చిరుధాన్యాల సాగుకు ప్రాధాన్యమివ్వాలి

• రైతులకు శాస్త్రవేత్తల సూచన

హైదరాబాద్‌, నవంబర్‌ 11 (నమస్తే తెలంగాణ): ఎల్‌ నినో ప్రభావంతో రాష్ట్రంలో మార్చి వరకు క్షామ పరిస్థితులు కొనసాగుతాయని హైదరాబాద్‌ కేంద్రీయ విశ్వవిద్యాలయ శాస్త్రవేత్తలు వెల్లడించారు. చలికాలం, వేసవిలో కరువును ఎదుర్కొనేందుకు రైతులు ప్రణాళికాబద్ధంగా వ్యవహరించాలని, చిరుధాన్యాల సాగుకు ప్రాధాన్యమివ్వాలని మిల్లెట్‌ రీసెర్చ్‌ ల్యాబ్‌ వ్యవస్థాపకులు డాక్టర్‌ ముత్తమిలరసన్‌ సూచించారు. 100 రోజుల్లో చేతికొచ్చే జొన్నలు, సజ్జలు, కొర్రలు, రాగుల్లాంటి పంటలను సాగుచేయడం ద్వారా సమస్యలను అధిగమించవచ్చని తెలిపారు.

పప్పుధాన్యాలు, నూనెగింజలతో పంటల సాగు వైవిధ్యాన్ని పెంచడం ద్వారా ఒకే పంట పై ఆధారపడే పరిస్థితి తగ్గుతుందని పేర్కొన్నారు. వర్షపాతం తక్కువగా ఉన్న నల్లగొండ, నారాయణపేట, జోగుళాం బ గద్వాల జిల్లాల్లోని ఎంపిక చేసిన మండలాల రైతులకు కరువుపై అవగాహన కల్పించాలని, కరువును తట్టుకునే కొర్రలు, సజ్జలు, జొన్నలను సాగు చేయించాలని వ్యవసాయ అధికారులకు స్పష్టం చేశారు. ఎల్‌ నినో ప్రభావాలతోపాటు వచ్చే ఏడాది సాగుచేయబోయే చిరుధాన్యలపై ఢిల్లీలోని నేషనల్‌ ప్లాంట్‌ జీనోమ్‌ రీసెర్చ్‌ ఇన్‌స్టిట్యూట్‌తో కలిసి సంయుక్తంగా పరిశోధనలు చేస్తున్నట్టు వెల్లడించారు.