ఆర్‌ అండ్‌ బీలో రిటైర్డ్‌ అధికారి పెత్తనం!

• పైరవీలు చేసిన వారికే దక్కుతున్న ప్రాధాన్య పోస్టులు
• రూ.20వేల కోట్ల బడ్జెట్‌ల పనులకు పాత అధికారులే
• ఔట్‌సోర్సింగ్‌ పద్ధతిలో సీఈగా పైళ్ల ధర్మారెడ్డి నియామకం
• నల్లగొండ బైపాస్‌ రోడ్డు నిర్మాణంలో భారీ అవకతవకలు
• చెరువుల్లో మట్టి తవ్వకాలతో భూగర్భజలాలు పాతాళానికి
• అక్రమాలను ప్రశ్నిస్తే బెదిరింపులు, అక్రమ కేసులు నమోదు
• రిటైర్డ్‌ అధికారులను తొలగించాలంటూ ఇంజినీర్ల సంఘాల డిమాండ్‌

హైదరాబాద్‌, నవంబర్‌ 12 (నమస్తే తెలంగాణ): రాష్ట్రంలో అత్యంత కీలకమైన, రూ.వేల కోట్ల బడ్జెట్‌ ఉన్న ఆర్‌ అండ్‌ బీ శాఖ లో రిటైర్డ్‌ అధికారుల ‘సిండికేట్‌’ అరాచకం తారస్థాయికి చేరింది. శాఖలో అనుభవజ్ఞులు, నిబద్ధత గల అధికారులున్నా కొందరి స్వార్థ ప్రయోజనాల కోసం పాలకవర్గం అడ్డగోలు నియామకాలకు తెరతీసిందనే విమర్శలు వెల్లువెత్తుతున్నాయి. ఉద్యోగ విరమణ పొందినప్పటికీ పైరవీలతో అత్యున్నత స్థానాల్లో తిష్టవేసి, అక్రమ సంపాదన కోసం ప్రజాధనాన్ని కొల్లగొడుతుండటం ఇప్పుడు పాలనావర్గాల్లో చర్చనీయాంశమైంది. ఫలితంగా టీజీపీఎస్సీ ద్వారా కష్టపడి ఉద్యోగా లు సాధించి, అర్హత కలిగిన రెగ్యులర్‌ ఇంజినీర్లు సర్వీస్‌లో కొనసాగుతున్న వారికి తీవ్ర అన్యా యం జరుగుతున్నది. ప్రభుత్వం ఔట్‌సోర్సింగ్‌ లేదా కాంట్రాక్ట్‌ పద్ధతిలో రిటైర్డ్‌ ఉద్యోగులను అక్రమంగా నియమించడం వల్ల శాఖ సర్వనాశనం అవుతుందని ఉద్యోగ వర్గాలు మండిపడుతున్నాయి. వెంటనే ఆ అధికారులను తొలగించాలనే డిమాండ్‌ వ్యక్తమవుతున్నది.

శాఖలో రిటైర్డ్‌ ఉద్యోగి ధర్మారెడ్డి పెత్తనం
ఏఈ స్థాయి నుంచి ఎదిగి, ఎస్‌ఈగా రిటైరైన పైళ్ల ధర్మారెడ్డి ఉదంతం ఈ పైరవీల పర్వానికి ప్రత్యక్ష నిదర్శనంగా నిలుస్తున్నది. ఉద్యోగ విరమణ పొందిన తర్వాత కూడా నిబంధనలకు పాతర వేసి, ఔట్‌సోర్సింగ్‌ ద్వారా ఆయన్ను నేషనల్‌ హైవేస్‌ చీఫ్‌ ఇంజినీర్‌ పోస్టులో ప్రభుత్వం నియమించింది. సుమారు రూ.15-20వేల కోట్ల విలువైన జాతీయ రహదారులు, మౌలిక వసతుల భారీ ప్రాజెక్టుల పెత్తనాన్ని ఒక విశ్రాంత అధికారి చేతిలో పెట్టడం ప్రభుత్వ పారదర్శకతకే పెద్ద మచ్చగా మారింది. కీలక పోస్టుల్లో ఉన్న ఈ రిటైర్డ్‌ అధికారులు కాంట్రాక్టర్లతో కుమ్మకై, నాసిరకం పనులకు అండగా నిలుస్తున్నారనే ఆరోపణలున్నాయి. కేంద్ర ప్రభుత్వ నిధులతో చేపట్టిన నల్లగొండ బైపాస్‌ రోడ్డు పనుల్లో ఎస్‌ఎల్‌ఎంవీ ఇన్‌ఫ్రా ప్రాజెక్ట్స్‌ సంస్థ అక్రమాలు ఇందుకు నిదర్శనంగా మారాయి. మైనింగ్‌ శాఖ నుంచి ఎలాంటి ముందస్తు అనుమతులు లేకుండానే మర్రిగూడ, చందనపల్లి, దోమలపల్లి, పానగల్‌, ఉదయసముద్రం తదితర ప్రాంతాల్లోని చెరువులు, రిజర్వాయర్ల నుంచి ఏకంగా 60 అడుగుల లోతు వరకు అక్రమంగా మట్టి తవ్వకాలు సాగిస్తుండటం గమనార్హం.

