ఎమ్మెల్సీ బల్మూరి బల ప్రయోగం.. ఇందిరమ్మ రాజ్యంలో ఇదీ గౌరవం

• మా భూమిని వెంకట్‌ కబ్జా చేస్తున్నడు!
• ఇదేందని అడిగితే అనుచరులతో బెదిరిస్తున్నడు
• ప్రహరీని పడగొట్టిండ్రు.. తలదూర్చవద్దన్న కోర్టు ఆర్డర్‌ బోర్డునూ పెట్రోల్‌ పోసి తగులబెట్టించిండు
• మా నాయనను చంపుతామని వార్నింగ్‌ ఇస్తుండ్రు
• ఆయన చిన్నమ్మ వెంచర్‌ రోడ్డు కోసమే ఇదంతా!
• కబ్జాదారులపై కేసులున్నా పోలీసులు పట్టించుకోవట్లే
• కాంగ్రెస్‌ ఎమ్మెల్సీ బల్మూరిపై.. ‘బాండీ బీచ్‌’ హీరోగా గుర్తింపు పొందిన రహ్మత్‌ పాషా సంచలన ఆరోపణలు
• ఆస్ట్రేలియా తనకు శాశ్వత సిటిజన్‌షిప్‌ ఇస్తే, కాంగ్రెస్‌ సర్కార్‌లో దక్కే గౌరవం ఇదేనా? అంటూ ఆవేదన

‘ఉగ్రదాడిలో ప్రాణాలకు తెగించి 20 మందిని కాపాడా. నా సాహసానికి మెచ్చి ఆస్ట్రేలియా  సర్కార్‌ శాశ్వత నివాస హోదాను కల్పించింది. అలాంటి మా కుటుంబాన్ని భూమి కోసం ఎమ్మెల్సీ బల్మూరి వెంకట్‌ తీవ్ర ఇబ్బందులకు గురిచేస్తున్నడు. కోర్టు ఆర్డర్‌ ఉన్న బోర్డును కూడా తగులబెట్టి, ప్రహరీని కూల్చివేశారు. పోలీసులు కూడా వారికే వత్తాసు పలుకుతున్నరు. అసలు కాంగ్రెస్‌ ప్రభుత్వహయాంలో తెలంగాణలో బతుకడానికి స్వేచ్ఛ లేదా?’

ఈ మాటలు అన్నది ఎవరో కాదు.. నిరుడు డిసెంబర్‌లో ఆస్ట్రేలియాలోని బాండీ బీచ్‌లో జరిగిన ఉగ్రదాడిలో ప్రాణాలకు తెగించి 20 మందిని కాపాడిన క్యాబ్‌ డ్రైవర్‌ రహ్మత్‌ పాషా. బల్మూరి వెంకట్‌ తన తండ్రి భూమిని కబ్జా చేస్తున్నాడని, అడ్డుకోవాల్సిన పోలీసులు ఎమ్మెల్సీ అనుచరులకే వత్తాసు పలుకుతున్నారని వాపోయారు. ఇదీ దేశానికి పేరుతీసుకొచ్చిన ఓ సామాన్య కుటుంబానికి ఇందిరమ్మ రాజ్యంలో దక్కిన గౌరవం అని సోషల్‌మీడియాలో పలువురు కామెంట్లు చేస్తున్నారు.

వికారాబాద్‌, నవంబర్‌ 12, (నమస్తే తెలంగాణ) : భూమిని కబ్జా చేసి సొంత పెద్దనాన్ననే చంపుతానని బెదిరింపులకు పాల్పడిన ఆరోపణలతో ఇటీవల వార్తల్లో నిలిచిన కాంగ్రెస్‌ ఎమ్మెల్సీ బల్మూరి వెంకట్‌పై మరోసారి భూకబ్జా ఆరోపణలు వెళ్లువెత్తుతున్నాయి. వికారాబాద్‌ మున్సిపాలిటీ పరిధిలో తన బంధువుల వెంచర్‌కు రోడ్డు కోసమని.. తమ పట్టా భూమిని కబ్జా చేసేందుకు బల్మూరి, ఆయన అనుచరులు తెగబడుతున్నట్టు బాధితులు ఆరోపిస్తున్నారు. ‘భూమి మా చిన్నమ్మ పేరిట ఉంది. ఇప్పటికే దీనిపై కేసులు అయ్యాయి. ఈ భూమి జోలికొస్తే కేసులవుతాయ’ని అబద్ధాలు చెప్తూ బల్మూరి వెంకట్‌ ఫోన్‌లో బెదిరిస్తున్నట్టు బాధితులు వాపోతున్నారు. తమ భూమిలో తలదూర్చవద్దని కోర్టు ఇచ్చిన ఆర్డర్‌ బోర్డును సైతం బల్మూరి అనుచరులు పెట్రోల్‌ పోసి తగులబెట్టారని, న్యాయం చేయాల్సిన పోలీసులు సైతం బల్మూరి అనుచరులకే వత్తాసు పలుకుతున్నారని బాధితులు ఆవేదన వ్యక్తంచేస్తున్నారు.

