అంబేకర్‌, గుంజన్‌ స్వర్ణ చరిత్ర

• యూత్‌ ఒలింపిక్స్‌ బాక్సింగ్‌ గోల్డెన్‌ పంచ్‌లు

డాకర్‌ (సెనెగల్‌): ప్రతిష్టాత్మక యూత్‌ ఒలింపిక్స్‌లో భారత యువ బాక్సర్లు అంబేకర్‌ మీతేయి, గుంజన్‌ సరికొత్త చరిత్ర సృష్టించారు. ఈ గేమ్స్‌ చరిత్రలో దేశానికి స్వర్ణ పతకాలు అందించిన బాక్సర్లుగా రికార్డుకెక్కారు. గురువారం జరిగిన ఫైనల్స్‌లో ఈ ఇద్దరూ గోల్డెన్‌ పంచ్‌లు విసిరారు. తొలుత పురుషుల 50 కేజీల తుదిపోరులోఅంబేకర్‌ 3-2తో ఐర్లాండ్‌ బాక్సర్‌ క్రిస్టియన్‌ జుబానిపై ఉత్కంఠ విజయం సాధించి యూత్‌ ఒలింపిక్‌ చాంపియన్‌ గా నిలిచాడు. హోరాహోరీగా సాగిన ఈ పోరులో జుబాని నుంచి తీవ్ర ప్రతిఘటన ఎదురైనప్పటికీ ఒత్తిడికి తడబడకుండా పోరాడిన అంబేకర్‌ విజయం సొంతం చేసుకున్నాడు.

యూత్‌ ఒలింపిక్స్‌ బాక్సింగ్‌లో శివ థాపా 2010 ఎడిషన్‌లో (60 కేజీల విభాగం) సాధించిన రజత పతకమే భారత్‌కు అత్యుత్తమ ప్రదర్శన కాగా.. ఇన్నేండ్లకు అంబేకర్‌ ఆ రికార్డులను బద్దలు కొట్టాడు. అనంతరం మహిళల 48 కేజీల విభాగంలో ఫైనల్లో అసాధారణ ప్రదర్శన చేసిన గుంజన్‌ 5-0తో బెన్సలా బుథియానా (అల్జీరియా)ను చిత్తు చేసింది. మూడు రౌండ్లలోనూ స్పష్టమైన పంచ్‌లతో ప్రత్యర్థిని ఉక్కిరిబిక్కిరి చేసి పసిడి సొంతం చేసుకుంది.