Varanasi | వారణాసి నుంచి అదిరిపోయే అప్‌డేట్.. షూటింగ్ పూర్తి, త్వరలోనే రాజమౌళి భారీ సర్‌ప్రైజ్!

16 November 2026 - 09:00
Updated: 5 days ago
0 1
Varanasi | వారణాసి నుంచి అదిరిపోయే అప్‌డేట్.. షూటింగ్ పూర్తి, త్వరలోనే రాజమౌళి భారీ సర్‌ప్రైజ్!
Varanasi | దర్శకధీరుడు ఎస్.ఎస్. రాజమౌళి తెరకెక్కిస్తున్న ప్రతిష్టాత్మక చిత్రం ‘వారణాసి’పై ప్రపంచవ్యాప్తంగా భారీ అంచనాలు నెలకొన్నాయి. సూపర్ స్టార్ మహేష్ బాబు హీరోగా రూపొందుతున్న ఈ సినిమాపై ఇప్పటికే అంతర్జాతీయ స్థాయిలో ఆసక్తి ఏర్పడింది. ‘బాహుబలి’, ‘ఆర్ఆర్ఆర్’ వంటి చిత్రాలతో భారతీయ సినిమా ఖ్యాతిని ప్రపంచానికి చాటిన రాజమౌళి.. ఇప్పుడు మరోసారి భారీ విజువల్ వండర్‌ను ప్రేక్షకులకు అందించేందుకు సిద్ధమవుతున్నారు. ఈ నేపథ్యంలో తాజాగా ‘వారణాసి’ చిత్ర బృందం ఇచ్చిన అప్‌డేట్ అభిమానుల్లో కొత్త ఉత్సాహాన్ని నింపింది.

సరిగ్గా ఏడాది క్రితం ‘వారణాసి’ చిత్ర బృందం నిర్వహించిన గ్రాండ్ ఈవెంట్ దేశవ్యాప్తంగా మాత్రమే కాకుండా అంతర్జాతీయ స్థాయిలోనూ అందరి దృష్టిని ఆకర్షించింది. రాజమౌళి సినిమా కావడంతో ఈ కార్యక్రమంపై భారీ అంచనాలు ఏర్పడ్డాయి. ఇక తాజాగా మరోసారి అభిమానులను సర్‌ప్రైజ్ చేస్తూ చిత్ర బృందం సోషల్ మీడియా వేదికగా కీలక విషయాలను వెల్లడించింది. ‘వారణాసి’ అధికారిక ఎక్స్ ఖాతాలో షేర్ చేసిన సమాచారం ప్రకారం.. సినిమా షూటింగ్ పూర్తయింది. ప్రస్తుతం విజువల్ ఎఫెక్ట్స్ (CG) పనులతో పాటు రీ-రికార్డింగ్ పనులు జరుగుతున్నాయి. ఇంకా డబ్బింగ్ కార్యక్రమాలు ప్రారంభం కావాల్సి ఉందని చిత్ర బృందం వెల్లడించింది. దీంతో సినిమా నిర్మాణం కీలకమైన పోస్ట్ ప్రొడక్షన్ దశలోకి చేరుకున్నట్లు స్పష్టమవుతోంది.

అయితే ఈ అప్‌డేట్‌లో అందరి దృష్టిని ఆకర్షించిన విషయం మాత్రం చివర్లో చిత్ర బృందం చేసిన వ్యాఖ్యలే. ‘‘ఇది అప్‌డేట్ అని మీరు అనుకుంటే ఇది అప్‌డేట్. లేదంటే అసలైన బ్లాస్ట్ కోసం మరికొంత సమయం వేచి చూడాల్సిందే’’ అనే అర్థం వచ్చేలా పోస్ట్‌లో పేర్కొన్నారు.దీంతో అభిమానుల్లో కొత్త ఉత్కంఠ మొదలైంది. అసలు రాజమౌళి టీమ్ ఇవ్వబోయే ఆ బ్లాస్ట్ ఏంటి? సినిమా నుంచి మరో భారీ వీడియో లేదా గ్లింప్స్ విడుదల చేయబోతున్నారా? లేక కథ, పాత్రలకు సంబంధించి కీలక విషయాలను వెల్లడించబోతున్నారా? అనే చర్చ సోషల్ మీడియాలో జోరుగా సాగుతోంది. ముఖ్యంగా మహేష్ బాబు అభిమానులు, రాజమౌళి అభిమానులు ఈ సర్‌ప్రైజ్ కోసం ఎంతో ఆసక్తిగా ఎదురుచూస్తున్నారు. చిత్ర బృందం చేసిన ఈ చిన్న హింట్‌తోనే సోషల్ మీడియాలో ‘వారణాసి’ పేరు మరోసారి ట్రెండింగ్‌లోకి వచ్చేలా అంచనాలు పెరిగాయి.

Comments (0)

User