Idupu Kayitham | ‘గోగులు గోగులు గోపాలకృష్ణుడు సేలి’.. ఆకట్టుకుంటున్న ‘ఇడుపుకాయితం’ పెళ్లి సాంగ్

Idupu Kayitham | విభిన్న పాత్రలతో ప్రేక్షకులను మెప్పించే ప్రియదర్శి హీరోగా నటిస్తున్న తాజా చిత్రం ‘ఇడుపు కాయితం’. జానపద పాటలతో గుర్తింపు పొందిన నాగదుర్గ ఈ చిత్రంలో కథానాయికగా కనిపించనున్నారు. యువ దర్శకుడు వంశీరెడ్డి దొండపాటి తెరకెక్కిస్తున్న ఈ ఎంటర్టైనింగ్ ఫ్యామిలీ డ్రామాను బన్నీవాస్ వర్క్స్, సుకుమార్ రైటింగ్స్ బ్యానర్లపై బన్నీవాస్, తబిత సుకుమార్ సంయుక్తంగా నిర్మిస్తున్నారు. ఈ సినిమా డిసెంబర్ 11న ప్రపంచవ్యాప్తంగా థియేటర్లలో విడుదల కానుంది. ప్రచారంలో భాగంగా చిత్రబృందం తాజాగా ‘గోగులు గోగులు..’ అనే లిరికల్ పాటను విడుదల చేసింది.
శ్రీనివాస్ పాత్రలో ప్రియదర్శి, శ్రీలత పాత్రలో నాగదుర్గల పెళ్లి వేడుక నేపథ్యంలో ఈ పాటను రూపొందించారు. సంగీత దర్శకుడు సురేష్ బొబ్బిలి ఆకట్టుకునే బాణీ సమకూర్చగా, కొంగరి కృష్ణ సాహిత్యం అందించారు. అభిక్య తనికెళ్ల, తరుణి, రచిత రాయప్రోలు, జయశ్రీ పల్లెం, స్నిగ్ధ శర్మ కలిసి ఈ గీతాన్ని ఆలపించారు. ‘గోగులు గోగులు గోపాలకృష్ణుడు సేలి, గోగులు గోగులు గోపాలకృష్ణుడు సేలి, గోగులు గోగులు గోపాలకృష్ణుడు ఆనంద బాలుడు నందకుమారుడు, రమ్మనరే రమ్మనరే నలుగుకు నా ముద్దు గోపాలకృష్ణున్ని, రమ్మనరే నలుగుకు నా ముద్దు గోపాల కృష్ణుని…’ అంటూ సాగే ఈ పాట వేడుక వాతావరణాన్ని చక్కగా ప్రతిబింబిస్తోంది.
ఈ చిత్రంలో ప్రియదర్శి, నాగదుర్గలతో పాటు శివజ్యోతి (తీన్మార్ సావిత్రి), సుజాత (జోర్దార్), చంద్రవ్వ, మౌనిక రెడ్డి, రచ్చరవి, బిత్తిరి సత్తి, అభయ్ బేతిగంటి, మైమ్ మధు తదితరులు కీలక పాత్రల్లో నటిస్తున్నారు. సాంకేతిక విభాగంలో ఎంఎన్ బాల్ రెడ్డి సినిమాటోగ్రఫీ, శ్రీధర్ సొంపల్లి ఎడిటింగ్, ఆశిష్ తేజ ఆర్ట్ డైరెక్షన్, అశ్వత్ భైరి కాస్ట్యూమ్ డిజైనింగ్ బాధ్యతలు నిర్వహిస్తున్నారు. వంశీరెడ్డి దొండపాటి కథ, దర్శకత్వం వహిస్తున్న ఈ చిత్రానికి విష్ణు తేజ్ పుట్ట మార్కెటింగ్ వ్యవహారాలు చూస్తుండగా, సురేష్ (ఎస్ కే మీడియా), మడూరి మధు పీఆర్ఓలుగా పనిచేస్తున్నారు.
Comments (0)