Tollywood | టాలీవుడ్లో మళ్లీ పైరసీ కలకలం.. ‘ఆకాశంలో ఒక తార’ సహా నాలుగు కొత్త సినిమాల లీక్!

తెలుగు చలనచిత్ర పరిశ్రమలో మరోసారి పైరసీ కలకలం రేగింది. నవంబర్ 20న థియేటర్లలో విడుదలైన ‘ఆకాశంలో ఒక తార’ చిత్రంతో పాటు ఇటీవల ప్రేక్షకుల ముందుకు వచ్చిన ‘రణబాలి’, ‘కల్ట్’, ‘ఆదర్శ కుటుంబం (హౌస్ నంబర్ 47)’ సినిమాలు ఆన్లైన్లో లీక్ అయ్యాయి. ‘ఆకాశంలో ఒక తార’ సినిమా విడుదలైన కొన్ని గంటల్లోనే పైరసీ వెబ్సైట్లలో ప్రత్యక్షం కావడం చిత్ర వర్గాల్లో ఆందోళన కలిగించింది. ఈ నాలుగు సినిమాల పైరసీ కాపీలు go2.india4movies.click అనే వెబ్సైట్లో అక్రమంగా అప్లోడ్ అయినట్లు తెలుగు ఫిల్మ్ ఛాంబర్ ఆఫ్ కామర్స్ (TFCC) యాంటీ వీడియో పైరసీ సెల్ ప్రాజెక్ట్ హెడ్ యర్రా మణీంద్రబాబు గుర్తించి శుక్రవారం తెలంగాణ సైబర్ సెక్యూరిటీ బ్యూరో (TGCSB) అధికారులకు ఫిర్యాదు చేశారు.
క్యూబ్ సినిమా టెక్నాలజీస్ నిర్వహించిన ఫోరెన్సిక్ ఆడిట్లో ఈ పైరసీ వెనుక ఉన్న కీలక విషయాలు వెలుగులోకి వచ్చాయి. ‘రణబాలి’, ‘కల్ట్’, ‘ఆదర్శ కుటుంబం’ చిత్రాలను ఆంధ్రప్రదేశ్లోని కర్నూలు సిటీ స్క్వేర్ మాల్ థియేటర్లో దుండగులు క్యామ్కార్డర్తో రహస్యంగా చిత్రీకరించినట్లు ఫోరెన్సిక్ నివేదిక స్పష్టం చేసింది. ఫిల్మ్ ఛాంబర్ ఫిర్యాదు మేరకు గుర్తుతెలియని వ్యక్తులపై కేసు నమోదు చేసిన సైబర్ సెక్యూరిటీ పోలీసులు దర్యాప్తు ముమ్మరం చేశారు. కర్నూలు థియేటర్లోని సీసీటీవీ ఫుటేజ్, షో వివరాలు, టికెట్ బుకింగ్ రికార్డులను పరిశీలించడంతో పాటు సదరు వెబ్సైట్ నిర్వాహకులు మరియు సినిమాలను అప్లోడ్ చేసిన నిందితులను పట్టుకునేందుకు ప్రత్యేక బృందాలతో విచారణ జరుపుతున్నారు. కోట్ల రూపాయల వ్యయంతో నిర్మించిన సినిమాలు విడుదలైన రోజే ఇంటర్నెట్లో లీక్ కావడం వసూళ్లపై తీవ్ర ప్రభావం చూపుతోందని సినీ నిర్మాతలు ఆవేదన వ్యక్తం చేస్తున్నారు.
Comments (0)