ఆటోవాలా బతుకులు ఆగమాగం

• 350 మందికిపైగా ఆత్మహత్యలకు బాధ్యులెవరు?
• తొలుత రూ.12 వేలు ఎవరికిచ్చారో చెప్పాలి?
• కాంట్రాక్టర్ల దందా కోసమే ఆటో నగర్‌
• 2 లక్షలకు పైగా ఆటో డ్రైవర్లు
• 2వేల ఇండ్ల వెనక రాజకీయ కుట్ర
• ఉచిత బస్సుతో డ్రైవర్ల జీవితాలు దుర్భరం

ఒకప్పుడు ఆటో నడిపితే.. కుటుంబానికి నాలుగు మెతుకులు దొరికేవి.. కానీ..కాంగ్రెస్‌ ప్రభుత్వం కొలువుదీరాక ఆటో డ్రైవర్ల బతులు దుర్భరమయ్యాయి. ఉచిత బస్సు స్కీంతో ఉపాధి కరువై.. జీవితం ఆగమై.. ఆర్థిక కష్టాలు తాళలేక.. తనువు చాలిస్తున్నాడు డ్రైవరన్న. రాష్ట్రంలో ఇప్పటి వరకు ఆర్థిక ఇబ్బందులతో 350 మందికి పైగా ఆటో డ్రైవర్లు ఆత్మహత్యలు చేసుకోవడం ఆందోళన కలిగించే అంశం. ఈ చావులకు కాంగ్రెస్‌ సర్కారే కారణమని ఆటో డ్రైవర్లు ఆరోపిస్తున్నారు. 2023లో ఎన్నికల ప్రచారంలో పాల్గొన్న రాహుల్‌ గాంధీ.. డ్రైవర్ల సమస్యలు తెలుసుకున్నారు.

అధికారంలోకి వస్తే.. సమస్యలు పరిష్కరించడమే కాదు.. ఏడాదికి రూ. 12 వేలు అందిస్తామని చెప్పుకొచ్చారు. తీరా.. కాంగ్రెస్‌ ప్రభుత్వం కొలువుదీరాక..తన నైజాన్ని ప్రదర్శించింది..హామీలు విస్మరించింది..ఇప్పుడు రాహుల్‌ గాంధీ నగరానికి వచ్చిన సందర్భంగా ఆటోనగర్‌ పేరుతో కొత్త రాగం అందుకుంటున్నది. క్యూర్‌ పరిధిలో 2 లక్షలకు పైగా ఆటో డ్రైవర్లు ఉంటే.. కేవలం 2వేల మందికే ఇండ్లు ఇస్తామని ప్రభుత్వం చెప్పడం..రాజకీయ కుట్ర అని..దుర్మార్గమేనని అంటున్నారు ఆటో డ్రైవర్లు. ఇది కూడా ఏడాదికి 12వేల హామీ లాంటిదేనని అంటున్నారు.

‘ఆటో డ్రైవర్ల ఆత్మహత్యలకు కాంగ్రెస్‌ ప్రభుత్వమే కారణం. రాహుల్‌ గాంధీ ఒక్కసారి సోషల్‌ మీడియాలో అన్వేషించినా.. ఆటో డ్రైవర్ల సూసైడ్‌ రిపోర్ట్‌ కనిపిస్తుంది. ఉచిత బస్సు స్కీంతో ఆటో డ్రైవర్లు ఉపాధి కోల్పోయి రోడ్డున పడ్డారు. వారిని ను ఆదుకోవాల్సిన ప్రభుత్వమే వారి చావులపై హేళనగా మాట్లాడుతున్నది. -బానోతు శ్రీనివాస్‌, ఆటో డ్రైవర్‌

సిటీబ్యూరో, నవంబర్‌ 13 ( నమస్తే తెలంగాణ ) : ‘2023లో ఎన్నికల ప్రచారంలో పాల్గొన్న రాహుల్‌ గాంధీ నగరంలో ఓ ఆటోలో ప్రయాణించి డ్రైవర్ల సమస్యలు తెలుసుకున్నారు. తాము అధికారంలోకి వస్తే సమస్యలు పరిష్కరిస్తామని, ఏడాదికి రూ.12వేలు అందిస్తామని భరోసానిచ్చారు.’ కానీ అధికారంలోకి వచ్చాక హామీలు నెరవేరడం లేదని ఆటో డ్రైవర్లు ఆవేదన వ్యక్తం చేశారు. తమ బతుకులు ఆగమయ్యాయన్నారు. ఉచిత బస్సు పథకం తీసుకొచ్చి డ్రైవరన్నకు ఉపాధి లేకుండా చేశారని వాపోయారు.

