రేవంత్‌ పాలనలో రైతుల అరిగోస

• మాజీ ఎమ్మెల్యే గణేశ్‌ బిగాల గుప్తా

హైదరాబాద్‌, నవంబర్‌ 11 (నమస్తేతెలంగాణ): సాగునీరు, కరెంట్‌ ఇవ్వక అరిగోస పెడతున్న రేవంత్‌ సర్కార్‌కు రైతులే తగిన బుద్ధి చెప్తారని నిజామాబాద్‌ అర్బన్‌ మాజీ ఎమ్మెల్యే గణేశ్‌ బిగాల గుప్తా హెచ్చరించారు. ‘రైతు ఏడ్చిన రాజ్యం.. ఎద్దు ఏడ్చిన ఎవుసం’ బాగుపడదనే విషయాన్ని ప్రభుత్వ పెద్దలు గుర్తుచేసుకోవాలని బుధవారం ఒక ప్రకటనలో హితవు పలికారు.

ఉద్యోగుల, అన్నదాతల ఆగ్రహానికి గురైన ప్రభుత్వాలు తిరిగి అధికారంలోకి వచ్చిన దాఖలాలు చరిత్ర లో లేవని స్పష్టం చేశారు. కాంగ్రెస్‌ గద్దెనెక్కిన తర్వాత ఎరువులు, విత్తనాల కోసం అన్నదాతలు ఇబ్బందులు పడుతున్నారని ఆవేదన వ్యక్తంచేశారు. ఇప్పటికైనా ప్రభుత్వ పెద్దలు కండ్లు తెరిచి రైతుల సమస్యల పరిష్కారంపై దృష్టి పెట్టాలని సూచించారు. రైతాంగానికి బీఆర్‌ఎస్‌ అండగా ఉంటుందని స్పష్టం చేశారు.