ఇజ్రాయెల్‌లో కొత్త ప్రభుత్వ ఏర్పాటుకు లైన్‌ క్లియర్‌!

• విపక్షాలతో ఐసెన్‌కోట్‌ ఒప్పందం పూర్తి పదవుల పంపకంపై ఏకాభిప్రాయ సాదన

న్యూఢిల్లీ : కొత్త ప్రభుత్వాన్ని ఏర్పాటు చేసే క్రమంలో 26వ నెసెట్‌(ఇజ్రాయెల్‌ పార్లమెంట్‌)లోని కీలక పదవులకు అభ్యర్థుల విషయంలో తన తోటి ప్రతిపక్ష నాయకులైన నఫ్తాలీ బెన్నెట్‌, యైర్‌ గోలన్‌, అవిగ్డోగ్‌ లిబర్‌మాన్‌, యైర్‌ లాపిడ్‌లతో ఒక ఒప్పందానికి వచ్చినట్టు మాజీ సైనిక అధిపతి, బెంజమిన్‌ నెత్యాహుకు బలమైన ప్రత్యర్థి గాడి ఐసెన్‌కోట్‌ మంగళవారం ప్రకటించారు. ఈ ఒప్పందంలో భాగంగా మాజీ మంత్రి మతాన్‌ కహానాను నెసెట్‌ స్పీకర్‌ అభ్యర్థిగా నియమించారు.

తదుపరి ప్రభుత్వాన్ని ఏర్పాటు చేసే మొదటి అవకాశాన్ని విపక్ష నాయకుడు ఐసెన్‌కోట్‌కు ఇస్తున్నట్టు ఇజ్రాయెల్‌ అధ్యక్షుడు ఐజాక్‌ హెర్జోగ్‌ ఆదివారం ప్రకటించారు. ఎన్నికల్లో ఐసెన్‌కోట్‌ కూటమికి గానీ, నెతన్యాహు కూటమికి గానీ పార్లమెంట్‌లో స్పష్టమైన మెజారిటీ లభించకపోవడంతో సంకీర్ణ ప్రభుత్వాన్ని ఏర్పాటు చేయడానికి ఐసెన్‌కోట్‌కు ఆరు వారాల సమయం లభించింది. ఒప్పందం ప్రకారం నెసెట్‌లోని కీలక పదవులకు అభ్యర్థులపై నాయకులు ఏకాభిప్రాయానికి వచ్చారని ఐసెన్‌కోట్‌ పేర్కొన్నారు. కమిటీల కూర్పుపై ఈ వారంలో హౌస్‌ కమిటీ తుది నిర్ణయం తీసుకుంటుందని చెప్పారు.

ఇరాన్‌పై దాడి కోసం ట్రంప్‌పై ఒత్తిడి

ఇరాన్‌పై దాడులను పునరుద్ధరించమని అమెరికా అధ్యక్షుడు డొనాల్డ్‌ ట్రంప్‌పై ఒత్తిడి తెచ్చేందుకు ఇజ్రాయెల్‌ ప్రధాని బెంజమిన్‌ నెతన్యాహు ప్రతిరోజు ఫోన్‌ చేస్తున్నారని సీనియర్‌ అధికారిని ఉటంకిస్తూ ఫైనాన్షియల్‌ టైమ్స్‌ పేర్కొంది. ట్రంప్‌కు నెతన్యాహు ప్రతిరోజూ ఫోన్‌ చేస్తున్నారు. యుద్ధాన్ని తిరిగి ప్రారంభించమని కోరుతున్నారు. అయితే వైట్‌ హౌస్‌ లోపల, వెలుపల యుద్ధం వద్దు అనుకుంటున్న వారు దీనిని అడ్డుకోవడానికి ప్రయత్నిస్తున్నారు అని ఆ అధికారిని పత్రిక ఉటంకించింది. ఉద్రిక్తతలను పెంచవద్దని, చర్చలకు ప్రాధాన్యత ఇవ్వాలని స్థానిక నాయకులు నెతన్యాహుకు నచ్చచెబుతున్నారు అని ఆ అధికారి పేర్కొన్నారు.