చిన్ని చిన్ని కళ్లల్లోనా ఆనందమే చూస్తూవున్నా..

‘ఎస్‌ఆర్‌ కళ్యాణ మండపం’ తర్వాత మరో మంచి కథ చెప్పాలనిపించి ఈ కథ రాశాను. కుటుంబమంతా కలిసి చూసేలా సినిమా ఉంటుంది. ప్రమోషనల్‌ కంటెంట్‌ అందరికీ నచ్చింది. ఈ రోజు విడుదల చేసిన ‘రుత్తు’ సాంగ్‌ కూడా అందరికీ నచ్చిందనుకుంటున్నా. సినిమా కూడా నచ్చుతుంది. డిసెంబర్‌ 25న విడుదల చేస్తున్నాం. థియేటర్లలో మీరు కచ్ఛితంగా ఎంజాయ్‌ చేస్తారు’ అని హీరో, డైరెక్టర్‌ కిరణ్‌ అబ్బవరం అన్నారు. ఆయన స్వీయ దర్శకత్వంలో నటిస్తున్న కమర్షియల్‌ ఎంటర్‌టైనర్‌ ‘రియాలిటీ’. సుధాకర్‌ చాగంటి నిర్మిస్తున్న ఈ చిత్రం డిసెంబర్‌ 25న విడుదల కానున్నది. ఈ సందర్భంగా ఈ సినిమా సెకండ్‌ సాంగ్‌ రిలీజ్‌ ఈవెంట్‌లో కిరణ్‌ అబ్బవరం మాట్లాడారు.

ఇంకా చిత్రబృందమంతా సినిమా విజయంపై నమ్మకం వెలిబుచ్చారు. ‘చిన్ని చిన్ని కళ్లల్లోనా.. ఆనందమే చూస్తూవున్నా.. నన్నే నన్నే పిలిచావనీ.. పదే పదే ఆలోచనా..’ అంటూ సాగిన ఈ రొమాంటిక్‌ మెలొడీని పూర్ణచారి రాయగా, భీమ్స్‌ సిసిరోలియో స్వరపరిచారు. కపిల్‌ కపిలన్‌ ఆలపించారు. ప్రేమలోని భావాలను వ్యక్తపరుస్తూ సాగే ఈ పాటలో కిరణ్‌ అబ్బవరం ఒదిగిపోయి నటించారు. దేవిక భట్‌ అందం, స్క్రీన్‌ ప్రెజెన్స్‌, క్యూట్‌ ఎక్స్‌ప్రెషన్స్‌ ఈ పాటకు అందాన్ని తెచ్చాయి. ఈ చిత్రానికి కెమెరా: విశ్వాస్‌ డేనియల్‌, నిర్మాణం: జాయ్‌ ఫిల్మ్స్‌.