తెలిసింది. అయితే సాయంత్రం వ‌ర‌కు ఆ స‌మ‌స్య త‌గ్గింది.

మైక్రోసాఫ్ట్ 365కి సంబంధించిన ఇష్యూలు అన్నీ నిన్న సాయంత్రం వ‌ర‌కు గ‌ణ‌నీయంగా త‌గ్గిన‌ట్లు కంపెనీ చెప్పింది. టీమ్స్‌ను యాక్సెస్ చేసేందుకు కూడా యూజ‌ర్ల‌కు కొంత స‌మ‌యం ప‌ట్టింది. స‌ర్వ‌ర్ల‌పై ఒకేసారి అధిక లోడు ప‌డ‌డం వ‌ల్ల సేవ‌ల్లో అవ‌రోధాలు ఎదురైన‌ట్లు మైక్రోసాఫ్ట్ చెప్పింది. మైక్రోసాఫ్ట్ 365 స‌ర్వీసుల్లో స‌మ‌స్య‌లు ఎదుర్కొంటున్న యూజ‌ర్ల రిపోర్టుల‌పై ద‌ర్యాప్తు చేస్తున్న‌ట్లు కంపెనీ పేర్కొన్న‌ది. ప్ర‌భావానికి గురైన స‌ర్వ‌ర్ల‌ను మ‌ళ్లీ ఆన్‌లైన్‌లోకి తెచ్చే ఏర్పాట్లు జ‌రుగుతున్న‌ట్లు కంపెనీ వెల్ల‌డించింది. కెపాసిటీని రిస్టోర్ చేశామ‌ని, యూజ‌ర్లు నెమ్మ‌దిగా రిక‌వ‌రీ అవుతార‌ని మైక్రోసాఫ్ట్ త‌న స్టేట్మెంట్‌లో పేర్కొన్న‌ది.