Venky Atluri | నాని లేదా విజయ్ దేవరకొండ.. వెంకీ అట్లూరి నెక్స్ట్ మూవీ ఎవరితో అంటే…!

Venky Atluri | దర్శకుడు వెంకీ అట్లూరి ప్రస్తుతం వరుస విజయాలతో టాలీవుడ్లో మంచి జోరు మీదున్నారు. తొలి సినిమాతోనే దర్శకుడిగా గుర్తింపు తెచ్చుకున్న ఆయనకు ఆ తర్వాత వచ్చిన రెండు చిత్రాలు ఆశించిన స్థాయిలో విజయాన్ని అందించలేకపోయాయి. అయితే ‘సార్’, ‘లక్కీ భాస్కర్’, ‘విశ్వనాథ్ అండ్ సన్స్’ సినిమాలతో వరుసగా మూడు విజయాలను తన ఖాతాలో వేసుకున్నారు. ఈ మూడు సినిమాల ద్వారా తన దర్శకత్వ ప్రతిభను మరోసారి నిరూపించుకున్నారు. ఇక్కడ ఆసక్తికరమైన విషయం ఏమిటంటే.. వెంకీ అట్లూరి ఈ మూడు సినిమాలను తెలుగు హీరోలతో కాకుండా ఇతర భాషలకు చెందిన స్టార్ హీరోలతో తెరకెక్కించారు. ధనుష్తో ‘సార్’, దుల్కర్ సల్మాన్తో ‘లక్కీ భాస్కర్’, సూర్యతో ‘విశ్వనాథ్ అండ్ సన్స్’ చిత్రాలు రూపొందించారు. భాషతో సంబంధం లేకుండా మంచి కథను ఎంచుకుంటూ విజయాలు సాధిస్తున్నారు.
అయితే వరుసగా ఇతర భాషల హీరోలతోనే సినిమాలు చేస్తున్నారంటూ కొంతమంది నెటిజన్లు వెంకీ అట్లూరిపై విమర్శలు చేస్తున్నారు. తెలుగు దర్శకుడిగా ఉంటూ తెలుగు హీరోలతో సినిమాలు ఎందుకు చేయడం లేదని ప్రశ్నిస్తున్నారు. ఈ నేపథ్యంలో వెంకీ అట్లూరి తన తదుపరి సినిమాను టాలీవుడ్ హీరోతోనే చేయాలని ప్రయత్నిస్తున్నట్లు తాజా సినీ వర్గాల్లో ప్రచారం జరుగుతోంది. ఈ క్రమంలో నేచురల్ స్టార్ నాని, రౌడీ హీరో విజయ్ దేవరకొండ పేర్లు ప్రముఖంగా వినిపిస్తున్నాయి. ఇప్పటికే ఈ ఇద్దరు హీరోలను వెంకీ అట్లూరి కలిసి తన తదుపరి సినిమా కథకు సంబంధించిన ఆలోచనను వివరించినట్లు టాక్ నడుస్తోంది. అయితే ఇంకా పూర్తి స్థాయి కథా చర్చలు, నేరేషన్ ప్రక్రియ జరగాల్సి ఉందని తెలుస్తోంది.
నాని లేదా విజయ్ దేవరకొండ.. ఈ ఇద్దరిలో ఎవరో ఒకరు కథకు గ్రీన్ సిగ్నల్ ఇస్తే ఆ హీరోతో సినిమా చేసేందుకు వెంకీ అట్లూరి సిద్ధంగా ఉన్నట్లు ప్రచారం సాగుతోంది. అయితే ఈ ప్రాజెక్టుపై ఇప్పటివరకు ఎలాంటి అధికారిక ప్రకటన వెలువడలేదు. మరి వెంకీ అట్లూరి తన తదుపరి సినిమాతో తెలుగు హీరోను డైరెక్ట్ చేస్తారా? నాని, విజయ్ దేవరకొండలలో ఎవరు ఆయన కథకు ఓకే చెబుతారు? అనేది ఆసక్తికరంగా మారింది. దీనిపై స్పష్టత రావాలంటే మరికొంత కాలం వేచి చూడాల్సిందే.
Comments (0)