ఏడాదికి రూ.12వేలు ఇస్తామని అభయమిచ్చిన కాంగ్రెస్‌ పార్టీ ఇప్పటి వరకు ఎటువంటి సాయం అందించలేదని ఆగ్రహం వ్యక్తం చేస్తున్నారు. ప్రస్తుతం రాహుల్‌ గాంధీ నగరానికి విచ్చేయనున్న సందర్భంగా ఆటో నగర్‌ల పేరుతో డ్రైవర్లను తప్పుదారి పట్టించాలని చూస్తున్నారని ఆగ్రహం వ్యక్తం చేశారు. రేవంత్‌ పాలన కొలువుదీరినప్పటి నుంచి ఇప్పటి వరకు తమ గొంతు వినిపిస్తున్నా పట్టించుకునే నాథుడే లేరన్నారు.

ప్రభుత్వానికి వ్యతిరేకంగా నిరసనలు, సదస్సులు, అసెంబ్లీ ముట్టడి, ర్యాలీలు, దిష్టిబొమ్మల దహనం, ప్రజాభవన్‌ ఎదుట ఆటోకు నిప్పు తదితర ఉద్రిక్తలతో ఆటో డ్రైవర్లు తమ గళం ఇప్పటికీ వినిపిస్తూనే ఉన్నారన్నారు. గిరాకీ లేక ఆర్థిక ఇబ్బందులతో ఇప్పటి వరకు 350 మందికి పైగా ఆటో డ్రైవర్లు ఆత్మహత్యలు చేసుకున్నారు. ఒక్క ఆటో డ్రైవర్‌ను కూడా సర్కార్‌ ఆదుకోలేదని ఆవేదన వ్యక్తం చేశారు.

కాంట్రాక్టర్లకు దోచిపెట్టడానికే ..

క్యూర్‌ పరిధిలో 2 లక్షలకు పైగా ఆటో డ్రైవర్లు ఉన్నారు. వీరిలో కేవలం 2వేల మందికే ఇండ్లు ఇస్తామని ప్రభుత్వం చెప్పడం దుర్మార్గం. ఆటో డ్రైవర్లను ఎలా ఎంపిక చేస్తారో కూడా క్లారిటీ లేదు. ఏండ్లుగా ఆటో లైసెన్స్‌లు కలిగి ఉన్నవాళ్లు లక్షల్లో ఉన్నారు. కేవలం కాంట్రాక్టర్లకు దోచిపెట్టేందుకే ఆటో డ్రైవర్లకు ఇండ్లని కొత్త రాగం అందుకున్నారు. రాహుల్‌ గాంధీ తొలుత ఏడాదికి రూ.12వేలు ఇస్తామన్న హామీ ఏమైందో చెప్పాలి. కాంగ్రెస్‌ ఉచిత బస్సు నిర్ణయంతో ఆటో, ట్యాక్సీ డ్రైవర్లు గిరాకీ లేక ఆత్మహత్యలు చేసుకున్నారు.

– రవి శంకర్‌, జాతీయ ప్రధాన కార్యదర్శి, బీపీటీఎంఎం

రూ.12వేలు మోసపూరిత హామీ

ఆటో డ్రైవర్లు తాము ఉపాధి కోల్పోయామని నగరంలో పలు ప్రాంతాల్లో ప్లకార్డులు ప్రదర్శిస్తూ.. ప్రభుత్వానికి వ్యతిరేకంగా భిక్షాటన కార్యక్రమం చేపట్టాం. ప్రభుత్వానికి ఏ మాత్రం ఆటో డ్రైవర్ల సమస్యలు పరిష్కరించాలనే ఆలోచన లేదు. రాహుల్‌ గాంధీ పర్యటన సందర్భంగా ఆటో డ్రైవర్ల నుంచి వ్యతిరేకత వ్యక్తమవుతుందనే ఆటోనగర్‌ పేరుతో ప్రభుత్వం మోసపూరిత కుట్రకు పాల్పడింది. నగరంలో లక్షలాది ఆటో డ్రైవర్లలో చిచ్చు పెట్టే ప్రయత్నం చేయడం సరైంది కాదు. ఆటో డ్రైవర్ల అందరికీ దశలవారీగా ఇండ్లు నిర్మిస్తామని కూడా స్పష్టమైన హామీ ఇవ్వలేదు. ఏడాదికి రూ.12వేల మోసపూరిత హామీనే.

