ఆస్తి వివాదంలో అమితాబ్‌ ఇల్లు

ముంబయిలోని విలాసవంతమైన జుహూ ప్రాంతంలో ఉండే అమితాబ్‌ బచ్చన్‌ నివాసం ‘జల్సా’ గురించి ప్రత్యేకంగా చెప్పాల్సిన అవసరం లేదు. దాదాపు నాలుగు దశాబ్దాలుగా ప్రతీ ఆదివారం ఈ భవంతి ప్రాంగణం నుంచే అభిమానుల్ని పలకరించడం ఆనవాయితీగా చేసుకున్నారు అమితాబ్‌ బచ్చన్‌. తాజాగా ఈ బంగ్లా ఆస్తి వివాదంతో వార్తల్లో నిలుస్తున్నది. ఈ ఇంటి యాజమాన్య హక్కులను అమితాబ్‌ సోదరుడు అజితాబ్‌ బచ్చన్‌ భార్య రమోలా సవాలు చేస్తున్నారు. ఈ ఇంటిని 1993లో అమితాబ్‌బచ్చన్‌ భార్య జయా బచ్చన్‌ పేరు మీద బదిలీ చేశారు.

అయితే ఈ లావాదేవీ గురించి తనకు ఎలాంటి సమాచారం లేదని, తన అనుమతి లేకుండానే గిఫ్ట్‌డీడ్‌ క్రింద ఇంటిని సొంతం చేసుకున్నారని రమోలా ఆరోపిస్తున్నారు. ఈ వివాదం విషయమై ఆమె రిజిస్ట్రేషన్‌ అధికారులకు పలుమార్లు ఫిర్యాదులు చేసినట్లు సమాచారం. తొలుత ఈ ప్రాపర్టీ రమోలా పేరు మీద ఉండగా, గిఫ్ట్‌డీడ్‌ ద్వారా జయబచ్చన్‌కు యాజమాన్య హక్కులు బదిలీ అయినట్లు తెలుస్తున్నది. హౌసింగ్‌ సొసైటీ రికార్డుల్లో జయాబచ్చన్‌ పేరు ఉండగా, ప్రభుత్వ రికార్డుల్లో మాత్రం రమోలా పేరు కొనసాగుతున్నట్లు తెలుస్తున్నది. ఈ నేపథ్యంలో ఈ ఆస్తి వివాదం తెరమీదకు వచ్చింది. ఈ వ్యవహారంపై విచారణ చేపట్టినట్లు డిప్యూటీ రిజిస్ట్రార్‌ ఫయాజ్‌ ములానీ తెలిపారు. 1982లో ఓ సినిమా పారితోషికానికి బదులుగా అమితాబ్‌ బచ్చన్‌ ఈ భవంతిని నిర్మాత ఎస్‌.సి.సిప్పీ నుంచి కొనుగోలు చేశారని సమాచారం.