వెంచర్‌కు రోడ్డు కోసం దౌర్జన్యం

బాధితుల వివరాల ప్రకారం.. వికారాబాద్‌ మున్సిపాలిటీ పరిధిలోని రాజీవ్‌నగర్‌ కాలనీ సమీపంలో ఆలంపల్లి గ్రామ పంచాయతీ పరిధిలోని సర్వే నంబర్‌ 277ఏ, 278లో అజ్మత్‌ పాషాకు 5.33 ఎకరాల భూమి ఉన్నది. ముంబైకి చెందిన రిషి కసబ్‌ నుంచి 1998లో ఆయన ఈ భూమిని కొనుగోలు చేశారు. లావాదేవీలు పూర్తయిన వెంటనే సర్వే పూర్తి చేసి సరిహద్దు గోడలను కూడా నిర్మించుకొన్నారు. అజ్మత్‌ పాషా సోదరుడు ఖలీల్‌ పాషా కూడా రిషి కసబ్‌ నుంచి 10 ఎకరాలను అప్పట్లోనే కొనుగోలు చేశారు. అయితే, ఖలీల్‌ పాషా భూమిని బల్మూరి వెంకట్‌ చిన్నమ్మ ఒరుగంటి ప్రణీతతోపాటు మహ్మద్‌ అస్లాం అనే మరో వ్యక్తి వెంచర్‌ కోసం డెవలప్‌మెంట్‌ అగ్రిమెంట్‌ చేసుకొన్నట్టు బాధితులైన అజ్మత్‌ పాషా, ఆయన కుమారుడు రహ్మత్‌ పాషా చెప్తున్నారు. ఒప్పందం చేసుకున్న ఈ భూమికి రిక్షా కాలనీ నుంచి రోడ్డు ఉండడంతో వికారాబాద్‌-తాండూర్‌ మెయిన్‌ రోడ్డుకు లింక్‌ అయ్యేలా మరో రోడ్డు వేయాలని వీళ్లు నిర్ణయించినట్టు పేర్కొన్నారు. అయితే, పక్కనే ఉన్న తమ భూమి ఈ రోడ్డుకు అడ్డుగా ఉన్నదని, దీంతో తమ భూమిని కబ్జా చేసేందుకు గత ఐదారేండ్లుగా బల్మూరి, ఆయన అనుచరులు తీవ్రంగా ప్రయత్నిస్తున్నారని బాధితులు ఆరోపిస్తున్నారు. దీన్ని అడ్డుకొన్న తమపై బల్మూరి అనుచరులు దౌర్జన్యానికి పాల్పడుతూ, చంపుతామని బెదిరిస్తున్నట్టు బాధితులు ఆరోపిస్తున్నారు.

కోర్టు ఇంజంక్షన్‌ ఆర్డర్‌ ఉన్నప్పటికీ..

తమ భూములను కబ్జా చేయడంలో భాగంగా రాత్రికిరాత్రి సరిహద్దు గోడను పడగొట్టి తమను చంపుతామని బల్మూరి అనుచరులు బెదిరిస్తున్నారని బాధితులు చెప్తున్నారు. ఇదే విషయమై పోలీసులకు కూడా ఫిర్యాదు చేశామని, అయినప్పటికీ స్పందన లేదని వాపోతున్నారు. నిందితులపై ఇప్పటివరకూ 7 ఎఫ్‌ఐఆర్‌లు నమోదైనా పోలీసులు వారికే అండగా నిలుస్తూ.. ప్రతిగా తమనే బెదిరిస్తున్నారని ఆవేదన వ్యక్తంచేస్తున్నారు. మరోవైపు తమ భూమి జోలికి రావొద్దంటూ 2024లో కోర్టు ఇంజంక్షన్‌ ఆర్డర్‌ జారీ చేసినట్టు బాధితుడు అజ్మత్‌ పాషా పేర్కొన్నారు. ఇంకా ఈ కేసు కోర్టులో పెండింగ్‌లో ఉన్నదని తెలిపారు. ఆ ఇంజంక్షన్‌ ఆర్డర్‌ బోర్డును పడగొట్టి, దాన్ని కబ్జాదారులు పెట్రోల్‌ పోసి నిప్పుపెట్టారని ఆరోపించారు. ఈ వీడియోలను సాక్ష్యంగా చూపెడుతూ.. పోలీసు ఉన్నతాధికారులకు ఫిర్యాదు చేసినా.. వాళ్లు కూడా పట్టించుకోవట్లేదని వాపోయారు. ఈ భూవివాదంలో పోలీసులు జోక్యం చేసుకోవద్దని కూడా తాము హైకోర్టు నుంచి ఆర్డర్‌ తెచ్చినప్పటికీ, వారు తరచూ జోక్యం చేసుకొంటూ బల్మూరి వెంకట్‌, ఆయన అనుచరులకు వత్తాసు పలుకుతున్నట్టు ఆరోపిస్తున్నారు. ఇదే క్రమంలో బాధితులమైన తమపైనే కేసులు పెట్టి జైలుకు పంపుతామని బెదిరిస్తున్నట్టు వాపోతున్నారు.