– బాలాజీ, ఆటో డ్రైవర్‌

మంత్రి పొన్నం హామీలు ఉత్తవే..

రాష్ట్ర వ్యాప్తంగా ఆటో సంఘాల నాయకులతో మంత్రి పొన్నం ప్రభాకర్‌ గౌడ్‌ పదుల సంఖ్యలో చర్చలు జరిపారు. ప్రతి చర్చలో ఆటో డ్రైవర్లను ఆదుకుంటామని.. హామీలన్నీ నెరవేరుస్తామని మాటిచ్చారు. కానీ మంత్రి ఇచ్చిన హామీలన్నీ వట్టివేనని తేలిపోవడంతో డ్రైవరన్నలు ఆక్రోశంతో ఉన్నారు. పలుమార్లు అసెంబ్లీ ముట్టడికి పిలుపునిచ్చిన ఆటో సంఘాల నాయకులను మంత్రి పిలిపించుకొని సమస్యలు పరిష్కరిస్తామని.. అసెంబ్లీలో ఆటో డ్రైవరన్నల సంక్షేమానికి నిధులు కేటాయిస్తామని చెప్పినా ప్రయోజనం లేదు.

– శంకర్‌, ఆటో డ్రైవర్‌

ఆత్మహత్యలకు కారణం సర్కారే

ఆటో డ్రైవర్ల ఆత్మహత్యలకు కాంగ్రెస్‌ ప్రభుత్వమే కారణం. రాహుల్‌ గాంధీ ఒక్కసారి సోషల్‌ మీడియాలో అన్వేషించినా ఆటో డ్రైవర్ల సూసైడ్‌ రిపోర్ట్‌ కనిపిస్తుంది. ఉచిత బస్సు స్కీంతో ఆటో డ్రైవర్లు ఉపాధి కోల్పోయి రోడ్డున పడ్డారు. ఆటో డ్రైవర్లను ఆదుకోవాల్సిన ప్రభుత్వమే వారి చావులపై హేళనగా మాట్లాడుతుంది. ఆటో డ్రైవర్ల కుటుంబాలను ఆదుకోవాలి.

– బానోతు శ్రీనివాస్‌, ఆటో డ్రైవర్‌

ఉచిత బస్సుతో ఉపాధి దెబ్బతింది

రాష్ట్రంలో 8 లక్షల మంది ఆటో డ్రైవర్లు ఉన్నారు. ఈ లెక్కన సుమారు రూ.960 కోట్లు ప్రభుత్వం ఆటో డ్రైవర్లకు చెల్లించాలి. ఇప్పుడు మూడేండ్లు గడిచింది ఒక్క డ్రైవర్‌కు ఇప్పటి వరకు రూ.12వేల సాయం అందలేదు. ఉచిత బస్సుతో తమ ఉపాధి దెబ్బపడిందని ప్రభుత్వానికి విన్నవించుకున్నా పట్టించుకోవడం లేదు. ఆటో నగర్‌ పేరుతో మరో రాజకీయ కుట్రకు తెరలేపడం అన్యాయం. ఆటో డ్రైవర్ల సంఖ్యను తేల్చి ఆ తర్వాత వాళ్లందరికి ఇండ్లు కట్టించేలా చర్యలు తీసుకోవాలి.

– రాజు, ఆటోడ్రైవర్‌

మరో ఉద్యమం తప్పదు

ఆటోడ్రైవర్ల సమస్యలను పరిష్కరించడంలో ప్రభుత్వం విఫలమైంది. డ్రైవర్ల హక్కులు, జీపనోపాధి పరిరక్షణ కోసం మరో తెలంగాణ ఉద్యమాన్ని చేపట్టాల్సిన అవసరం ఉంది. తెలంగాణ ప్రజలు అందరూ ఆటోడ్రైవర్ల ఉద్యమానికి మద్దతివ్వాలి. మూడేండ్లు గడిచినా రూ.12వేలు అందలేదు. ఇంతకంటే దారుణం ఏదీ ఉండదు.

– రంజిత్‌, ఆటోడ్రైవర్‌