సొంత ఇల్లే స్వర్గం

వృత్తిని, సొంత కుటుంబాన్ని ఎంతగా ప్రేమిస్తానో, తన సొంత ఇంటిని కూడా అంతే స్థాయిలో ప్రేమిస్తానని చెప్పారు బాలీవుడ్‌ బాద్షా షారుఖ్‌ఖాన్‌. గౌరీఖాన్‌తో పెళ్లయ్యేవరకు తనకు సొంత ఇల్లు కూడా లేదని షారుఖ్‌ఖాన్‌ గుర్తుచేసుకున్నారు. దుబాయ్‌లో బాలీవుడ్‌ దర్శకనిర్మాత కరణ్‌జోహార్‌ నిర్వహించిన ఓ కార్యక్రమంలో పాల్గొన్న ఆయన వ్యక్తిగత జీవితంతో పాటు సొంత ఇంటి కలను నెరవేర్చుకోవడానికి తాను చేసిన ప్రయాణం గురించి వివరించారు. చిన్న వయసులోనే తల్లిదండ్రులను కోల్పోవడం, సొంత ఇల్లు లేకపోవడం తన జీవితంపై ప్రభావం చూపాయని షారుఖ్‌ఖాన్‌ అన్నారు. ‘జీవితంలో మంచి చెడూ ఏం జరిగినా సరే..

ఇంటికి చేరుకోగానే మనసుకు ప్రశాంతత లభిస్తుంది. అదే మన స్వర్గం. కొత్త ఉత్సాహంతో జీవితం తాలూకు సవాళ్లకు ఎదుర్కొనే ధైర్యం వస్తుంది. నేను తొలుత కొనుగోలు చేసిన రెండిళ్లూ నా స్థోమతకు మించినవే. ఆ రోజుల్లో సొంత ఇంటి కలను నెరవేర్చుకోవడమే నాకున్న అతిపెద్ద కోరిక’ అని షారుఖ్‌ఖాన్‌ వివరించారు. ముంబైలోని సముద్రానికి అభిముఖంగా బాంద్రా ప్రాంతంలో ఉన్న మన్నత్‌ను 2001లో కొనుగోలు చేశారు షారుఖ్‌ఖాన్‌. ప్రస్తుతం ఆ ఇంటికి పునరుద్ధరణ పనులు జరుగుతున్నాయి. వచ్చే ఏడాదికి అవి పూర్తవుతాయని చెబుతున్నారు.