సానియా మీర్జా బంధువు భూములు కూడా

గతంలోనూ ఈ వెంచర్‌కు రోడ్డు కోసం పక్కనే ఉన్న ఖమ్రాన్‌ మీర్జా (సానియా మీర్జా బంధువు) భూముల్లోని బౌండరీని కూడా బల్మూరి అనుచరులు పడగొట్టి దౌర్జన్యానికి పాల్పడినట్టు బాధితులు ఆరోపించారు. అయితే, ఖమ్రాన్‌ మీర్జా ఫిర్యాదుతో కబ్జాదారులపై కేసులు నమోదయినట్టు పేర్కొన్నారు. ఇప్పుడు తమ భూమిపై కన్నేసిన బల్మూరి వెంకట్‌, ఆయన బంధువులు, అనుచరులు గత ఐదారేండ్లుగా ఇబ్బందులు పెడుతున్నారని అజ్మత్‌ పాషా ఆరోపించారు. కాంగ్రెస్‌ ప్రభుత్వం అధికారంలోకి వచ్చిన నాటి నుంచి వీరి దౌర్జన్యం మరింతగా పెరిగినట్టు పేర్కొన్నారు. వికారాబాద్‌ డీఎస్పీ, పట్టణ సీఐలు వృద్ధుడిని అన్న కనికరంలేకుండా స్టేషన్‌కు పిలిచి, గంటలపాటు కూర్చోబెట్టి బెదిరింపులకు పాల్పడినట్టు అజ్మత్‌ పాషా ఆవేదన వ్యక్తం చేస్తున్నారు.

బాండీ బీచ్‌ హీరో ఎలా అయ్యారంటే?

అది 2025వ సంవత్సరం డిసెంబర్‌ 14. ఆస్ట్రేలియాలోని ప్రముఖ నగరం సిడ్నీలో బాండీ బీచ్‌ పర్యాటకులతో కిక్కిరిసిపోయింది. ఇంతలో బీచ్‌లోకి ప్రవేశించిన ఇద్దరు ముష్కరులు ఒక్కసారిగా కాల్పులకు తెగబడ్డారు. ఉగ్రదాడిలో అప్పటికే 15 మంది పర్యాటకులు చనిపోయారు. మిగతా వారు ప్రాణాలను అరచేతిలో పెట్టుకొని పరుగులు తీశారు. ఆ సమయంలో అక్కడే ఉన్న హైదరాబాద్‌కు చెందిన రహ్మత్‌ పాషా ఉగ్రవాదుల తూటాల నుంచి తప్పించుకొంటూనే.. తూటాలు తగిలి కొనఊపిరితో రక్తపుమడుగులో కొట్టుమిట్టాడుతున్న దాదాపు 20 మందిని కాపాడారు. కష్టసమయంలోనూ ప్రాణాలకు తెగించి ఇతరులను కాపాడిన రహ్మత్‌ పాషా అసాధారణ ధైర్యాన్ని మెచ్చుకొంటూ ఆస్ట్రేలియా ప్రభుత్వం శాశ్వత నివాస హోదాను కల్పిస్తూ సత్కరించింది. పాషా పేరును పలు సాహస అవార్డులకు కూడా నామినేట్‌ చేస్తూనే.. ఘటన సమయంలో పాషా ధరించిన టోపీని సిడ్నీ మ్యూజియంలో ప్రదర్శించాలని నిర్ణయించింది.

