బీఆర్‌ఎస్‌ నాయకురాలికి నోటీసులు

• సాగునీటి కోసం ధర్నా చేస్తున్న రైతులకు మద్దతు ఇచ్చినందుకు కేసు

గద్వాల, నవంబర్‌ 11 : జోగుళాంబ గద్వాల జిల్లా గట్టు జడ్పీటీసీ మాజీ సభ్యురాలు, బీఆర్‌ఎస్‌ నాయకురాలు బాసు శ్యామలకు పోలీసులు నోటీసులు అందజేశారు. ఈ ఏడాది సెప్టెంబర్‌ 21న జూరాల ప్రాజెక్టు నుంచి సాగునీటిని విడుదల చేయాలని డిమాండ్‌ చేస్తూ జమ్మిచేడ్‌ వద్ద రైతులు ధర్నా చేపట్టారు. విషయం తెలుసుకొన్న శ్యామల అక్కడికి చేరుకొని రైతులకు మద్దతు తెలిపారు.

ప్రభుత్వాన్ని ప్రశ్నించినందుకు పోలీసులు ఆమెపై కేసు నమోదు చేశారు. బుధవారం గద్వాల జిల్లాకేంద్రంలోని ఆమె ఇంటికి చేరుకొన్న పోలీసులు నోటీసులు అందజేశారు. ఈ సందర్భంగా శ్యామల మాట్లాడుతూ.. కడుపు మండి సాగునీటి కోసం ఆందోళన చేస్తున్న రైతులకు సంఘీభావం తెలిపితే కేసులు నమోదు చేస్తారా? అని ప్రశ్నించారు. రైతుల కోసం ఎన్ని కేసులైనా భరిస్తానని, ఎన్ని కేసులు పెట్టుకుంటారో పెట్టుకోండని స్పష్టంచేశారు.