‘గాడ్‌ ఆఫ్‌ వార్‌’కి ఢోకా లేనట్టే!

సుబ్రహ్మణ్యపురాణంలోని ఓ ఆసక్తికరమైన ఘట్టం ఆధారంగా అగ్ర దర్శకుడు త్రివిక్రమ్‌ శ్రీనివాస్‌ ఓ భారీ పానిండియా పౌరాణిక చిత్రాన్ని తెరకెక్కించనున్న విషయం తెలిసిందే. అగ్ర కథానాయకుడు ఎన్టీఆర్‌ నటించనున్న ఈ ప్రస్టేజియస్‌ ప్రాజెక్ట్‌కి ‘గాడ్‌ ఆఫ్‌ వార్‌’ అనే టైటిల్‌ ప్రచారంలో ఉన్నది. హారికా హసినీ ప్రొడక్షన్స్‌, ఎన్టీఆర్‌ ఆర్ట్స్‌ కలిసి నిర్మించనున్న ఈ చిత్రం విషయంలో ఇటీవల షాకింగ్‌ రూమర్లు బయటకి వచ్చాయి. ఈ చిత్రం మొదలవ్వడం కష్టమేనంటూ సోషల్‌ మీడియాలో కొందరు కథనాలను వండి వార్చారు.

అంతేకాదు, హారికా హాసిని సంస్థ నుంచి త్రివిక్రమ్‌ దూరమైనట్టుగా కూడా రూమర్లు వచ్చాయి. వీటన్నింటికీ చెక్‌ పెడుతూ తాజాగా మేకర్స్‌ ఓ ఫొటోను రిలీజ్‌ చేశారు. ఈ ఫొటోలో ఎన్టీఆర్‌, త్రివిక్రమ్‌లతోపాటు నిర్మాతలు ఎస్‌.రాధాకృష్ణ, కల్యాణ్‌రామ్‌ కూడా ఉండటం విశేషం. దీంతో త్రివిక్రమ్‌, ఎన్టీఆర్‌ల ‘గాడ్‌ ఆఫ్‌ వార్‌’ సినిమా విషయంలో అభిమానుల్లో ఉన్న అనుమానాలు పటాపంచలైపోయాయి. త్వరలోనే ఈ క్రేజీ ప్రాజెక్ట్‌ సెట్స్‌ పైకి వెళ్లనున్నది. ఈ భారీ పౌరాణిక చిత్రానికి అనిరుధ్‌ సంగీతాన్ని అందిస్తారు. ‘డ్రాగన్‌’ తర్వాత ఎన్టీఆర్‌ ఈ సినిమా షూటింగ్‌లో జాయిన్‌ అవుతారు.