బల్మూరి అండతోనే మా భూమి కబ్జా : బాధితుడు అజ్మత్‌ పాషా

బల్మూరి వెంకట్‌ అండతోనే రాకేశ్‌, అస్లాం, ఖలీల్‌ తదితరులు ప్రహారీ గోడను కూల్చేసి మా భూమిని కబ్జా చేస్తున్నారు. 25 ఏండ్ల క్రితం 5-33 ఎకరాల భూమిని కొనుగోలు చేసి, భూమి చుట్టూ ప్రహారీ గోడను కూడా నిర్మించుకున్నా. తహసీల్దార్‌, ఆర్డీవో సర్వే రిపోర్ట్‌లతోపాటు డిజిటల్‌ సర్వే కూడా చేయించా. బల్మూరి వెంకట్‌ చెప్పడంతోనే నన్ను స్టేషన్‌లోకి పిలిచి పోలీసులు కూడా వేధించారు. ‘ఏమైనా పేపర్లు నీ వద్ద ఉంటే పోలీస్‌స్టేషన్‌కు వచ్చి కూర్చో.. ఏమనుకుంటున్నావో’ అంటూ డీఎస్పీ, సీఐలు కూడా దౌర్జన్యం చేస్తూ బెదిరించారు. పోలీస్‌ స్టేషన్‌లో ఉదయం 11 గంటల నుంచి మధ్యాహ్నం 3 గంటల వరకు కూర్చోబెట్టి ఇబ్బందులకు గురిచేశారు. మా భూమిని కబ్జాదారుల నుంచి విడిపించి మా కుటుంబానికి న్యాయం చేయాలి.

దేశానికి పేరు తెస్తే, మాకు దక్కేది ఇదా?: రహ్మత్‌ పాషా

ఆస్ట్రేలియాలోని బాండీ బీచ్‌లో ఉగ్రవాదుల దాడి నుంచి ప్రాణాలకు తెగించి సుమారు 20 మంది ప్రాణాలను కాపాడా. దీంతో ప్రపంచ దేశాలన్నీ నన్ను ఓ హీరోగా చూశాయి. క్యాబ్‌ డ్రైవర్‌ అయిన నా ధైర్యాన్ని గుర్తించి ఆస్ట్రేలియా ప్రభుత్వం కూడా శాశ్వత నివాస హోదా కల్పిస్తూ సత్కరించింది. అలాంటి నా తండ్రి అజ్మత్‌ పాషాకు చెందిన భూములపై.. అదీ నా సొంత రాష్ట్రంలో దౌర్జన్యకాండ నడుస్తున్నది. ఇది ఎంత అన్యాయం. నా తండ్రి అజ్మత్‌ పాషా పేరిట ఉన్న భూమిని ఎమ్మెల్సీ బల్మూరి వెంకట్‌ అనుచరులు కబ్జా చేయడం నాకు ఎంతో ఆవేదన కలిగిస్తున్నది.

బల్మూరి వెంకట్‌ అండతో ఆయన అనుచరులు నా తండ్రిని, కుటుంబసభ్యులను చంపేస్తామని బెదిరిస్తున్నారు. బల్మూరి వల్ల నా కుటుంబానికి ప్రాణహాని ఉంది. ఇదంతా చూస్తే, సామాన్యులకు అసలు తెలంగాణలో బతుకడానికి స్వేచ్ఛ లేదా? అనిపిస్తున్నది. ఆస్ట్రేలియా ప్రభుత్వం నాకు శాశ్వత నివాసహోదా కల్పిస్తే, తెలంగాణ ప్రభుత్వంలో మాత్రం మా భూములకు రక్షణ లేకుండా పోయింది. కోర్టు ఆర్డర్‌ ఉన్న బోర్డును కూడా తగులబెట్టి, ప్రహరీ గోడను కూల్చివేశారంటే ఏమనుకోవాలి? జిల్లా ఎస్పీ, పోలీసు ఉన్నతాధికారులకు ఫిర్యాదు చేసినా ఫలితం లేకుండాపోయింది. నా తండ్రికి ఏమైనా జరిగితే ఎమ్మెల్సీ బల్మూరి వెంకట్‌, కాంగ్రెస్‌ ప్రభుత్వానిదే బాధ్యత. ఎంతో ధైర్యసాహసాలతో రాష్ర్టానికే కాదు దేశానికే నేను పేరు తీసుకువస్తే.. చిన్న సన్మానం కూడా చేయని కాంగ్రెస్‌ ప్రభుత్వం.. మాకు ఉన్న ఆ కొద్ది భూమిని కూడా గుంజుకోవాలనుకొంటున్నది. ఇది న్యాయమా??