అవినీతిపై ప్రశ్నిస్తే బెదిరింపులు
రోడ్డు పనుల్లో నిర్దేశించిన నాణ్యమైన ఎర్రమట్టికి బదులు కబారు నల్లరేగడి, బంకమట్టిని అక్రమంగా తరలించి వినియోగిస్తుండటం వల్ల వేసిన రోడ్లు కొద్దిరోజులకే గుంతలమయమై ప్రమాదకరంగా మారుతున్నాయి. అంతేకాక చెరువుల్లో 60 అడుగుల మేర ఇష్టారాజ్యంగా తవ్వకాల వల్ల భూగర్భ జలాలు పడిపోయాయి. ఫలితంగా రైతుల బోర్లు వట్టిపోయి పంటలు ఎండిపోతున్నాయి. ఈ మట్టి దోపిడీని ప్రశ్నించిన దళిత యువకులు, స్థానికులపై అక్రమ కేసులు బనాయిస్తూ కాంట్రాక్టర్లు, అధికారులు బెదిరింపులకు దిగుతున్నారు.

ఎల్బీనగర్‌మలాపురం రోడ్డు పనుల్లో సైతం..
మరోవైపు ఎల్బీనగర్‌మలాపురం రహదారి విస్తరణ పనులు కూడా నత్తనడకన సాగుతూ ప్రజలను తీవ్ర ఇబ్బందులకు గురిచేస్తున్నాయి. సరైన డ్రైనేజీ వ్యవస్థ లేక వర్షాకాలంలో రోడ్డుపై మోకాళ్లలోతు నీరు చేరి ప్రమాదాలు జరుగుతున్నా అధికారులు పట్టించుకోవడం లేదు. ఈ వ్యవహారాల వెనుక భారీ ఎత్తున బినామీ ఆస్తుల దందా నడుస్తున్నదని, హైదరాబాద్‌ శివార్లలో ధర్మారెడ్డి పేరుతో వాణిజ్య భవనాలు, రూ. 20 కోట్లతో విలాసవంతమైన ఇల్లు, బినామీ కంపెనీల ద్వారా రియల్‌ ఎస్టేట్‌ వ్యాపారాలు, పెట్రోల్‌ బంకులు నడుస్తున్నాయనే విమర్శలు గుప్పుమంటున్నాయి. అంతేగాక కాంట్రాక్టర్లకు వడ్డీకి నగదు సర్దుబాటు చేసే వ్యాపారాలు కూడా జోరుగా సాగుతున్నట్టు సమాచారం.

రిటైర్డ్‌ అధికారులను తప్పించాల్సిందే..
కీలక పోస్టుల్లో తిష్టవేసిన పైళ్ల ధర్మారెడ్డి సహా ఇతర రిటైర్డ్‌ అధికారులందరినీ తక్షణమే బాధ్యతల నుంచి తప్పించాలని ప్రజాసంఘాలు, ఇంజినీర్ల సంఘాలు డిమాండ్‌ చేస్తున్నాయి. ఆయన హయాంలో సాగిన రూ.15వేల కోట్ల పైచిలుకు కాంట్రాక్టులు, విడుదలైన బిల్లులు, అక్రమాస్తులు, బినామీ దందాలపై సిట్టింగ్‌ జడ్జి లేదా స్వతంత్ర నిపుణుల కమిటీతో సమగ్ర విచారణ జరిపించాలని కోరుతున్నారు. అర్హులైన రెగ్యులర్‌ ఇంజినీర్లకు వెంటనే ప్రమోషన్లు కల్పించి శాఖకు పూర్వవైభవం తేవాలని సీఎం రేవంత్‌రెడ్డికి వారు విజ్ఞప్తి చేస్తున్నారు.

సొంత లాభం కోసం.. సీనియారిటీ జాబితా తారుమారు
రెగ్యులర్‌ ఉద్యోగులను అణచివేసేందుకు దశాబ్దాలుగా ఉన్న ప్రమోషన్లను కోర్టు వివాదాల పేరిట నిలిపివేసి, జీవో 20 ప్రకారం రూపొందించిన సీనియారిటీ జాబితాను సొంత లాభం కోసం తారుమారు చేశారనే ఆరోపణలు ఉన్నాయి. నిబంధనల ప్రకారం అభ్యంతరాల స్వీకరణకు 15 రోజుల గడువు ఇవ్వాల్సి ఉండగా, 3రోజుల వ్యవధి మాత్రమే ఇవ్వడం వెనుక పెద్ద కుట్ర దాగి ఉన్నదని ఉద్యోగులు ఆగ్రహం వ్యక్తంచేస్తున్నారు. ఇటీవల ఏసీబీ దాడుల్లో ఈఈ మోహన్‌నాయక్‌ వద్ద ఏకంగా రూ.200 కోట్లకు పైగా అక్రమాస్తులు బయటపడటం ఆర్‌అండ్‌బీ శాఖలో వేళ్లూనుకున్న లంచగొండితనానికి నిదర్శనం. నెలకు రూ.లక్షల్లో జీతం తీసుకొనే అధికారులు ఇంతటి అవినీతికి పాల్పడుతుంటే వారిని కాపాడేందుకు ప్రభుత్వ పెద్దలు కొమ్ముకాయడం అనుమానాలకు దారితీస్తున్నది. గతంలో రిటైర్డ్‌ అధికారుల పొడిగింపులను రద్దు చేస్తామని మంత్రులు అంతర్గత ఉత్తర్వులు జారీ చేసినా అవి అమలుకాకపోవడం గమనార్హం.